ភ្នំពេញៈ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) បង្ហាញរបាយការណ៍ប្រចាំឆ្នាំពីសកម្មភាពការងារដែលមន្ត្រីបានអនុវត្តក្នុងក្របខ័ណ្ឌទូទាំងប្រទេសសម្រាប់ឆ្នាំ ២០២១ ដោយក្នុងនោះមានផលិតផលគ្មានសុវត្ថិភាពរាប់រយតោន និងអាជីវកម្មមិនមានភាពអនុលោមតាមច្បាប់រាប់រយកន្លែងត្រូវបានបង្ក្រាប។
កាលពីថ្ងៃទី ២៩ ខែវិច្ឆិកា ឆ្នាំ ២០២១ ក.ប.ប. បើកកិច្ចប្រជុំបូកសរុបសកម្មភាពការងារប្រចាំឆ្នាំ ២០២១ និងទិសដៅអនុវត្តការងារបន្តដោយមានការចូលរួមពីមន្ត្រីទូទាំងប្រទេស ដើម្បីពិនិត្យពីវឌ្ឍនភាពការងារខ្លួន និងលើកឡើងពីបញ្ហាប្រឈមដែលបានអនុវត្តកន្លងមកដើម្បីដាក់ចេញផែនការសកម្មភាពអនុវត្តបន្តសម្រាប់ឆ្នាំ ២០២២ ខាងមុខ។
របាយការណ៍ប្រចាំឆ្នាំរបស់ ក.ប.ប. ដែលភ្នំពេញប៉ុស្តិ៍ទទួលបាននៅថ្ងៃទី ៣០ វិច្ឆិកា បានឱ្យដឹងថា ចំពោះការងារពាក់ព័ន្ធនឹងគុណភាពសុវត្ថិភាពផលិតផលទំនិញ មន្ត្រីបានចុះពិនិត្យទីផ្សារទូទាំងប្រទេសបានចំនួន ៥៦៩ លើកដោយដកហូតទំនិញមិនមានភាពអនុលោមចំនួន ៣៦ តោន និង ៤០០ គីឡូក្រាមយកមកកម្ទេចចោលហើយបានរកឃើញ និងដកហូតមកបំផ្លាញចោលនូវសារធាតុបាញ់លើរុក្ខជាតិធ្វើឱ្យស្រស់ និងឆាប់លូតលាស់គ្មានស្លាកសញ្ញាត្រឹមត្រូវបានចំនួន ៧៨ ប៊ីដុង ស្មើនឹង ២ ៣៤០ លីត្រ។
របាយការណ៍ដដែលបានឱ្យដឹងទៀតថា មន្ត្រីក៏បានស្ទាក់ចាប់រថយន្តដឹកបង្គាស្រស់ដែលមានចាក់បញ្ចូលសារធាតុ CMC (ចាហួយ) ចំនួន ៧ តោន និង ១០០ គីឡូក្រាម និងគ្រឿងក្នុងជ្រូកចំនួន ៣២០ គីឡូក្រាមមកកម្ទេចចោល ដោយបានត្រួតពិនិត្យ និងវិភាគគុណភាពទំនិញចាំបាច់ដែលត្រូវយកមកដាក់លក់ និងចែកជូនប្រជាពលរដ្ឋដែលរស់នៅក្នុងតំបន់បិទខ្ទប់ (តំបន់ក្រហម) នៅតាមបណ្ដាឃ្លាំងស្តុក និងសិប្បកម្មនានាចំនួន ៤១ លើក។
ចំពោះការងារពាក់ព័ន្ធកិច្ចការពារអ្នកប្រើប្រាស់ និងបង្ក្រាបការក្លែងបន្លំ របាយការណ៍របស់ ក.ប.ប. បានឱ្យដឹងដែរថា មន្ត្រីទូទាំងប្រទេសបានចុះត្រួតពិនិត្យគុណភាព និងបរិមាណរង្វាស់រង្វាល់ប្រេងសាំងនៅតាមបណ្តាស្ថានីយ/ដេប៉ូលក់ប្រេងឥន្ធនៈសរុប ១ ៦៦១ ស្ថានីយ/ដេប៉ូ ដោយរកឃើញស្ថានីយ/ដេប៉ូចំនួន ៦៩៣ មិនមានភាពអនុលោមផ្នែកគុណភាព (សន្ទស្សន៍អុបតាន) និងបរិមាណ។ បន្ថែមពីនេះក្នុងរយៈពេល ១ ឆ្នាំនេះ នៅក្នុងក្របខ័ណ្ឌទូទាំងប្រទេសមន្ត្រី ក.