.jpg)
លោកសម រង្ស៊ី និងលោកកឹម សុខា ក្នុងពិធីកាន់បិណ្ឌនៅខេត្តសៀមរាប។ ហេង ជីវ័ន
ភ្នំពេញៈ លោក កឹម សុខា អតីតប្រធានអតីតគណបក្សសង្គ្រោះជាតិបានអំពាវនាវឱ្យលោក សម រង្ស៊ី និងក្រុមរបស់លោកឈប់បំពានមកលើរូបលោក ដោយការយកឈ្មោះ និងរូបថតរបស់លោកទៅប្រើប្រាស់ភ្ជាប់ជាមួយសកម្មភាពមហិច្ឆតានយោបាយរបស់ខ្លួន ដោយលោក កឹម សុខា បញ្ជាក់ថា ទង្វើទាំងនេះសបញ្ជាក់ឱ្យឃើញថា សម រង្ស៊ី និង កឹម សុខា មិនមែនជាមនុស្សតែមួយទេ។
លោក កឹម សុខា ដែលនៅតែត្រូវបានដាក់ឱ្យស្ថិតនៅក្រោមការត្រួតពិនិត្យរបស់តុលាការនៅឡើយ ក្រោមការចោទប្រកាន់ពីបទ «ក្បត់ជាតិ» នៅថ្ងៃទី ២៨ ខែវិច្ឆិកា ឆ្នាំ ២០២១ បានសរសេរនៅលើហ្វេសប៊ុកផ្លូវការរបស់លោកថា រហូតមកដល់ពេលនេះ លោក សម រង្ស៊ី និង សហការី នៅតែបន្តយកឈ្មោះ និងរូបថតរបស់លោក ទៅប្រើប្រាស់ភ្ជាប់ជាមួយនឹងសកម្មភាពនានា ដែលពុំមានការអនុញ្ញាត ឬគាំទ្រពីរូបលោក។ លោកបញ្ជាក់ថា៖ «លើសពីនេះទៅទៀត ជាក់ស្តែង លោក សម រង្ស៊ី និងសហការី បានដើរចេញពីគោលការណ៍ និងស្មារតីដើមនៃការរួបរួម ដោយទៅបង្កើតចលនានយោបាយផ្សេងៗ និងមុខតំណែងខ្លួនឯង ជាពិសេសថ្មីៗនេះ គឺការត្រឡប់ទៅគាំទ្រដោយចំហ ឬនៅពីក្រោយការដឹកនាំគណបក្សនយោបាយចាស់របស់ពួកគេ គឺគណបក្សភ្លើងទៀន»។ «ទង្វើរបស់ពួកគេសបញ្ជាក់ឱ្យឃើញថា សម រង្ស៊ី និង កឹម សុខា មិនមែនជាមនុស្សតែមួយទេ ព្រោះសកម្មភាពទាំងអស់នេះ មិនមានការគាំទ្រ ឬជាជំហររបស់ខ្ញុំឡើយ»។
លោក កឹម សុខា ដែលកំពុងតែជាប់នៅក្នុងបម្រាមធ្វើនយោបាយនៅឡើយបានអំពាវនាវដល់លោក សម រង្ស៊ី និង សហការីឈប់បំពានមកលើរូបលោក ដោយការយកឈ្មោះ និងរូបថតលោកទៅប្រើប្រាស់ភ្ជាប់ជាមួយសកម្មភាពមហិច្ឆតា នយោបាយ របស់ខ្លួនដែលធ្វើឱ្យសាធារណមតិជាតិ និងអន្តរជាតិមានការភាន់ច្រឡំ។ «ខ្ញុំសូមបញ្ជាក់ផងដែរថា ខ្ញុំមិនពាក់ព័ន្ធ និង មិនទទួលខុសត្រូវចំពោះសកម្មភាពរបស់លោក សម រង្ស៊ី និង ក្រុមនោះឡើយ»។
