ព្រះសីហនុៈ ក្រសួងទេសចរណ៍ និងក្រុមហ៊ុនកូកាកូឡាបានរៀបចំវគ្គបណ្តុះបណ្តាលស្តី ពីការអនុវត្តវិធានសុវត្ថិភាពអនាម័យម្ហូបអាហារនិងសេវាកម្មដឹកជញ្ជូនផ្លូវគោក និងផ្លូវទឹកដល់អ្នកប្រតិបត្តិករទេសចរណ៍នៅខេត្តព្រះសីហនុ ខណៈភ្ញៀវទេសចរសម្រុកទៅលេងខេត្តដែលសម្បូរតំបន់ទេសចរណ៍នេះច្រើន។
កម្មវិធីបណ្តោះបណ្តាលនេះត្រូវបានធ្វើឡើងដាច់ដោយឡែកពីគ្នាខណៈកាលពីថ្ងៃទី ២៩ ខែវិច្ឆិកា អ្នកលក់អាហារនៅតាមដងផ្លូវចំនួន ៥៥ នាក់ បានចូលរួមក្នុងវគ្គបណ្តុះបណ្តាលស្តីពីចំណេះដឹងផ្នែកអនាម័យ និងបដិសណ្ឋារកិច្ច។ ចំណែកថ្ងៃទី ៣០ ខែវិច្ឆិកា ក្រសួងបានបើកវគ្គបណ្តុះបណ្តាល ស្តីពីសេវាកម្មដឹកជញ្ជូនផ្លូវទឹក និងផ្លូវគោក ដែលមានអ្នកចូលរួម ៣៦ នាក់។
លោក តាំង សុចិត្រគ្រឹស្នា ប្រធានមន្ទីរទេសចរណ៍ខេត្តព្រះសីហនុ បានថ្លែងថា ការរៀបចំវគ្គបណ្តុះបណ្តាលទាំងនេះពិតជាមានសារៈសំខាន់ណាស់ដើម្បីធ្វើយ៉ាងណាឱ្យពួកគាត់ទទួលបាននូវការ ការរៀបចំសណ្តាប់ធ្នាប់ខ្លួនប្រាណ អនាម័យ និងការផ្តល់នូវសេវាកម្មទេសចរណ៍ឱ្យបានត្រឹមត្រូវមិនថា អ្នកលក់តាមរទះ លក់តាមហាងតូច ធំ គឺចាំបាច់ត្រូវតែឱ្យមានអនាម័យ។
លោកបានបន្តថា យើងដឹងស្រាប់ហើយថារាជរដ្ឋាភិបាលកម្ពុជាប្រកាសឱ្យខេត្តព្រះសីហនុ ទទួលទេសចរអន្តរជាតិចាក់វ៉ាក់សាំងក៏ដូចជាទេសចរជាតិ។ដូច្នេះអាជ្ញាធរខេត្តពាក់ព័ន្ធត្រូវយកចិត្តទុកដាក់ក្នុងការពង្រឹងការអនុវត្តវិធានសុវត្ថិភាពទេសចរណ៍ ការពង្រឹងអនាម័យ ការពាក់ម៉ាស់ រក្សាគម្លាតនិងការរៀបចំគុណភាពនិងសេវាកម្ម។
លោកថា៖ «អ៊ីចឹងពាក់ព័ន្ធការគ្រប់គ្រងគោលដៅទេសចរណ៍ទាំងមូលគឺយើងបណ្តុះបណ្តាលអាជីវកម្មដែលធ្វើការបម្រើសេវាកម្មឬបុគ្គលិកដែលបម្រើការនៅហាងទាំងផ្នែកម្ហូបអាហារ សេវាស្នាក់នៅ ។ មិនត្រឹមតែភោជនីយដ្ឋាន អាហារដ្ឋានដែលគាត់មានទីតាំងត្រឹមត្រូវទេ ទាំងអ្នកលក់ដូរតាមរទះ ក៏យើងចាំបាច់ត្រូវតែឱ្យគាត់ចូលរួមអនុវត្តវិធានសុវត្ថិភាពទេសចរណ៍ដែរ…»។
លោកបានបញ្ជាក់ថា មានន័យថាអ្នកលក់ដូរនៅតាមដងផ្លូវក៏ដោយក៏ត្រូវស្លៀកពាក់ឱ្យបានសមរម្យ ត្រូវមានមួក ស្រោមដៃ អនាម័យសំខាន់ជាចម្បង ព្រោះភ្ញៀវទេសចរក៏គេចង់ភ្លក់ម្ហូបអាហារ នៅតាមដងផ្លូវដែរ។
លោកបន្តថា ទន្ទឹមនេះដែរ មន្ទីរទេសចរណ៍ខេត្ត ក៏បានសហការជាមួយផ្នែកពាក់ព័ន្ធបើកវគ្គបណ្តុះបណ្តាលស្តីពីសេវាកម្មដឹកជញ្ជូនផ្លូវទឹក និងផ្លូវគោកដល់អ្នកធ្វើការលើផ្នែកនេះផងដែរ។
