ភ្នំពេញៈ ក្រុមអ្នកគាំទ្រលោក សម រង្ស៊ី និងលោក កឹម សុខា បានបញ្ចេញមតិយកត្រូវ និងផ្លោងសម្តីតាមបណ្តាញសង្គម គាំទ្រសកម្មភាពមេដឹកនាំរៀងៗខ្លួន ក្រោយពីលោក កឹម សុខា បានប្រកាស និងអំពាវនាវដល់ដៃគូនយោបាយរបស់ខ្លួន លោក សម រង្ស៊ី កុំឱ្យយកឈ្មោះរបស់លោកទៅប្រើប្រាស់ ដើម្បីកេងចំណេញ និងផលប្រយោជន៍។
លោក មុត ចន្ថា មនុស្សស្និទ្ធនឹងលោក កឹម សុខា សរសេរលើទំព័រហ្វេសប៊ុករបស់លោកនៅថ្ងៃទី ២៩ វិច្ឆិកា ថា លោក សម រង្ស៊ី ខ្លួនឯងជាអ្នក ដែលបានរុះរើផ្ទះសង់រួមគ្នាជាមួយលោក កឹម សុខា និងវេចបង្វេចចុះចេញពីផ្ទះដោយបើកចំហទៅកសាងផ្ទះថ្មីជាមួយអតីតគ្រួសារវិញ គឺ «គណបក្សភ្លើងទៀន» ដែលត្រូវបានធ្វើសមាជកាលពីថ្ងៃទី ២៧ ខែវិច្ឆិកា ឆ្នាំ ២០២១។
លោក មុត ចន្ថា បន្តថា លោក កឹម សុខា ស្នើឱ្យលោក សម រង្ស៊ី និងក្រុមរបស់គាត់បញ្ឈប់យកឈ្មោះ និងរូបថតរបស់គាត់ទៅប្រើប្រាស់តទៅទៀត ដើម្បីមហិច្ឆតានយោបាយរបស់ពួកគេ។ នេះជាការទាមទារត្រឹមត្រូវបំផុតពីជនរងគ្រោះ គឺលោក កឹម សុខា ដែលមិនអនុញ្ញាតឱ្យភាគីល្មើសបន្តកេងប្រវ័ញ្ចផលប្រយោជន៍របស់គាត់តទៅទៀត។
លោក មុត ចន្ថា ថ្លែងថា៖ «គណបក្សភ្លើងទៀនដំណើរការឡើងវិញ ស្មើនឹងលោក សម រង្ស៊ី ដកខ្លួនចេញពីអតីតគណបក្សសង្គ្រោះជាតិ ព្រោះបើសិនគ្មានគណបក្សភ្លើងទៀនស្ថិតក្នុងអតីតគណបក្សសង្គ្រោះជាតិ គឺលោក សម រង្ស៊ី គ្មានគណបក្សតំណាងទៀតទេ។ ផ្ទុយទៅវិញមានតែគណបក្សសិទ្ធិមនុស្សតែ ១ គត់ស្ថិតក្នុងអតីតគណបក្សសង្គ្រោះជាតិ»។
លោក ប៉ាង សុខឿន អ្នកគាំទ្រលោក សម រង្ស៊ី នៅឯក្រៅប្រទេសឱ្យដឹងនៅថ្ងៃទី ២៩ ខែវិច្ឆិកាដែរថា បើគ្មានលោក សម រង្ស៊ី បក្សសង្គ្រោះជាតិ និងអ្នកគាំទ្រស្លាប់ ១០០%។ រឿងបក្សភ្លើងទៀនធ្វើសមាជ មិនមានអ្វីខុសទេ ព្រោះថា សកម្មជនទាំងអស់ដែលមិនអាចធ្វើសកម្មភាពក្នុងបក្សសង្គ្រោះជាតិបានអាចទៅធ្វើសកម្មភាពក្នុងបក្សភ្លើងទៀនបាន ឬក៏បក្សសិទ្ធិមនុស្សបាននាពេលនេះ។
លោកថ្លែងថា៖ «បើមិនធ្វើអីសោះ នោះយើងនឹងស្លាប់ ដោយយើងមិនអាចចងកម្លាំងបាន។ មិនអាចពង្រឹងស្មារតីសាមគ្គីភាពគ្នាបាន និងមិនអាចទប់សកម្មភាពបក្សកាន់អំណាចបានទេ។ យើងអាចធ្វើសកម្មភាពនៅបក្សផ្សេង ឬបក្សដើមបានតាមចិត្តបងប្អូន។ តែដល់ពេលយើងបានសង្គ្រោះជាតិមកវិញ យើងវិលមករួមគ្នាវិញទៅ គឺចប់ហើយ»។