លោក សម រង្ស៊ី តែងតែថ្លែងនៅក្នុងវេទិកាជួបជុំ អ្នកគាំទ្ររបស់លោក និងមន្ត្រីអតីតគណបក្សគណបក្សសង្គ្រោះជាតិ នៅឯក្រៅប្រទេសថា រូបលោក និងលោក កឹម សុខា ជាមនុស្សតែមួយ និងបានដាក់ផ្ទាំងរូបភាពចាប់ដៃគ្នា លើកដៃឡើងលើ ដែលជាសញ្ញាមិនបែកបាក់គ្នា។
លោក សម រង្ស៊ី កាលពីថ្មីៗនេះ នៅក្នុងពិធីជួបជុំ អ្នកគាំទ្រនៅរដ្ឋកាលីហ្វ័រនីញ៉ា លោកបានថ្លែងអំពាវនាវដល់ថ្នាក់ដឹកនាំអតីតគណបក្សសង្គ្រោះជាតិទាំងអស់ ឱ្យបើកចិត្តទូលាយ និងកុំបង្ហាញពីការបែកបាក់គ្នា នៅក្នុងកាលៈទេសៈនេះដោយលោកថា វាមិនចំណេញដល់ប្រទេសជាតិឡើយ។
លោក ថាច់ សេដ្ឋា អនុប្រធានទី ១ គណបក្សភ្លើងទៀនថ្លែងថា លោកសុំមិនធ្វើអត្ថាធិប្បាយអ្វីឡើយ ចំពោះករណី លោក កឹម សុខា និងលោក សម រង្ស៊ី នេះ ព្រោះលោកយល់ថា ជាករណីផ្ទាល់ខ្លួនរបស់អ្នកទាំង ២។ សម្រាប់រូបលោក លោកដឹងតែបំពេញកិច្ចការងារ និងពង្រឹងគណបក្សភ្លើងទៀនតែប៉ុណ្ណោះ។
លោក សេង សារី អ្នកវិភាគបញ្ហាសង្គម និងនយោបាយយល់ឃើញថា លោក កឹម សុខា មិនទាន់ផុត បម្រាមរបស់តុលាការនៅឡើយទេ ពាក់ព័ន្ធនឹងនយោបាយ ហើយការសរសេររបស់លោកបែបនេះ វាជាសារនយោបាយ តាមរយៈការប្រើប្រាស់ពាក្យសម្តី គឺមិនចំណេញនោះទេ ខណៈ លោក សម រង្ស៊ី បានប្រកាសពីការមិនបែកបាក់ និងនៅប្រើប្រាស់សារ សម រង្ស៊ី និង កឹម សុខា ជាមនុស្សតែមួយ។ លោកពន្យល់ថា មូលហេតុដែលមិនចំណេញដល់លោក កឹម សុខា គឺបាត់បង់សង្គ្រោះជាតិ ព្រោះបើលោក កឹម សុខា ចង់ប្រឡូកក្នុងវិស័យនយោបាយឡើងវិញ គឺគាត់ត្រូវដើរចេញពីគណបក្សសង្គ្រោះជាតិដោយខ្លួនឯងខណៈដែលលោក សម រង្ស៊ី មិនដើរចេញទេ ព្រោះលោក សមរង្ស៊ី អត់អាចធ្វើនយោបាយបាន និងនៅឱបនិងរក្សាព្រលឹងគណបក្សសង្គ្រោះជាតិ។
លោកបន្តថា នៅពេលដែលលោក សម រង្ស៊ី រក្សាព្រលឹងសង្គ្រោះជាតិបាន លោក សម រង្ស៊ី នឹងប្រកាសឱ្យព្រលឹង ឱ្យចូលទៅក្នុងបក្សណាមួយ ដូចជាប្រកាសឱ្យចូលគណបក្សភ្លើងទៀន ឬគណបក្សណាមួយនោះ វានឹងធ្វើឱ្យឥទ្ធិពលគណបក្សនយោបាយនោះកាន់តែរីកធំ។
