ភ្នំពេញៈ វ៉ាក់សាំងបង្ការជំងឺកូវីដ១៩ ប្រភេទម៉ូដឺណា (Moderna) ចំនួន ១៨៨ ១៦០ ដូស ដែលជាជំនួយរបស់មជ្ឃមណ្ឌលកូវ៉ាក់ (COVAX Facility) បានដឹកមកដល់ប្រទេសកម្ពុជាហើយ នាល្ងាចថ្ងៃទី ២៨ ខែវិច្ឆិកា នេះ ហើយវ៉ាក់សាំងនេះសម្រាប់ចែកចាយចាក់តាមផែនការរបស់គណៈកម្មការចាក់វ៉ាក់សាំង។ នេះបើតាមការថ្លែង របស់លោកស្រី យក់ សម្បត្តិ រដ្ឋលេខាធិការក្រសួងសុខាភិបាល ក្នុងពេលទទួលវ៉ាក់សាំងនេះ។
លោកស្រីបានឱ្យដឹងថា បន្ទាប់ពីការទទួលបាននូវវ៉ាក់សាំងលើកនេះ កម្ពុជាអាចនឹងទទួលបាននូវវ៉ាក់សាំងប្រមាណជា ២ ទៅ ៣ ដងទៀតរហូតដល់ចុងឆ្នាំ។
លោកស្រី យក់ សម្បតិ្ត ក៏បានបញ្ជាក់ឱ្យដឹងផងដែរថា ៖ «ក្រសួងសុខាភិបាល នឹងធ្វើការប្រជុំជាបន្ទាន់មួយ នៅល្ងាចនេះដើម្បីប្រកាសប្រាប់ប្រជាពលរដ្ឋទាំងអស់ សុំឱ្យរក្សានូវវិធានការ ហើយសុំទុកចិត្តលើការដឹកនាំបញ្ជារបស់ប្រមុខរាជរដ្ឋាភិបាល និងយើងនៅតែធ្វើការជាមួយនឹងអង្គការដៃគូ ក៏ដូចជាមន្ទីរពិសោធន៍ទាំងអស់»។
លោកស្រី Li Ailan តំណាងអង្គការសុខភាពពិភពលោកប្រចាំកម្ពុជា បានថ្លែងឱ្យដឹងផងដែរថា ដោយសារតែមានភាពមិនច្បាស់លាស់ច្រើននូវអ្វីដែលមិនទាន់ដឹង ដូចនេះគ្រប់គ្នាត្រូវត្រៀមខ្លួនទុកជាមុន សម្រាប់ការផ្ទុះឡើងនិងការឆ្លងកើនឡើងជាគំហុកណាមួយនូវជំងឺកូវីដ ដែលអាចកើតមានឡើងជាយថាហេតុនាពេលខាងមុខ៕