ប.ប បានត្រួតពិនិត្យគុណភាពអាល់កុល និងជែលលាងដៃគ្រប់ប្រភេទដែលមានផ្ទុកសារធាតុមេតាណុលនៅតាមបណ្តាឃ្លាំងស្តុកទីផ្សារ និងឱសថស្ថានហើយបានរកឃើញ និងរឹបអូសមកកម្ទេចចោលសារធាតុមេតាណុលចំនួន ១៩១ ៩៥៣ លីត្រ។
លោក ផាន អូន ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋាន ក.ប.ប. បានប្រាប់ភ្នំពេញប៉ុស្តិ៍បន្ថែមថា ក្រៅពីបង្ក្រាប និងដកហូតផលិតផល និងបទល្មើសទាំងនេះ ក.ប.ប. ក៏បានចុះស្រាវជ្រាវបទល្មើសក្លែងម៉ាក និងការចរាចរផលិតផលក្លែងក្លាយតាមពាក្យបណ្តឹងរបស់ក្រុមហ៊ុនមួយចំនួន។
លើសពីនេះ ក.ប.ប បានកោះអញ្ជើញក្រុមហ៊ុនចំនួន ១៥ ឱ្យមកបំភ្លឺ និងផ្តល់ឯកសារពាក់ព័ន្ធ ព្រមទាំងបានសហការចុះបង្ក្រាបទីតាំងផលិត កែច្នៃ និងឃ្លាំងស្តុកផលិតផលក្លែងក្លាយចំនួន ១៤ លើក ដោយបានឃាត់ទុកផលិតផលក្លែងក្លាយចំនួន ១៣ តោន និង ៣១១ គីឡូក្រាម។
លោកបានបន្តថា៖ «មន្ត្រីស៊ើបអង្កេតនៃអគ្គនាយកដ្ឋាន ក.ប.ប. ដែលទទួលបាននីតិសម្បទាជានគរបាលយុត្តិធម៌បានរកឃើញបទល្មើសចំនួន ៦៨២ ករណីត្រូវបានអនុវត្តវិធានការពិន័យអន្តរការណ៍ទៅតាមប្រភេទ និងទំហំនៃបទល្មើសនីមួយៗ និងបទល្មើសចំនួន ៧ ត្រូវបានកសាងសំណុំរឿងបញ្ជូនទៅតុលាការ»។ យ៉ាងណា លោក ផាន អូន បានអះអាងថា បើទោះជាលទ្ធផលការងារសម្រេចបានល្អក៏ក្នុងរយៈពេល ១ ឆ្នាំនេះ ក.ប.ប បានជួបប្រទះបញ្ហាប្រឈមមួយចំនួនផងដែរ ដោយសារតែកង្វះកិច្ចសហប្រតិបត្តិការរវាងស្ថាប័នពាក់ព័ន្ធមួយចំនួន ក្នុងកិច្ចសម្រួលពាណិជ្ជកម្ម សុវត្ថិភាពម្ហូបអាហារ និងកិច្ចការពារផលប្រយោជន៍អ្នកប្រើប្រាស់ ដែលនាំឱ្យប្រសិទ្ធភាពនៃការអនុវត្តគោលនយោបាយ ច្បាប់ និងបទប្បញ្ញត្តិជាធរមាន មិនទាន់បានល្អប្រសើរ។
លោកបញ្ជាក់ថា៖ «សមត្ថភាពវិភាគរបស់មន្ទីរពិសោធន៍នៅមានកម្រិត និងកំពុងស្ថិតក្នុងស្ថានភាពរៀបចំឱ្យមានលក្ខណៈកាន់តែប្រសើរដើម្បីធានាបាននូវការវិភាគប្រកបដោយប្រសិទ្ធភាព និងការវាយតម្លៃទទួលស្គាល់តាមស្តង់ដាអន្តរជាតិ។ ចំណែកការយល់ដឹងអំពីច្បាប់ និងលិខិតបទដ្ឋានរបស់អ្នកប្រើប្រាស់ អាជីវករ ផលិតករ ក៏នៅមានកម្រិត»៕
វីដេអូ៖