លោកបន្តថា ចំណែកលោក កឹម សុខា គួរតែយកពេលវេលាទៅណែនាំមន្ត្រីនៅជុំវិញខ្លួន ដែលតែងតែនិយាយផ្តេសផ្តាសជាប្រភេទ «ត្រីក្រឹមខាំកន្ទុយខ្លួនឯង»។ «កន្លងមកនេះយើងឃើញថា មន្ត្រីនៅជុំវិញគាត់ វង្វេងសមរភូមិ ប្រើប្រាស់មធ្យោបាយទូលលោក កឹម សុខា ជាន់ក្បាល សម រង្ស៊ី ដើម្បីវ៉ៃជាមួយ ហ៊ុន សែន។ អាហ្នឹងមិនមែនជាមធ្យោបាយល្អទេ គឺគាត់ត្រូវតែធ្វើការប្រដែប្រដៅពួកហ្នឹង»។
គណបក្សភ្លើងទៀន កាលពីថ្ងៃទី ២៧ ខែវិច្ឆិកា បានរៀបចំធ្វើសមាជ ដើម្បីកែសម្រួលក្ខន្តិកៈ និងរៀបចំរចនាសម្ព័ន្ធថ្នាក់ដឹកនាំ ដោយបានបោះឆ្នោតជ្រើសរើសមន្ត្រីជាន់ខ្ពស់នៃអតីតគណបក្សសង្គ្រោះជាតិ និងសង្គមស៊ីវិលមួយចំនួនទៅក្នុងគណៈកម្មាធិការនាយក គណៈកម្មាធិការអចិន្រៃ្តយ៍ និងប្រធាន អនុប្រធានអគ្គលេខាធិការរបស់គណបក្ស។
លោក ថាច់ សេដ្ឋា ថ្លែងនៅថ្ងៃទី ២៨ វិច្ឆិកាថា ជាមួយគ្នានេះ គណបក្សក៏បានអនុម័តទៅលើយុទ្ធសាស្ត្រ និងគោលនយោបាយមួយចំនួនទៀតសម្រាប់អនុវត្តនៅពេលខាងមុខ និងមួយវិញទៀត រៀបចំរចនាសម្ព័ន្ធឱ្យទៅដល់ឃុំសង្កាត់ នៅទូទាំងប្រទេស ប៉ុន្តែលទ្ធភាពក្នុងការចូលរួមបោះឆ្នោតជ្រើសរើសក្រុមប្រឹក្សាឃុំ សង្កាត់ មិនទាន់សម្រេចនៅឡើយ។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា ថ្លែងថា ការធ្វើសមាជរបស់គណបក្សភ្លើងទៀនគឺជាការវិវត្តថ្មីមួយទៀតចុងក្រោយនៃនយោបាយរបស់កម្ពុជា ជាពិសេសនយោបាយរបស់គណបក្ស តាមរយៈមន្ត្រីនៃអតីតគណបក្សសង្គ្រោះជាតិកំពុងស្វះស្វែងរកទីតាំងឈរជើង សម្រាប់ការចូលរួមប្រកួតប្រជែងការបោះឆ្នោតនៅឆ្នាំ ២០២២ និងនៅឆ្នាំ ២០២៣ ខាងមុខ។
លោកថា មួយទៀតក៏វាបង្ហាញពីការបែកខ្ញែកគ្នារវាងសម្ព័ន្ធមិត្តអតីតគណបក្សសង្គ្រោះជាតិ ពីព្រោះថា គណបក្សភ្លើងទៀននេះ ជាគណបក្សរបស់លោក សម រង្ស៊ី។ ទោះបីលោក សម រង្ស៊ី មិនចេញមុខដោយផ្ទាល់ក្តី ប៉ុន្តែគេដឹងថាគូកន និងក្រុមបក្សរបស់លោកបានទៅប្រមូលគ្នាជ្រកក្រោមគណបក្សភ្លើងទៀននេះរួចទៅហើយ។ លោកថា៖ «នេះ គឺជាសញ្ញាមួយដែលថា ពួកគេបានបែកគ្នាទៅលើគំនិត ដែលចង់ឃើញរស់ឡើងវិញនូវគណបក្សសង្គ្រោះជាតិ។ ការរៀបចំសមាជនេះក៏ជាសញ្ញាមួយបញ្ជាក់ថា នយោបាយនៅក្នុងប្រទេសកម្ពុជាចុងក្រោយនេះវិវត្តទៅរកស្ថានភាពល្អប្រសើរពោលគឺលម្ហនយោបាយមិនត្រូវបានរឹតត្បិតទេ»៕
វីដេអូ៖