លោកថា អ្វីដែលសំខាន់បំផុត គឺលោក សម រង្ស៊ី តែងណែនាំថ្នាក់ដឹកនាំ និងអ្នកគាំទ្របក្សឱ្យសាមគ្គីគ្នា ពង្រឹងស្មារតី កឹម សុខា សម រង្ស៊ី តែមួយ និងហាមមិនឱ្យតបតជាមួយមនុស្សលោក កឹម សុខា មួយចំនួនដែលតែងតែវាយប្រហាររូបគាត់ថែមទៀត ហើយលើកទឹកចិត្តអ្នកគាំទ្រឱ្យបន្តគោរពស្រឡាញ់លោក កឹម សុខា ទៅទៀតដើម្បីជាតិ។
កាលពីថ្ងៃទី ២៨ វិច្ឆិកា សារដែលគួរឱ្យភ្ញាក់ផ្អើល ១ ត្រូវបានបង្ហោះនៅលើទំព័រហ្វេសប៊ុកលោក កឹម សុខា ដោយអំពាវនាវឱ្យដៃគូនយោបាយរបស់ខ្លួន គឺលោក សម រង្ស៊ី បញ្ឈប់ការយកឈ្មោះ និងរូបថតលោក កឹម សុខា ទៅប្រើប្រាស់ភ្ជាប់ជាមួយមហិច្ឆតានយោបាយរបស់ខ្លួនដែលធ្វើឱ្យសាធារណមតិជាតិ និងអន្តរជាតិមានការភាន់ច្រឡំ។
លោក ឯម សុវណ្ណារ៉ា សាស្ត្រាចារ្យវិទ្យាសាស្ត្រនយោបាយថ្លែងថា លោក កឹម សុខា និងលោក សម រង្ស៊ី មានភាពរកាំរកូសអស់រយៈពេលជាយូរ និងមានការប្រកាសជាផ្លូវការរបស់លោក កឹម សុខា តាមហ្វេសប៊ុកនៅពេលនេះ វានឹងធ្វើឱ្យមានការបាត់កម្លាំង និង តម្លៃនៃការកៀរគរ និងគាំទ្ររបស់ប្រជាពលរដ្ឋ។ ព្រោះចំនួននៃការគាំទ្ររបស់លោក កឹម សុខា នៅមានកម្រិត និងមិនមានតម្លៃពេញលេញស្មើនឹងលោក សម រង្ស៊ី ទេ។
លោកថា លោកមិនឯកភាពចំពោះការលើកឡើងពាក់ព័ន្ធនឹងការធ្វើសមាជរបស់បក្សភ្លើងទៀន បណ្តាលឱ្យមានការបែកបាក់រវាងលោក កឹម សុខា និងលោក សម រង្ស៊ី ទេ។ ព្រោះគណបក្សដែលរួបរួមគ្នា គឺគណបក្សភ្លើងទៀន និងគណបក្សសិទ្ធិមនុស្សនៅទាំង ២ ប៉ុន្តែគណបក្សមួយមានសកម្មភាពច្រើនជាងគណបក្សមួយទៀតតែប៉ុណ្ណោះ។
លោកថ្លែងថា៖ «អ៊ីចឹងចំពោះការចោទប្រកាន់ពីភាគីម្ខាងចំពោះ ភាគីម្ខាងទៀតហ្នឹង នេះគ្រាន់តែជាអ្នកលើកឡើងរបស់អ្នកគាំទ្រ និងអ្នកនយោបាយទេ។ ប៉ុន្តែបើគិតពីតម្លៃនយោបាយដែលទទួលបានក្នុងពេលបោះឆ្នោតនៅឆ្នាំ ២០១៧ គួរតែគិតគូរពីការបែកបាក់នេះ ដោយមិនគួរឱ្យមានការបែកបាក់ ឬប្រេះស្រាំរបស់មេដឹកនាំគណបក្សសង្គ្រោះជាតិទេ ហើយបែកគ្នាមានតែខាត»។
លោកស្នើទៅអ្នកនយោបាយ និងអ្នកគាំទ្រមេដឹកនាំកំពូលទាំង ២ កុំបន្តសាចទឹកដាក់គ្នា ហើយស្វែងរកការពិភាក្សាដូចកាលពីឆ្នាំ ២០១២ និង ២០១៣ ដែលអាចបង្កើតកម្លាំងរួមមួយបាន ហើយឈានទៅរកការប្រកួតប្រជែងនឹងគណបក្សកាន់អំណាច។ ប៉ុន្តែ បើមិននិយាយគ្នាទេការកៀរគរពីអ្នកគាំទ្រ គឺស្ថិតក្នុងភាពលំបាកយកបាន។
