.jpg)
លោក ស ខេង រដ្ឋមន្ត្រីក្រសួងមហាផ្ទៃថ្លែងថា ការបង្កើតច្រកចេញ-ចូលតែ ១ អាចកាត់បន្ថយអំពើពុករលួយ។ រូបថត Sar Kheng Page
ភ្នំពេញៈ រដ្ឋមន្ត្រីក្រសួងមហាផ្ទៃលោក ស ខេង អះអាងថា ការបង្កើតឱ្យមានការិយាល័យច្រកចេញ-ចូលតែ ១ អាចរួមចំណែកកាត់បន្ថយអំពើពុករលួយ និងបង្កលក្ខណៈងាយស្រួលក្នុងការបម្រើផលប្រយោជន៍ដល់ពលរដ្ឋមូលដ្ឋាន ហើយលោកបានបញ្ជាក់ថា នឹងជំរុញឱ្យបង្កើតនៅគ្រប់ស្រុកទូទាំងប្រទេស។
ការអះអាងនេះបានធ្វើឡើងក្នុងឱកាសរដ្ឋមន្ត្រីក្រសួងមហាផ្ទៃលោក ស ខេង បានដឹកនាំគណៈប្រតិភូ និងលោក Christian Berger ឯកអគ្គរដ្ឋទូតសហព័ន្ធអាល្លឺម៉ង់ប្រចាំនៅកម្ពុជា ចុះត្រួតពិនិត្យការិយាល័យច្រកចេញ-ចូលតែ ១ នៅស្រុកកៀនស្វាយ ខេត្តកណ្តាល និងការចុះត្រួតពិនិត្យកន្លែងបណ្តុះបណ្តាលនគរបាលនៃរាជបណ្ឌិត្យសភានគរបាលកាលពីថ្ងៃទី ២៩ ខែវិច្ឆិកា ឆ្នាំ ២០២១។
មានប្រសាសន៍ប្រាប់អ្នកសារព័ត៌មានក្រោយចុះត្រួតពិនិត្យ លោក ស ខេង បានថ្លែងថា លោកនឹងខិតខំអនុវត្តគោលនយោបាយរបស់រាជរដ្ឋាភិបាលក្នុងការធ្វើឱ្យជីវភាពរស់នៅរបស់ប្រជាពលរដ្ឋកាន់តែប្រសើរឡើង។ លោកបានបញ្ជាក់ថា កាលមិនទាន់មានការិយាល័យចេញ-ចូលតែ ១ ប្រជាពលរដ្ឋមានផលលំបាកក្នុងការស្វែងរកសេវាពីអាជ្ញាធរហើយអាចជួបបញ្ហាពុករលួយថែមទៀតផង។
លោកថា៖ «មែនទែនទៅច្រកចេញ-ចូលតែ ១ គាំទ្រទៅនយោបាយនោះគឺបង្កលក្ខណៈងាយស្រួលដល់ពលរដ្ឋកុំឱ្យគាត់ពិបាកក្នុងការធ្វើដំណើរចុះឡើង ចំណាយពេលវេលា ពេលខ្លះ ១ ខែដល់ ៣ ខែអត់មានព័ត៌មានហើយអត់បានសេវាទៀត ជួនអីមានអំពើអសកម្មភាពផ្សេងពុករលួយថែមទៀតវាជាបញ្ហា»។
បន្ថែមពីនេះលោក ស ខេង បានអះអាងថា ក្នុងករណីមន្ត្រីបម្រើការងារនៅការិយាល័យច្រកចេញ-ចូលតែ ១ មិនបានបម្រើប្រជាពលរដ្ឋដោយយកចិត្តទុកដាក់ ពលរដ្ឋអាចមានសិទ្ធិប្តឹងតវ៉ានៅការិយាល័យ ១ ទៀតគឺការិយាល័យទទួលពាក្យបណ្តឹង ឬការិយាល័យប្រជាពលរដ្ឋ។
បើតាមលោក ស ខេង ការិយាល័យច្រកចេញ-ចូលតែ ១ នេះនឹងធ្វើនៅគ្រប់ស្រុកខេត្ត-ខណ្ឌ ទូទាំងប្រទេស ខណៈខេត្តក្រុងខ្លះបានធ្វើគ្រប់ស្រុកអស់ហើយ មានដូចជា នៅរាជធានីភ្នំពេញ ខេត្តកណ្តាលកំពង់ចាម និងខេត្តបាត់ដំបង។
