ភ្នំពេញៈ សមាគមចាប៉ីអមត នឹងបង្ហាញទស្សនីយភាព នៃការសម្តែងចាប៉ីដងវែងជាក្រុមនៅភូមិថ្មីជង្រុក ឃុំយាអង្គ ស្រុកថ្ពង ខេត្តកំពង់ស្ពឺ នៅថ្ងៃទី៣០ ខែវិច្ឆិកា ដើម្បីចូលរួមអបអរសាទរខួប៥ឆ្នាំ នៃការដាក់បញ្ចូលចាប៉ីដងវែង ក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិ របស់អង្គការយូណេស្កូ ។
លោកពេជ្ជ សារ៉ាត ប្រធានសមាគមចាប៉ីអមត ថ្លែងនៅថ្ងៃទី២៩ ខែវិច្ឆិកាថា ការបង្ហាញទស្សនីយភាពនេះ មានការប្រមូលផ្តុំក្រុមសិល្បៈចាប៉ីដងវែង ៣ ជំនាន់ ក្នុងនោះមានជំនាន់ព្រឹទ្ធាចារ្យ ជំនាន់យុវវ័យ និងជំនាន់កុមារបន្តវេន។ ការសម្តែងនេះ ធ្វើឡើង ដើម្បីអបអរសាទរខួប៥ឆ្នាំ នៃការដាក់បញ្ចូលចាប៉ីដងវែងរបស់កម្ពុជាទៅក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិ របស់អង្គការយូណេស្កូ។
លោកប្រធានសមាគមបញ្ជាក់ថា មុនកម្មវិធីសម្តែងទស្សនីយភាព ដែលចាប់ផ្តើមពីម៉ោង ៩ ដល់ម៉ោង ១១ ព្រឹកនោះ នឹងមានការលេងល្បែងប្រជាប្រិយច្នៃប្រឌិតថ្មីមួយហៅថា ចម្រើនចាប៉ីដងវែង សម្រាប់លេងកម្សាន្តមុននឹងក្រុមសិល្បៈជំនាន់ព្រឹទ្ធាចារ្យ យុវវ័យ និងជំនាន់កុមារធ្វើការសម្តែងទស្សនីយភាព។ ក្នុងនោះ ក៏មានការស្ម័គ្រចិត្តពីយុវជនល្ខោនខោលចូលរួមលើកទស្សនីយភាពល្ខោនខោលចូលរួមកម្មវិធីផងដែរ។
បើតាមលោកពេជ្ជ សារាត លោកកត់សម្គាល់ឃើញថា យុវជនសម័យថ្មី មិនសូវមានការជួបជុំជជែកអំពីចាប៉ីដងវែង ឬសិល្បៈបុរាណផ្សេងៗនោះទេ។ ហេតុនេះក្នុងការរៀបចំសម្តែងដោយដាក់បញ្ចូលទាំងព្រឹទ្ធាចារ្យ និងកុមារបែបនេះ ព្រោះសិល្បៈបុរាណខ្មែរស្ថិតក្នុងដៃយុវជនបច្ចុប្បន្ន ហើយយុវជនគួរតែជួបជុំគ្នា ពិភាក្សាគ្នា អំពីវប្បធម៌សិល្បៈបុរាណខ្មែរ។
លោកថ្លែងថា៖«ខ្ញុំលើកទឹកចិត្តឱ្យកុមារចូលរួម ព្រោះកុមារគឺជាទំពាំងស្នងឫស្សី គឺជាអ្នកបន្តវេនរបស់មរតកវប្បធម៌ខ្មែរ។ បើសិនជាទៅថ្ងៃអនាគតយើងមានការបាត់បង់ ឬមានការមិនគាំទ្រ ឬការគាំទ្រតិចទៅៗ មានតែយុវជន និងកុមារបច្ចុប្បន្នហ្នឹងហើយ ដែលជាអ្នកទទួលកាតព្វកិច្ចលើកស្ទូយបន្ត»។
លោកពេជ្ជ សារាត ឱ្យដឹងទៀតថា ការម្តែងទស្សនីយភាពនេះនឹងមានលេងបទថ្វាយគ្រូ ថ្វាយព្រះពិស្នុកា ដែលលេងជាបទផាត់ជាយជុំគ្នាក្នុងពេលតែមួយ។ ជាមួយគ្នានោះមានការរំលេចនូវព្រឹទ្ធាចារ្យ យុវជន ជាពិសេសកុមារ ដែលមានការច្រៀងបទឡាឌីត្រា ដោយសម្តែងផ្ទាល់ក្នុងការប្រគុំចាប៉ីដងវែងអមជាមួយចម្រៀងជាក្រុមតែម្តង។ ក្នុងកម្មវិធីនោះ ក៏មានការដាក់បង្ហាញចាប៉ីដងវែងចំនួន ២១ ចាប៉ី ដែលមានខ្នាតកុមារ ខ្នាតនារី និងខ្នាតបុរសផងដែរ។
