.jpg)
អតិថិជនទិញផ្ទះមកសុំអន្តរាគមន៍ពីថ្ងៃទី ២៦ វិច្ឆិកា។ រូបថត ហ្វេសប៊ុក
ភ្នំពេញៈ ពលរដ្ឋជាង ១៥០ នាក់ ដែលអះអាងថាជាជនរងគ្រោះពីគម្រោងរបស់ក្រុមហ៊ុន បុរី វីអាយភី (VIP) ក្នុងភូមិម៉ឺនត្រា សង្កាត់ស្ពានថ្ម ខណ្ឌដង្កោ រាជធានីភ្នំពេញ បានសុំកិច្ចអន្តរាគមន៍ពីលោកនាយករដ្ឋមន្ត្រី ហ៊ុន សែន បន្ទាប់ពីបានទិញ និងបង់រំលស់ពីគម្រោងនេះជាច្រើនឆ្នាំ ប៉ុន្តែមិនបានទទួលផ្ទះ និងប្លង់កម្មសិទ្ធិតាមការសន្យា ខណៈម្ចាស់ក្រុមហ៊ុនអះអាងថានឹងឆ្លើយតបនៅថ្ងៃចន្ទនេះ។
កាលពីថ្ងៃទី ២៦ វិច្ឆិកា តំណាងជនរងគ្រោះជិត ១០ នាក់ តំណាងឱ្យពលរដ្ឋរងគ្រោះទាំងអស់បានយកញត្តិទៅដាក់នៅខុទ្ទកាល័យលោកនាយករដ្ឋមន្ត្រី ហ៊ុន សែន ដើម្បីស្នើសុំឱ្យជួយអន្តរាគមន៍ទៅក្រុមហ៊ុន អ.អិន វីអាយភី រៀល អ៊ីស្តេត ឯ.ក និងបុរីវីអាយភីឱ្យសាងសង់ផ្ទះដែលពួកគេបានទិញឱ្យបានរួចរាល់ និងប្រគល់ប្លង់កម្មសិទ្ធិ បន្ទាប់ពីហួសកាលកំណត់តាមកិច្ចសន្យាដល់ ២ ទៅ ៣ ឆ្នាំមកហើយ។
ក្នុងញត្តិរបស់ពលរដ្ឋបានអះអាងថា៖ «យើងខ្ញុំបានទិញផ្ទះពីបុរី វីអាយភី តាំងពីឆ្នាំ ២០១៨ រហូតមកដល់បច្ចុប្បន្ននេះ ខាងបុរីធ្វើផ្ទះមិនទាន់រួចតាមការកំណត់ និងខ្លះហើយ តែមិនទាន់ទទួលបានប្លង់កម្មសិទ្ធិ។ ពេលយើងខ្ញុំសុំជួប ដើម្បីដោះស្រាយ ខាងបុរីមិនព្រមជួប និងចេះតែគេចវេះមិនព្រមចូលខ្លួនដោះស្រាយជាមួយពួកខ្ញុំ»។
លោក យឹម រដ្ឋា ជាពលរដ្ឋរងគ្រោះម្នាក់បានប្រាប់ភ្នំពេញ-ប៉ុស្តិ៍នៅថ្ងៃទី ២៨ វិច្ឆិកា បន្ថែមថា ពួកគាត់ធ្លាប់បានដាក់ពាក្យបណ្តឹងប្តឹងទៅសង្កាត់ ខណ្ឌ និងសាលារាជធានីភ្នំពេញឱ្យជួយរកដំណោះស្រាយជាបន្តបន្ទាប់ ប៉ុន្តែក្រុមហ៊ុននៅតែមិនផ្តល់ដំណោះស្រាយ ទើបបានមកសុំកិច្ចអន្តរាគមន៍ពីលោកនាយករដ្ឋមន្ត្រី ហ៊ុន សែន ដើម្បីឱ្យជួយដោះស្រាយ។
លោកបានបញ្ជាក់ថា៖ «យើងស្វែងរកកិច្ចអន្តរាគមន៍អស់ហើយ តាំងពីថ្នាក់ក្រោមដល់លើ បានយើងឈានទៅសម្តេចឱ្យជួយនេះ។ កន្លងទៅអាជ្ញាធរបានជួយសម្របសម្រួល គ្រាន់តែខាងបុរីមិនមានផ្តល់សង្ឃឹមអ្វីឱ្យយើង ព្រោះនៅពេលសម្របសម្រួលហើយ ខាងបុរីមិនដាក់ជាងទៅធ្វើដដែលទុកផ្ទះយើងដុះស្លែ»។
