ភ្នំពេញៈ តុលាការកំពូលនៅថ្ងៃទី ២៩ វិច្ឆិកា បានយកបណ្តឹងសារទុក្ខរបស់បុរសជនជាតិចិនតៃវ៉ាន់ម្នាក់មកជំនុំជម្រះ បន្ទាប់ពីត្រូវបានសាលាឧទ្ធរណ៍ភ្នំពេញតម្កល់ទោស ២២ ឆ្នាំពាក់ព័ន្ធនឹងអំពើជួញដូរគ្រឿងញៀនមេតំហ្វេតាមីន ៦៧៩,៦៥ ក្រាម ដែលសមត្ថកិច្ចឃាត់ខ្លួននៅ រាជធានីភ្នំពេញ កាលពី ខែកក្កដា ឆ្នាំ ២០១៣។
នៅក្នុងបន្ទប់សវនាការតុលាការកំពូលនៅថ្ងៃទី ២៩ វិច្ឆិកា ខណៈមានវត្តមានជនជាប់ចោទលោកចៅក្រម ឃឹម ប៉ុណ្ណ ជាប្រធានក្រុមប្រឹក្សាជំនុំជម្រះបានអានអង្គហេតុថា សំណុំរឿងនេះមានជនជាប់ចោទឈ្មោះលី តឹងស៊ាង ភេទប្រុស អាយុ ៥៩ ឆ្នាំ និងឈ្មោះចាង វិនជន ភេទប្រុស អាយុ៤០ឆ្នាំ និង ឈ្មោះឡ យ៉ុងមិញ ភេទប្រុស អាយុ ៣០ ឆ្នាំ។ ពួកគេជាជនជាតិចិនតៃវ៉ាន់។
លោកបន្តថា កាលពីខែ កក្កដា ឆ្នាំ ២០២១៣ ក្រុមជនសង្ស័យបានបើករថយន្តដល់ចំណុចភូមិត្រពាំងឈូក ក្នុងសង្កាត់ ទឹកថ្លា ខណ្ឌសែនសុខ ក៏ត្រូវបានកម្លាំងសមត្ថកិច្ច នៃមន្ទីរប្រឆាំងគ្រឿងញៀនដែលក្លែងធ្វើជាម៉ូយទិញគ្រឿងញៀនចាប់ខ្លួនពួកគេទាំង ៣ នាក់តែម្តង។
តាមអង្គហេតុរបស់តុលាការកំពូលបង្ហាញថា សំណុំរឿងនេះត្រូវបានសាលាដំបូងរាជធានីភ្នំពេញបើកសវនាការនៅថ្ងៃទី ៦ មិនា ឆ្នាំ ២០១៤ និងប្រកាសសាលក្រមនៅថ្ងៃទី ២៣ មិនា ឆ្នាំ ២០១៤ សម្រេចឱ្យឈ្មោះចាង វិនជន រួចខ្លួនពីបទចោទ។ ប៉ុន្តែតុលាការបានផ្តន្ទាទោសឈ្មោះឡ យ៉ុងមិញ ដាក់ពន្ធនាគារកំណត់រយៈពេល ២៥ ឆ្នាំ និងពិន័យប្រាក់ចូលរដ្ឋចំនួន ១០ លានរៀល និងឈ្មោះលី តឹងស៊ាង ដាក់ពន្ធនាគារកំណត់រយៈពេល ២២ ឆ្នាំ និងពិន័យប្រាក់ចូលរដ្ឋចំនួន ៤០ លានរៀល។
អង្គហេតុបន្តថា ដោយមិនសុខចិត្តនឹងសាលក្រមនេះក៏ត្រូវបានជនជាប់ចោទទាំង ២ នាក់នេះប្តឹងទាស់ទៅសាលាឧទ្ធរណ៍រាជធានីភ្នំពេញ ហើយសាលាឧទ្ធរណ៍ប្រកាសសាលដីកានៅថ្ងៃទី ៧ មេសា ឆ្នាំ២០២១ សម្រេចតម្កល់សាលក្រមរបស់សាលាដំបូងរាជធានីភ្នំពេញដដែល។ ប៉ុន្តែមានតែជនជាប់ចោទឈ្មោះលី តឹងស៊ាង តែម្នាក់ប៉ុណ្ណោះដែលប្តឹងសារទុក្ខមកតុលាការកំពូល។
នៅក្នុងបន្ទប់សវនាការនៅថ្ងៃទី ២៩ វិច្ឆិកា លោកមេធាវី វ៉ិត សុវណ្ណារ៉ា ការពារសិទ្ធិឱ្យឈ្មោះលី តឹងស៊ាង សន្និដ្ឋានថា កូនក្តីរបស់លោក ជាអ្នកស៊ីឈ្នួលបើករថយន្តដឹកភ្ញៀវ ដូច្នេះគាត់មិនជាប់ពាក់ព័ន្ធនឹងការជួញដូរគ្រឿងញៀនទេ។
លោកប្រាប់ចៅក្រមថា៖ «ពេលសមត្ថកិច្ចឆែកឆេរក្នុងរថយន្តមិនឃើញគ្រឿងញៀនទេ ហើយកាលពីនៅតុលាការថ្នាក់ក្រោមឈ្មោះឡ យ៉ុងមិញ ឆ្លើយទទួលខុសតែម្នាក់គាត់ទេ។ ខ្ញុំស្នើសុំឱ្យតុលាការកំពូលបង្វិលសំណុំរឿងទៅសាលាឧទ្ធរណ៍ជម្រះឡើងវិញ»។
លោកប៊ូ ប៊ុនហាង តំណាងមហាអយ្យការតុលាការកំពូល សន្និដ្ឋានថា សមត្ថកិច្ចបានចាប់ខ្លួនក្រុមជនសង្ស័យពេលប្រព្រឹត្តបទល្មើសជាក់ស្តែង។ ចំណែកឈ្មោះ លី តឹងស៊ាង បើទោះជាពេលសមត្ថកិច្ចចាប់មិនឃើញមានគ្រឿងញៀនក្តី តែពួកគេមានទំនាក់ទំនងគ្នាជាបណ្តាញ។
លោកថ្លែងថា៖«ខ្ញុំសូមស្នើដល់ក្រុមប្រឹក្សាជំនុំជម្រះតម្កល់សាលដីកា របស់សាលាឧទ្ធរណ៍ទុកដដែល ព្រោះបទល្មើសនេះវាធ្វើឱ្យប៉ះពាល់ខ្លាំងដល់សុវត្ថិភាព និងសន្តិសុខ សង្គម»។
ក្រោយពីជំនុំជម្រះមក លោកចៅក្រម ឃឹម ប៉ុណ្ណ បានថ្លែងថា សាលដីកានេះនឹងប្រកាសនៅថ្ងៃទី ១៣ ធ្នូ៕