.jpg)
មន្ត្រីអាជ្ញាធរខេត្តកំពង់ឆ្នាំ ពេលជួបជាមួយពលរដ្ឋនៅស្រុករលាប្អៀរ ខេត្តកំពង់ឆ្នាំង កាលពីថ្ងៃទី ១ វិច្ឆិកា។ រូបថត រដ្ឋបាលខេត្តកំពង់ឆ្នាំង
ភ្នំពេញៈ រដ្ឋបាលខេត្តកំពង់ឆ្នាំងបានទទួលសំណូមពរ និងដោះស្រាយទំនាស់ ជូនប្រជាពលរដ្ឋទូទាំងខេត្ត បានចំនួន ៥៤៩ ករណី ក្នុងចំណោមទំនាស់ និងសំណូមពរដែលទទួលបានពីប្រជាពលរដ្ឋចំនួន ៧២៣ ករណី ក្នុងខែវិច្ឆិកា។ ដោយឡែក នៅសល់ ១៣៤ ករណីទៀត រដ្ឋបាលខេត្តកំពុងបន្តសិក្សានិងរកវិធីដោះស្រាយ។
លោក ស្រ៊ន សំរិទ្ធី អភិបាលរង និងជាអ្នកនាំពាក្យរដ្ឋបាលខេត្តកំពង់ឆ្នាំងថ្លែងនៅថ្ងៃទី ៣០ វិច្ឆិកាថា បន្ទាប់ពីសម្រុកចុះដោះស្រាយបញ្ហានានា ដែលជាកង្វល់របស់ប្រជាពលរដ្ឋជួបប្រទះនៅគ្រប់មូលដ្ឋានក្នុងខែវិច្ឆិកា រដ្ឋបាលខេត្តកំពង់ឆ្នាំងបានបើកកិច្ចប្រជុំបូកសរុបលទ្ធផលយុទ្ធនាការដោះស្រាយទំនាស់ និងសំណូមពររបស់ប្រជាពលរដ្ឋ នៅព្រឹកថ្ងៃទី ៣០ ខែវិច្ឆិកា។
ជាលទ្ធផលរដ្ឋបាលខេត្តកំពង់ឆ្នាំងបានទទួលដោះស្រាយទំនាស់ និងសំណូមពរពីប្រជាពលរដ្ឋ សរុបចំនួន ៧២៣ ករណី ក្នុងនោះដោះស្រាយបានចំនួន ៥៤៩ ករណី និងនៅសល់ ១៣៤ ករណីទៀត កំពុងបន្តដោះស្រាយ។ ជាមួយគ្នានោះអាជ្ញាធរនៅតែបន្តទទួលដោះស្រាយរាល់បញ្ហាដែលប្រជាពលរដ្ឋបានជួបប្រទះជាបន្តបន្ទាប់ដដែល។
លោកថ្លែងថា៖ «យើងនៅតែបន្តទទួលដដែល។ អានេះយើងបូកសរុបខែដំបូង ដែលឯកឧត្តមអភិបាលខេត្ត លោកផ្តួចផ្តើមហ្នឹង គឺយើងប្រមូលបញ្ហាប្រឈម ទំនាស់ សំណូមពរហ្នឹង គឺសរុបទៅ ៧០០ ផ្លាយ។ សម្រាប់ ១ ខែដំបូង យើងដោះបាន ៥៤៩ អ៊ីចឹងនៅសេសសល់ ១៣០ផ្លាយយើងកំពុងតែបន្តសិក្សា បន្តដោះស្រាយដោយសារតែកិច្ចការខ្លះត្រូវការពេលវេលា ភ័ស្តុតាង និងសាក្សី»។
