.jpg)
ភ្ញៀវទេសចរ ពេលមកដល់អាកាសយានដ្ឋានអន្តរជាតិភ្នំពេញកាលថ្ងៃទី ១៦ មិថុនា ឆ្នាំ ២០២០។ ហេង ជីវ័ន
ភ្នំពេញៈ រាជរដ្ឋាភិបាលកម្ពុជាសម្រេចហាមឃាត់ការធ្វើដំណើររបស់អ្នកដំណើរ ឬអ្នកដំណើរឆ្លងកាត់ប្រទេសចំនួន ១០ នៅទ្វីបអាហ្វ្រិក ដើម្បីការពារការឆ្លងវីរុសកូវីដ ១៩ បំប្លែងថ្មី ដែលមានឈ្មោះ ថា អូមីក្រុង (Omicron) ចាប់ពីថ្ងៃទី ១ ខែធ្នូ ឆ្នាំ ២០២១ នេះ។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាល ចេញសេចក្តីប្រកាសព័ត៌មាន នាថ្ងៃទី ២៩ វិច្ឆិកា ដោយបានលើកឡើងថាអង្គការសុខភាពពិភពលោក (WHO) បានរាយការណ៍ពីការរកឃើញវីរុសបំប្លែងថ្មីប្រភេទ B.1.1.529 នៅបណ្តាប្រទេសមួយចំនួននៃទ្វីបអាហ្វ្រិក ដែលត្រូវបានប្រកាសថា ជាការព្រួយបារម្ភនៃការរាលដាលមេរោគកូវីដ ១៩ ប្រភេទបំប្លែងថ្មីនេះ។
លោកបញ្ជាក់ថា៖ «ដោយបានទទួលការឯកភាព [ពី] សម្តេចនាយករដ្ឋមន្ត្រី ហ៊ុន សែន ក្រសួងសុខាភិបាលក៏បានសម្រេចហាមឃាត់អ្នកដំណើរ ឬអ្នកដែលបានឆ្លងកាត់ប្រទេសចំនួន ១០ នៅទ្វីបអាហ្វ្រិក ឬមានប្រវត្តិធ្វើដំណើរទៅប្រទេសទាំង ១០ ក្នុងអំឡុងពេល ៣ សប្តាហ៍មុនធ្វើដំណើរចូលប្រទេសកម្ពុជា ទាំងតាមផ្លូវអាកាស ទាំងតាមផ្លូវគោកមួយរយៈសិនរហូតដល់មានការជូនដំណឹងជាថ្មី ដើម្បីទប់ស្កាត់ការឆ្លងចូលកម្ពុជានូវមេរោគកូវីដ ១៩ ប្រភេទអូមីក្រុងនេះ»។
ប្រទេសទាំង ១០ ដែលកម្ពុជាហាមឃាត់អ្នកដំណើរ ឬអ្នកដំណើរឆ្លងកាត់នោះ រួមមាន Botswana, Eswatina, Lesotho, Mozambique, Namibia, South Africa, Zimbabwe, Malawi, Angola និងប្រទេស Zambia។
ដោយឡែក អភិបាលរាជធានី-ភ្នំពេញលោក ឃួង ស្រេង បានសម្រេចអនុញ្ញាតឱ្យបើកដំណើរការឡើងវិញចំពោះអាជីវកម្មខារ៉ាអូខេ រង្គសាល និងឌីស្កូតែក នៅរាជធានីភ្នំពេញចាប់ពីថ្ងៃទី ៣០ វិច្ឆិកា ឆ្នាំ ២០២១ តទៅ។ ប៉ុន្តែត្រូវអនុវត្តតាមគន្លងប្រក្រតីភាពថ្មី ហើយអ្នកដែលល្មើសនឹងការណែនាំនឹងត្រូវដកហូតអាជ្ញាប័ណ្ណ ឬលិខិតអនុញ្ញាត និងអាចឈានទៅបិទទីតាំងទាំងស្រុង។
លោក ឃួង ស្រេង បញ្ជាក់នៅថ្ងៃទី ៣០ វិច្ឆិកា ថា៖ «ម្ចាស់ទីតាំង ឬម្ចាស់អាជីវកម្មខារ៉ាអូខេ រង្គសាល និងឌីស្កូតែក ចាំបាច់ត្រូវមានកាតព្វកិច្ចចាត់តាំងបុគ្គលិកប្រចាំការនៅមុខច្រកចេញ-ចូលទីតាំង ដើម្បីធ្វើការត្រួតពិនិត្យការចាក់វ៉ាក់សាំង ស្របតាមសេចក្តីណែនាំរបស់រដ្ឋបាលរាជធានីភ្នំពេញ និងត្រូវប្រកាន់ខ្ជាប់ជានិច្ចនូវវិធានការ ៣ការពារ និង៣កុំ របស់លោកនាយករដ្ឋមន្ត្រី ហ៊ុន សែន»។
