ភ្នំពេញៈ នគរបាលជំនាញនៅមន្ទីរប្រឆាំងបទល្មើសគ្រឿងញៀននៃអគ្គស្នងការដ្ឋាននគរបាលជាតិបានបញ្ជូនជនសង្ស័យ ៣ នាក់ទៅសាលាដំបូងរាជធានីភ្នំពេញនៅថ្ងៃ ២៩ វិច្ឆិកា ក្រោយពីចាប់ខ្លួននៅភ្នំពេញពីថ្ងៃ ២៥ វិច្ឆិកា ករណីកែច្នៃ និងជួញដូរគ្រឿងញៀនជិត ២៥ គីឡូ។
លោកឧត្តមសេនីយ៍ទោ អ៊ិន សុង អ្នកនាំពាក្យមន្ទីរប្រឆាំងបទល្មើសគ្រឿងញៀនថ្លែងថា សមត្ថកិច្ចបានបញ្ជូនជនសង្ស័យ ៣ នាក់នោះទៅសាលាដំបូងរាជធានីភ្នំពេញនៅព្រឹកថ្ងៃទី ២៩ ខែវិច្ឆិកា ក្រោយចាប់ខ្លួនបាន។
លោកប្រាប់ថា ពួកគេត្រូវបានចាប់ខ្លួននៅគោលដៅ ២ ផ្សេងគ្នាដោយមានការសម្របសម្រួលពីលោក អ៊ុ សុភក្តិ ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ។
ក្នុងនោះគោលដៅទី ១ នៅផ្លូវលេខ ១០៥ ជិតផ្សារបឹងត្របែកក្នុងសង្កាត់បឹងត្របែក ខណ្ឌចំការមន និងគោលដៅទី ២ នៅផ្ទះលេខ ៩៩ ផ្លូវ ១៤៦ ក្រុម ៣ ភូមិ ២ សង្កាត់ផ្សារដេប៉ូ ២ ខណ្ឌទួលគោក រាជធានីភ្នំពេញ។
លោកថា៖ «ក្រុមនេះជាក្រុមជួញដូរក្នុងស្រុក និងមួយចំនួនគឺមានឆ្លងទៅវៀតណាមផងដែរ។ ការចាប់នេះគឺសមត្ថកិច្ចចាប់នៅនឹងកន្លែងកែច្នៃតែម្តង»។
លោកបានប្រាប់ថា ទាំង ៣ នាក់នោះ មានខ្មែរម្នាក់ វៀតណាមម្នាក់ និងសិង្ហបុរីម្នាក់។
រីឯវត្ថុតាងមានគ្រឿងញៀនអិចស្តាស៊ីទម្ងន់សុទ្ធជាង ២៤ គីឡូ ប្រភេទកេតាមីន ទម្ងន់សុទ្ធ ១១៨,៣៩ ក្រាម និងប្រភេទកាទីណូន (4CEC) ទម្ងន់សុទ្ធ ១៧០,៥១ ក្រាម។ សរុបសារធាតុញៀនទម្ងន់សុទ្ធ ២៤ គីឡូក្រាម និង ៣៣០,៩០ ក្រាមសារធាតុផ្សំជាង ១ គីឡូ ជញ្ជីងថ្លឹង ៥ គ្រឿង និងឧបករណ៍។
លោក ប្លង់ សុផល ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងរាជធានីភ្នំពេញបានឱ្យដឹងថាជនសង្ស័យទាំង ៣ នាក់កំពុងស្ថិតក្នុងការស៊ើបអង្កេត តែមិនទាន់មានការសម្រេចយ៉ាងណាទេ៕