ចំណែកខេត្តមួយចំនួនមានត្រឹមតែការិយាល័យច្រកចេញ-ចូលតែ ១០ ទៅ ២០ ភាគរយប៉ុណ្ណោះ ខណៈលោកនឹងជំរុញឱ្យបានដល់ ៥០ ភាគរយនៅគ្រប់ស្រុកទូទាំងប្រទេស។
ស្រដៀងគ្នានេះលោក Christian Berger ឯកអគ្គរដ្ឋទូតសហព័ន្ធអាល្លឺម៉ង់ប្រចាំនៅកម្ពុជា ក៏បានថ្លែងដែរថា ការបង្កើតឱ្យមានការិយាល័យចេញ-ចូលតែ ១ ពិតជាចំណុចល្អក្នុងការផ្តល់សេវាដល់ប្រជាពលរដ្ឋមូលដ្ឋាន។ លោកបន្តថាអ្វីដែលកាន់តែពិសេស គឺទីកន្លែងនេះមានការិយាល័យដាក់ពាក្យបណ្តឹងតវ៉ាពីប្រជាពលរដ្ឋថែមទៀត។ លោកថា៖ «ចំណុច ១ ទៀតល្អនៅពេលមានការិយាល័យមួយនេះ ប្រជាពលរដ្ឋមានបណ្តឹងអ្វីគាត់ដាក់បានភ្លាម»។
ប្រជាពលរដ្ឋ ១ រូបដែលធ្លាប់ទៅរកសេវានៅការិយាល័យច្រកចេញ-ចូលតែ ១ ក្នុងភូមិសាស្ត្ររាជធានីភ្នំពេញ លោក សាន សៃ បានថ្លែងថា៖ «ខ្ញុំធ្លាប់ទៅបញ្ជាក់សញ្ញាបត្រនៅខណ្ឌឫស្សីកែវគឺមានភាពងាយស្រួលដោយមន្ត្រីគាត់រួសរាយហើយតម្លៃកំណត់ប៉ុនណាគាត់យកប៉ុណ្ណឹងនៅទីនោះមានកំណត់តម្លៃ និងកំណត់ពេលច្បាស់លាស់ បើឯកសារខ្លះយូរ ខ្លះលឿន ប៉ុន្តែអាស្រ័យថាយើងចង់ទៅរកសេវាអី»។
តំណាងរដ្ឋបាលនៅការិយាល័យច្រកចេញ-ចូលតែ ១ ស្រុកកៀនស្វាយបានឱ្យដឹងថា ក្នុងការិយាល័យផ្តល់សេវាគ្របដណ្តប់ជាង ១០ វិស័យស្មើនឹង ៣១១ សេវារួមមាន ផ្នែកនីត្យានុកូលកម្ម រដ្ឋបាល អត្រានុកូលដ្ឋាន ការងារផ្ទេរសិទ្ធិកាន់កាប់ដីធ្លី ពាណិជ្ជកម្ម ឧស្សាហកម្ម រ៉ែ និងថាមពល សំណង់ វប្បធម៌និងវិចិត្រសិល្បៈ ទេសចរណ៍ អប់រំ យុវជន និងកីឡា សុខាភិបាល និងសិប្បកម្មជាដើម។ តំណាងរដ្ឋបាលរូបនោះបានឱ្យដឹងទៀតថា ក្នុង ១ ឆ្នាំការិយាល័យរកចំណូលបានជាង ៥០ លានរៀលបង់ចូលរដ្ឋ និងបែងចែកតាមគោលការណ៍។
យ៉ាងណាក្ដី នាយកប្រតិបត្តិអង្គការតម្លាភាពកម្ពុជាលោក ប៉ិច ពិសី បានថ្លែងកាលពីថ្ងៃទី ២៩ វិច្ឆិកា ថា តាមការសង្កេតបើទោះបីមានការបង្កើនកន្លែងផ្តល់សេវាសាធារណៈ [ច្រកចេញ-ចូលតែ ១] នៅគ្រប់កន្លែងក្តី ប៉ុន្តែមានប្រជាពលរដ្ឋនៅតែជួបបញ្ហាមួយចំនួន។
លោកថា៖ «សេវាសាធារណៈយើងឃើញថានៅបន្តមានបញ្ហាទាក់ទងការិយាធិបតេយ្យ ភាពស្មុគស្មាញផ្នែកនីតិវិធីរដ្ឋបាល ភាពមិនប្រក្រតីអាចជាអំពើពុករលួយធ្វើឱ្យរាំងស្ទះឬក៏យឺតយ៉ាវដល់ដំណើរការផ្តល់សេវា»៕