លោកអភិបាលបន្ថែមថា ម្ចាស់ទីតាំងត្រូវអនុវត្តតាមនីតិវិធីប្រតិបត្តិស្តង់ដាអប្បបរមា (SOP) របស់ក្រសួងទេសចរណ៍ គោលការណ៍ណែនាំរបស់ក្រសួងស្ថាប័នជំនាញពាក់ព័ន្ធ និងវិធានការសុវត្ថិភាពផ្នែកសុខាភិបាលឱ្យបានម៉ឺងម៉ាត់ គឺការវាស់កម្តៅ ការធ្វើអនាម័យ និងការបាញ់ថ្នាំសម្លាប់មេរោគជាដើម។
ជាមួយគ្នានេះ លោក ឃួង ស្រេង ក៏បានប្រគល់ភារកិច្ចដល់គណៈបញ្ជាការដឹកនាំការអនុវត្តច្បាប់នៅថ្នាក់រាជធានីភ្នំពេញ រដ្ឋបាលខណ្ឌទាំង ១៤ មន្ទីរទេសចរណ៍រាជធានីភ្នំពេញ មន្ទីរសុខាភិបាលនៃរដ្ឋបាលរាជធានីភ្នំពេញ និងមន្ទីរ-អង្គភាពជំនាញពាក់ព័ន្ធ សហការចុះណែនាំ និងត្រួតពិនិត្យ ដើម្បីឱ្យការអនុវត្តមានប្រសិទ្ធភាព និងការទទួលខុសត្រូវខ្ពស់។
លោកបញ្ជាក់ថា៖ «ក្នុងករណីរកឃើញម្ចាស់ទីតាំង ឬម្ចាស់អាជីវកម្មខារ៉ាអូខេ រង្គសាល និងឌីស្កូតែក ណាមួយមិនអនុវត្ត ឬអនុវត្តមិនបានត្រឹមត្រូវតាមការណែនាំនេះត្រូវចាត់វិធានការដកហូតអាជ្ញាប័ណ្ណ ឬលិខិតអនុញ្ញាត និងអាចឈានទៅបិទទីតាំងទាំងស្រុង»។
សម្រាប់បុគ្គលល្មើសពាក់ព័ន្ធត្រូវអនុវត្តទណ្ឌកម្មរដ្ឋបាល និងទណ្ឌកម្មច្បាប់ រួមទាំងការផ្សព្វផ្សាយជាសាធារណៈចំពោះបុគ្គលល្មើសស្របតាមច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ ១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត និងលិខិតបទដ្ឋានគតិយុត្តពាក់ព័ន្ធជាធរមាន ដោយគ្មានការលើកលែងឡើយ។
ក្នុងពិធីសម្ពោធបើកឱ្យដំណើរការមន្ទីរសម្រាកព្យាបាល អូរ៉េន-ឃែនស័រ នាព្រឹកថ្ងៃទី ៣០ វិច្ឆិកា លោក ឃួង ស្រេង បានថ្លែងថា៖ «នៅពេលដែលខារ៉ាអូខេ ក្លិបកម្សាន្ត និងរង្គសាល អាចបើកប្រកបមុខរបរអាជីវកម្មឡើងវិញ តែត្រូវអនុវត្តនូវវិធានការសុខាភិបាល វិធានការ៣កុំ ៣ការពារ និង SOP ឱ្យបានត្រឹមត្រូវ។ យើងហ៊ានធ្វើកិច្ចការងារនេះនៅពេលដែលយើងបានចាក់វ៉ាក់សាំងជូនប្រជាពលរដ្ឋយើងបាន ១០០%»។
លោក ស្រេង បានបន្ថែមថា ប្រជាពលរដ្ឋ ពិតជាមានមោទនភាពណាស់ ដែលលោកនាយករដ្ឋមន្ត្រីបានធ្វើការសម្រេចយ៉ាងត្រឹមត្រូវហើយ និងមានប្រសិទ្ធភាពខ្ពស់៕