លោក សម រង្ស៊ី ប្រធានស្តីទីអតីតបក្សសង្គ្រោះជាតិ កាលពីថ្ងៃទី ២៨ វិច្ឆិកា បញ្ជាក់ថា សេចក្តីថ្លែងការណ៍លោក កឹម សុខា គឺជាលទ្ធផលនៃការគំរាមកំហែងពីលោក ហ៊ុន សែន ដែលភ័យខ្លាចជាទីបំផុត ចំពោះឯកភាពនៃអ្នកប្រជាធិបតេយ្យខ្មែរ ហើយដែលចាប់យកលោក កឹម សុខា ធ្វើជាចំណាប់ខ្មាំងរបស់គាត់។
ប៉ុន្តែទោះយ៉ាងណាក្រុមគាំទ្រគណបក្សសង្គ្រោះជាតិប្រចាំនៅសហរដ្ឋអាមេរិក (CNRP-USA) កាលពីថ្ងៃទី ២៦ ខែវិច្ឆិកា បានចេញសេចក្ដីថ្លែងការណ៍អានាមិកចែកចាយតាមបណ្តាញសង្គម ដោយបានកត់សម្គាល់ឃើញថា នាពេលកន្លងមក និងពេលថ្មីៗនេះលោក សម រង្ស៊ី និងក្រុមអ្នកនយោបាយគ្នីគ្នាគាត់ នៅតែបន្តប្រព្រឹត្តច្រំដែល និងតភ្លើងឡើងៗដោយបានប្រើប្រាស់ឈ្មោះ និងរូបភាពលោក កឹម សុខា និងពាក្យស្លោកថា «សម រង្ស៊ី និងកឹម សុខា ជាមនុស្សតែមួយ» សម្រាប់បំភាន់ និងបិទបាំងទង្វើទុច្ចរិត ដើម្បីកេងចំណេញប្រយោជន៍បុគ្គល និងបក្ខពួករបស់ខ្លួនជាបន្តបន្ទាប់។
សេចក្តីថ្លែងការណ៍នេះបានសរសេរថា៖ «លោក សម រង្ស៊ី និងបក្ខពួកបានចាកចេញទៅបង្កើតចលនាខុសច្បាប់ លើកបន្តុបតួនាទីខ្លួនឯង ប្រមាថព្រះមហាក្សត្រ និងពេលថ្មីៗនេះបានប្រកាសគាំទ្រគណបក្សនយោបាយផ្សេង ដែលបញ្ជាក់ឱ្យឃើញកាន់តែច្បាស់នូវទង្វើប្រាសចាក និងដើរផ្ទុយពីស្មារតីដើមនៃការរួបរួមជាមួយលោក កឹម សុខា តទៅទៀតហើយ»។
ក្រុមនេះបានអំពាវនាវជាថ្មីម្តងទៀតដល់លោក សម រង្ស៊ី និងបក្ខពួកបញ្ឈប់ជាបន្ទាន់នូវការយកឈ្មោះ និងរូបភាពលោក កឹម សុខា និង ពាក្យស្លោកថា «សម រង្ស៊ី និង កឹម សុខា ជាមនុស្សតែមួយ» ទៅប្រើដើម្បីបំភាន់ និងបិទបាំងទង្វើទុច្ចរិតរបស់ពួកខ្លួនតទៅទៀត។
ដោយឡែកក៏មានប្រជាពលរដ្ឋខ្មែរប្រមាណ ៥០ នាក់ដែលកំពុងរស់នៅទីក្រុងឡូវែល សហរដ្ឋអាមេរិកបាននាំគ្នាលើកបដា ធ្វើបាតុកម្មប្រឆាំងនឹងលោក សម រង្ស៊ី ដែលឃោសនាបោកប្រាស់ចង់ឱ្យអាមេរិកដកសញ្ជាតិអ្នកគាំទ្រគណបក្សប្រជាជនកម្ពុជានៅសហរដ្ឋអាមេរិក។ ក្នុងបដាដែលពួកគេទាំងនោះកាន់បានសរសេរថា «ទណ្ឌិត សម រង្ស៊ី គឺជាជនក្បត់ជាតិខ្មែរ»។ «សម រង្ស៊ី ជាជនបោកប្រាស់លុយខ្មែរ អាមេរិក»។ «សម រង្ស៊ី ឈប់ធ្វើបាបជនជាតិខ្មែរ សញ្ជាតិអាមេរិក» និង «ទណ្ឌិត សម រង្សី ជាអ្នកនយោបាយក្លែងក្លាយ» ជាដើម៕
វីដេអូ៖