លោក ស៊ុប ស័ក្ខរា ប្រធានក្រុមសិល្បៈហ្វូណនថ្លែងថា ការបង្ហាញទស្សនីយភាពនេះ គឺជាចំណុចចាប់ផ្តើមដ៏ល្អមួយ ព្រោះកាលណាមានកម្មវិធីអបអរការរំឭកខួបបែបនេះ នឹងមានអ្នកចូលរួម។ អ្នកចូលរួមទាំងនោះអាចមើលនូវអ្វី ដែលក្រុមសិល្បៈបានបង្ហាញ ដែលជាហេតុធ្វើឱ្យមានការចាប់អារម្មណ៍ក្នុងការរៀនពីសិល្បៈបុរាណខ្មែរ។ ជាក់ស្តែងដូចជាការសម្តែងទស្សនីយភាពចាប៉ីដងវែងនេះអ្នករៀបចំអាចបង្ហាញទ្រង់ទ្រាយ ជាដើមចម្រៀងទៅដល់អ្នកទស្សនា។
លោកថ្លែងថា៖ «យើងអាចបង្ហាញពីចម្រៀងចាប៉ី បង្ហាញពីចាប៉ី ប្រវត្តិចាប៉ី ឱ្យអ្នកដែលចូលរួមដូចជាយុវជនជាដើមហ្នឹងបានស្គាល់ បានដឹងកាន់តែច្បាស់។ អ៊ីចឹងវាជាចំណុចមួយអាចធ្វើឱ្យគាត់មានចំណាប់អារម្មណ៍ ចង់ស្វែងយល់បន្ថែមគាត់នឹងអាចចាប់ផ្តើមហាត់រៀន ឬទៅរៀនជាមួយនឹងគ្រូដែលមានជំនាញខាងហ្នឹង»។
លោកថា ដើម្បីឱ្យយុវជនជំនាន់ថ្មីមានការចូលរួមគាំទ្រដល់សិល្បៈបុរាណខ្មែរឱ្យកាន់តែច្រើនឡើងវិញនោះ គឺអាស្រ័យទៅលើការយកចិត្តទុកដាក់ពីថ្នាក់ដឹកនាំនៃជំនាញខាងសិល្បៈបុរាណ ថាតើត្រូវមានការរៀបចំយ៉ាងណា ការជំរុញយ៉ាងម៉េច និង កត្តាអប់រំដោយរបៀបណា។
លោកថ្លែងថា៖«ព្រោះកាលណាអ្នកមើលអត់ស្គាល់ទេ គាត់មិនដឹងថា ចូលរួមគាំទ្រយ៉ាងម៉េច។ បើមានថ្នាក់បណ្តុះបណ្តាលទៅតាមភូមិឃុំ ឬតាមសាលារៀនបញ្ជ្រាបឱ្យគាត់បានយល់ បានដឹងប្រហែលអាចមានការគាំទ្រកាន់តែច្រើន»។
លោកស៊ីយ៉ុន សុភារិទ្ធ អគ្គនាយក នៃអគ្គនាយកដ្ឋានបច្ចេកទេសវប្បធម៌ ថ្លែងនៅថ្ងៃទី ២៩ ខែវិច្ឆិកាថា ការដែលសហគមន៍ អ្នកប្រតិបត្តិករ អ្នកសិល្បករជាដើមបានលើកតម្កើងសិល្បៈបុរាណខ្មែរ ក្រសួងគាំទ្រទាំងស្រុងចំពោះសកម្មភាពទាំងអស់នោះ។ ក្រសួងវប្បធម៌ក៏ជំរុញឱ្យសហគមន៍ដែលមានមរតកវប្បធម៌អរូបីទាំងអស់នោះរក្សានិងធ្វើការពង្រីកឱ្យបានទូលំទូលាយ។ ចំណែកក្រសួង ក៏មានការជួយទៅតាមលទ្ធភាពដែលមានផងដែរ។ ក្រសួងវប្បធម៌ បានធ្វើការផ្សព្វផ្សាយក្នុងទម្រង់ហៅថា រាត្រីចងចាំ កាលពីថ្ងៃទី ២៨ ខែវិច្ឆិកា ដែលបង្ហោះផ្សាយតាមបណ្តាញសង្គមហ្វេសប៊ុក និងស្ថានីយទូរទស្សន៍ផ្សេងៗបានយ៉ាងទូលំទូលាយ។ ក្រសួងវប្បធម៌ក៏បានស្នើសុំដល់អ្នកដែលចេះសិល្បៈអរូបីនៅតាមបណ្តាខេត្តទាំងអស់ ឱ្យយកស្នាដៃរបស់ខ្លួនទៅបណ្តុះបណ្តាលនៅតាមសហគមន៍ដែលខ្លួនរស់នៅផងដែរ។
បើតាម លោក ស៊ីយ៉ុន សុភារិទ្ធ ក្រសួងវប្បធម៌ក៏មានគម្រោងទាក់ទាញទឹកចិត្តឱ្យមានការចូលរួមផងដែរ ក្រោយសង្កេតឃើញថា មានការចូលរួមខ្លាំងជាងមុន បន្ទាប់ពីមានការដំឡើងស្នាដៃចំនួន ២ គឺ ការដេញចាប៉ីលេងជារឿង ដែលមានរឿងសុណ្ណសាម និងរឿង សុបិនកុមារ។
លោកថ្លែងថា៖«រឿងហ្នឹងមានការគាំទ្រច្រើនគឺយើងឱ្យគេដេញចាប៉ីទៅ យើងលេងជាល្ខោន ជាការបង្កើតថ្មី។ ទម្រង់ចាប៉ីនៅតែជាទម្រង់ គឺយើងរក្សាប្រភេទចាប៉ីហ្នឹងរបៀបរបប នៃការសម្តែងចាប៉ីហ្នឹង ឱ្យនៅដដែល។ ទន្ទឹមគ្នាហ្នឹង គឺយើងជំរុញឱ្យមានការទាក់ទាញចូលមើលថា ចាប៉ីហ្នឹងយ៉ាងម៉េច»៕