បើតាមលោក យឹម រដ្ឋា ករណីពលរដ្ឋរងគ្រោះទាំងអស់គឺមានអង្គហេតុខុសគ្នា ដោយអ្នកខ្លះបង់លុយផ្តាច់ហើយមិនទទួលបានប្លង់ ខណៈផ្ទះនៅមិនទាន់សាងសង់រួច។ ចំណែកអ្នកខ្លះនៅបន្តបង់រំលស់ ប៉ុន្តែខាងក្រុមហ៊ុនមិនបន្តការសាងសង់ឱ្យចប់តាមការសន្យាប្រគល់ផ្ទះនោះទេ។ លោកថា ក្រុមហ៊ុនកុងត្រាជាមួយអតិថិជនរយៈពេល ១២ ខែ ប្រគល់ផ្ទះជូន ប៉ុន្តែដល់ពេល ១២ ខែ មិនទាន់រួចរាល់ បែរជាក្រុមហ៊ុនធ្វើកុងត្រាសាថ្មីបន្តតាំងពី ១២ ខែរហូតដល់ ៣ ទៅ ៤ ឆ្នាំដោយអត់ព្រមដាក់ជាងសង់ទេ។
លោក គង់ ចំរើន មន្ត្រីខុទ្ទកាល័យលោកនាយករដ្ឋមន្ត្រី ហ៊ុន សែន បានប្រាប់ភ្នំពេញ-ប៉ុស្តិ៍នៅថ្ងៃទី ២៨ វិច្ឆិកាថា ខុទ្ទកាល័យមិនទាន់ទទួលញត្តិនោះជាផ្លូវការទេ ប៉ុន្តែលោកបានណែនាំឱ្យពលរដ្ឋរៀបចំឯកសារឱ្យបានត្រឹមត្រូវជាមុន ខណៈករណីនេះបានបង្វែរឱ្យថ្នាក់ខណ្ឌដង្កោបន្តដោះស្រាយ។
លោកបានបញ្ជាក់ថា៖ «មកប្តឹងនេះ ខ្ញុំមិនទាន់បានទទួលឯកសារទេ ព្រោះឯកសារពាក់ព័ន្ធហ្នឹងមិនត្រឹមត្រូវទេ ហើយពួកគាត់ ចេះតែប្រមូលគ្នាមក។ តែខាងសាលាខណ្ឌដង្កោ គេបានណែនាំឱ្យបងប្អូនទាំងអស់ហ្នឹង គាត់រៀបចំជាក្រុម ព្រោះការទិញដូរមានការបង់ផ្តាច់ ជាក្រុមបង់រំលស់ និងអ្នកបង់រំលស់ដាច់ហើយ។ ដូច្នេះ ការទាមទាររបស់ពួកគាត់ មានការខូចខាតខុសៗគ្នា។ ដូចនេះ តាមនីតិវិធីច្បាប់ អាចឈានទៅរកការប្តឹងប្ដល់តាមផ្លូវតុលាការបាន»។
បើតាមលោក គង់ ចំរើន ថ្ងៃចន្ទនេះអាជ្ញាធរខណ្ឌដង្កោ នឹងណែនាំឱ្យពលរដ្ឋទាំងនោះរៀបចំឯកសារដោយបែងចែកពលរដ្ឋរងគ្រោះជាកញ្ចប់ឱ្យបានត្រឹមត្រូវ និងបែងចែងករណីរបស់ពលរដ្ឋនីមួយៗឱ្យដាច់ពីគ្នា ដើម្បីឱ្យថ្នាក់ខណ្ឌស្រួលបន្តកិច្ចសម្របសម្រួល និងរកដំណោះស្រាយជាមួយក្រុមហ៊ុន។
លោក វន វណ្ណៈ អគ្គនាយកក្រុមហ៊ុន អ.អិន វីអាយភី រៀលអ៊ីស្តេត ឯ.ក និងបុរីវីអាយភី បានប្រាប់ភ្នំពេញប៉ុស្តិ៍នៅថ្ងៃទី ២៨ វិច្ឆិកាថា ក្រុមហ៊ុនរបស់លោកកំពុងប្រជុំពិភាក្សា ដើម្បីផ្តល់ជាដំណោះស្រាយ និងឆ្លើយតបទៅអថិជននៅថ្ងៃទី ២៩ វិច្ឆិកានេះ។ លោកថា ក្រុមហ៊ុនមិនបានគេចវេះ ដូចពលរដ្ឋចោទនោះទេគឺក្រុមហ៊ុនមានជំហរដោះស្រាយ។
លោកថា៖ «ជាគោលការណ៍ក្រុមហ៊ុនតែងតែដោះស្រាយជាមួយគាត់ជានិច្ច នៅពេលដែលគាត់តវ៉ា។ ក្រុមហ៊ុនមានអំណះអំណាងលើអ្វីដែលខ្លួនជួបប្រទះបញ្ហា។ ចំពោះបញ្ហាអ្វីផ្សេងទៀត ខ្ញុំសុំមិននិយាយទេ ព្រោះការលើកឡើងរបស់ពលរដ្ឋគឺត្រូវខ្លះ អត់ខ្លះ...»។
យ៉ាងណា លោក វន វណ្ណៈ បានអះអាងថា ក្នុងពេលឆាប់ៗនេះក្រុមហ៊ុនអាចនឹងធ្វើសន្និសីទកាសែត ដើម្បីបកស្រាយជាមួយនឹងការតវ៉ារបស់ប្រជាពលរដ្ឋទាំងអស់នេះ៕