លោកថា៖ «ការជំរុញដល់វគ្គបណ្តុះបណ្តាលទាំងអស់គ្រប់សេវាកម្មដូចគ្នា គឺធ្វើយ៉ាងណាឱ្យគាត់យល់ដឹងពីការចូលរួមអនុវត្តវិធានសុវត្ថិភាពទេសចរណ៍ហើយគាត់ត្រូវតែត្រួតពិនិត្យភ្ញៀវដែលមកទិញ ឬប្រើប្រាស់សេវាកម្មរបស់គាត់នូវកាតចាក់វ៉ាក់សាំងឱ្យបានត្រឹមត្រូវ»។
លោកបន្តថា ក្នុងវគ្គបណ្តុះបណ្តាលនេះអ្នកជំនាញបានក៏ធ្វើបទបង្ហាញពាក់ព័ន្ធសមត្ថកិច្ចទៅលើការគ្រប់គ្រងអាជីវកម្មសណ្តាប់ធ្នាប់និងសេវាកម្មដឹកជញ្ជូនទេសចរណ៍ផ្លូវទឹក គោក ពាក់ព័ន្ធបច្ចេកទេស យានយន្ត ដើម្បីធ្វើយ៉ាងណាមានសុវត្ថិភាពសម្រាប់ភ្ញៀវទាំងសេវាកម្ម សុវត្ថិភាពអនាម័យ។
សម្រាប់លោក ប៊ី រតនា ប្រធានផ្នែកលក់នៃក្រុមហ៊ុនកូកា កូឡាកម្ពុជាដែលបានចូលរួមផ្តល់ការបណ្តុះបណ្តាលផ្នែកចំណីហារ អនាម័យ បានថ្លែងថា៖«ដោយសារចំណេះដឹងអ្នកលក់ដូរនៅតាមដងផ្លូវមួយចំនួននៅមានកម្រិតទាក់ទងវិស័យអនាម័យ ដូច្នេះយើងព្យាយាមបង្កើនចំណេះដឹងរបស់ពួកគាត់ឱ្យមានស្តង់ដាកម្រិតខ្ពស់ក្នុងគោលដៅទាក់ទាញអតិថិជនឱ្យបានច្រើនមកទីរួមខេត្តព្រះសីហនុ»។
អាជីវករលក់ដូរលោក លី សុភ័ក្រ បានថ្លែងថា បន្ទាប់ពីបានចូលរួមវគ្គបណ្តុះបណ្តាលហើយ ទទួលបាននូវចំណេះដឹងជាច្រើន ទាក់ទងលើវិស័យទេសចរណ៍ អនាម័យ និងបរិស្ថាន។
លោកថា៖«ចំណុចល្អៗទាំងអស់នេះខ្ញុំនឹងយកទៅកែប្រែដើម្បីឆ្លើយតបតម្រូវការដែលអតិថិជនកំពុងត្រូវការប្រចាំគឺខ្ញុំនឹងកែតម្រូវឡើងវិញនូវភាពខ្វះខាតទាំងនោះ»។
លោក តាំង សុចិត្រគ្រឹស្នា ប្រធានមន្ទីរទេសចរណ៍ខេត្តព្រះសីហនុបានឱ្យដឹងថាបន្ទាប់ពីរាជរដ្ឋាភិបាលប្រកាសឱ្យបើកប្រទេសឡើងវិញលើគ្រប់វិស័យកាលពីថ្ងៃទី ១ ខែ វិច្ឆិកា ឆ្នាំ ២០២១ ភ្ញៀវទេសចរដែលបានទៅកម្សាន្តនៅខេត្តព្រះសីហនុមានការកើនឡើងដោយក្នុង ១ សប្តាហ៍ មានភ្ញៀវទេសចរប្រមាណ ៣ ម៉ឺននាក់។
លោកថា៖ «មានភ្ញៀវទេសចរទៅកម្សាន្តនៅខេត្តព្រះសីហនុកើនឡើងដល់៣ម៉ឺននាក់ក្នុង១សប្តាហ៍ជាពិសេសរយៈពេលឈប់សម្រាក ៣ ថ្ងៃ នាឱកាសបុណ្យអុំទូកកន្លងទៅមានភ្ញៀវទេសចរ ១១ ម៉ឺននាក់ដោយសារយើងមានហេដ្ឋារចនាសម្ព័ន្ធល្អប្រសើរ មានឆ្នេរស្អាត បន្ទប់ទឹកស្អាត មានការធានាបាននូវសន្តិសុខសុវត្ថិភាព ក៏ដូចជា សណ្តាប់ធ្នាប់ នៅក្នុងទីក្រុង និងតាមបណ្តាលឆ្នេរ»៕