មន្ត្រីនាំពាក្យរូបនេះបញ្ជក់ថា ក្នុងទំនាស់ទាំងអស់ ដែលអាជ្ញាធរបានដោះស្រាយ គឺប្រមាណ៨០ភាគរយ ជាទំនាស់ដីធ្លី។ ចំណែកក្រៅពីនោះគឺជាសំណើនិងសំណូមពរ ព្រមទាំងបញ្ហាពាក់ព័ន្ធនឹងរដ្ឋប្បវេណី។ ក្នុងការចុះដោះស្រាយបញ្ហាជូនប្រជាពលរដ្ឋ ក៏មានបញ្ហាមួយចំនួនដែលអាជ្ញាធរបានព្យាយាមជួយដោះស្រាយសម្របសម្រួលមិនបានសម្រេចផងដែរ។
លោកថ្លែងថា៖ «យើងគ្រាន់តែជាអាជ្ញាកណ្តាល លើកជាសំណូមពរឱ្យគាត់ ប៉ុន្តែការសម្រេចវិនិច្ឆ័យយើងអត់មានសិទ្ធិទេ។ អ៊ីចឹងបើពួកគាត់មិនទទួលយក ចុងក្រោយគឺមានតែទៅខាងសាលាដំបូង ប៉ុន្តែចំណុចនេះក្នុងនាមអាជ្ញាធរយើងមិនជំរុញគាត់ទេ»។
លោក ស្រ៊ន សំរិទ្ធី ប្រាប់ថា យន្តការក្នុងការដោះស្រាយបញ្ហាជូនប្រជាពលរដ្ឋនៅគ្រប់មូលដ្ឋាននេះជារឿងល្អមួយ ទោះបីជាមិនល្អឥតខ្ចោះក៏ដោយ។ មានន័យថា សំណើសំណូមពរមួយចំនួនដែលបានកកស្ទះក្នុងពេលកន្លងមក ដែលរដ្ឋបាលក្រុងស្រុកជាប់រវល់មិនបានដោះស្រាយយ៉ាងណានោះ តាមរយៈយន្តការថ្មីនេះ គឺរដ្ឋបាលខេត្តបានជួយបន្ធូរបន្ថយការងារមួយចំនួន ដែលជាមួយគ្នានោះក៏បានបំពេញចិត្តទៅដល់ប្រជាពលរដ្ឋនៅតាមមូលដ្ឋានផងដែរ។
លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្ស (អាដហុក) នៅថ្ងៃទី ៣០ វិច្ឆិកា សម្តែងការសាទរចំពោះកិច្ចខិតខំប្រឹងប្រែងរបស់រដ្ឋបាលខេត្តកំពង់ឆ្នាំង ដែលបានយកចិត្តទុកដាក់គិតគូរដល់កង្វល់ និងញ្ហានានា របស់ប្រជាពលរដ្ឋនៅតាមបណ្តាមូលដ្ឋានក្នុងអាណាខេត្តរបស់ខ្លួន។ លោកថា ការងារបែបនេះគួរតែត្រូវបានអនុវត្តឱ្យបានគ្រប់ខេត្ត ព្រោះប្រជាពលរដ្ឋមិនមែនមានបញ្ហាតែនៅខេត្តកំពង់ឆ្នាំងតែមួយនោះទេ។
លោកថ្លែងថា៖ «ខ្ញុំមានការសាទរ និងគាំទ្រទៅលើចំណាត់ការទាំងអស់ហ្នឹង ហើយបញ្ហាដែលដោះស្រាយបានវាជារឿងល្អហើយ ដែលធ្វើមិនឱ្យមានភាពអូសបន្លាយរ៉ាំរ៉ៃ។ បើពលរដ្ឋគាត់ទទួលយកបាន អាហ្នឹងជាជារឿងដែលយើងសារទរ។ ចំណែករឿងដែលមិនទាន់អាចទទួលយកបាន បន្តដោះស្រាយទៀតអ៊ីចឹងទៅ។ យើងឃើញថា បើគ្រប់ខេត្តធ្វើជាប្រព័ន្ធបែបហ្នឹង ជារឿងល្អដែលពលរដ្ឋគាត់ទន្ទឹងរង់ចាំយូរហើយ»៕
