.jpg)
សម្តេចក្រុមព្រះ នរោត្តម រណឫទ្ធិ បានសោយទិវង្គតនៅប្រទេសបារាំងក្នុងព្រះជន្ម ៧៧ ព្រះវស្សា។ ហេង ជីវ័ន
ទីប្រឹក្សាព្រះរាជលេខាធិការដ្ឋាន ព្រះមហាក្សត្រត្រីយ៍ នរោត្តម មុនីនាថ សីហនុ លោក អ៊ុដារ៉ាវុធ បានប្រាប់ភ្នំពេញប៉ុស្តិ៍នៅយប់ថ្ងៃទី ២៨ ខែវិច្ឆិកានេះថា សម្តេចក្រុមព្រះ នរោត្តម រណឫទ្ធិ បានសោយទិវង្គតនៅប្រទេសបារាំងក្នុងព្រះជន្ម ៧៧ ព្រះវស្សា។
លោកបានប្រាប់ឱ្យដឹងថា៖ «សម្តេចក្រុមព្រះបានសោយទិវង្គតហើយកាលពីព្រឹកមិញ នៅម៉ោងប្រមាណ ៩ និង ៤០ ព្រឹកនៅទីក្រុងប៉ារីស ប្រទេសបារាំង ប៉ុន្តែសពរបស់ព្រះអង្គ ខ្ញុំមិនដឹងថាតើនឹងត្រូវបញ្ជូនមកពេលណាឬយ៉ាងណានោះទេ»។
លោក អ៊ុ ដារ៉ាវុធ បានបញ្ជាក់ទៀតថា ក្រុមគ្រួសាររបស់ព្រះអង្គកំពុងតែធ្វើការប្រជុំពិភាក្សាគ្នាជាមួយនឹងព្រះមហាក្សត្រីយ៍សម្តេចម៉ែ និងព្រះករុណាព្រះមហាក្សត្រ ដោយមិនទាន់ដឹងលម្អិតថានឹងត្រូវធ្វើយ៉ាងណាទៀតនៅឡើយទេ។
គួរបញ្ជាក់ថា សម្តេចក្រុមព្រះ នរោត្តម រណឫទ្ធិ ប្រសូតនៅថ្ងៃទី ២ ខែមករា ឆ្នាំ ១៩៤៤ ព្រះអង្គជាអ្នកនយោបាយកម្ពុជា។ ព្រះអង្គគឺជាព្រះរាជបុត្រទី ២ របស់ព្រះបាទនរោត្តម សីហនុ និងត្រូវជាព្រះរាមនៃព្រះមហាក្សត្រកម្ពុជាបច្ចុប្បន្ន ព្រះករុណា ព្រះបាទសម្តេចព្រះបរមនាថ នរោត្តម សីហមុនី។
សម្តេចក្រុមព្រះ នរោត្តម រណឫទ្ធិគឺជាព្រះប្រធានគណបក្សរាជានិយមមួយនៅកម្ពុជាដែលមានឈ្មោះថាគណបក្សហ៊្វុនស៊ិនប៉ិចហើយបានជាប់ឆ្នោតក្លាយជានាយករដ្ឋមន្ត្រីទីមួយពីឆ្នាំ ១៩៩៣ រហូតដល់ឆ្នាំ ១៩៩៧ ហើយបន្ទាប់មកក៏បានក្លាយជាព្រះប្រធានរដ្ឋសភាចន្លោះឆ្នាំ ១៩៩៨ ដល់ឆ្នាំ ២០០៦៕
