.jpg)
ស្ត្រីម្នាក់កំពុងវែករកមើលអាវរងា នៅទីតាំងលក់សម្លៀកបំពាក់ ១ កន្លែង នៅសង្កាត់អូរឡាំពិក ខណ្ឌចំការមន កាលពីថ្ងៃទី ១២ ខែ មករា ឆ្នាំ ២០២១។ ហេង ជីវ័ន
ភ្នំពេញៈ ក្នុងសប្ដាហ៍ទី១ នៃខែធ្នូនេះ តំបន់មួយចំនួនក្នុងខេត្តភាគឧត្តរនិងឦសាននៃប្រទេសកម្ពុជា សីតុណ្ហភាពអប្បបរមានឹងធ្លាក់ចុះមកក្នុងរង្វង់ ១៥ អង្សាសេ ខណៈរាជធានីភ្នំពេញ និងបណ្ដាខេត្តផ្សេងទៀតក្នុងតំបន់វាលទំនាបកណ្ដាល សីតុណ្ហភាពអប្បបរមា នឹងធ្លាក់ចុះមកនៅចន្លោះ ពី ១៧-១៩ អង្សាសេ។ នេះបើតាមការព្យាកររបស់ក្រសួងធនធានទឹក និងឧតុនិយម នៅថ្ងៃទី ៣០ ខែ វិច្ឆិកា ឆ្នាំ ២០២១។
តាមរយៈការព្យាករនោះ ព្រះរាជាណាចក្រកម្ពុជាបាននិងកំពុងទទួលឥទ្ធិពលពីទ្រនុងសម្ពាធខ្ពស់ពីប្រទេសចិន ដែលបន្តរំកិលចុះមកក្រោម (ភាគខាងត្បូង) ជាមួយនឹងខ្យល់មូសុងឦសានបង្កើនល្បឿនក្នុងកម្រិតពីមធ្យមទៅបង្គួរ។ ក្នុងស្ថានភាពនេះធ្វើឱ្យបណ្តាខេត្តក្នុងតំបន់វាលទំនាបកណ្តាល ចាប់ពីថ្ងៃទី ១-៧ ខែធ្នូនេះ «អាកាសធាតុត្រជាក់នឹងធ្លាក់ចុះដល់កម្រិតបង្គួរ»ជាមួយសីតុណ្ហភាពអប្បបរមាពី ១៧ ទៅ ១៩ អង្សាសេ។ សីតុណ្ហភាពអតិបរមា មានពី ២៦ ទៅ ២៨ អង្សាសេ និងមានខ្យល់បក់នាំមកជាមួយនូវធាតុត្រជាក់ពីតំបន់ស៊ីបេរី ខណៈតំបន់មាត់សមុទ្រមានអាកាសធាតុចុះត្រជាក់បន្តិចបន្តួច ជាមួយសីតុណ្ហភាពអប្បបរមាពី១៨ទៅ២០អង្សាសេ និងសីតុណ្ហភាពអតិបរមាមានពី ២៧ ទៅ ២៩ អង្សាសេ។
ដោយឡែក បណ្តាខេត្តជាប់ជួរភ្នំដងរែកនិងខ្ពង់រាបឦសាន ក្រសួងធនធានទឹក និងឧតុនិយម បានព្យាករថា ក្នុងអំឡុងពេល១សប្ដាហ៍នេះ [ពីថ្ងៃទី ១-៧ ខែ ធ្នូ ២០២១] អាកាសធាតុត្រជាក់នឹងធ្លាក់ចុះដល់កម្រិតបង្គួរ ជាមួយកម្រិតសីតុណ្ហភាពអប្បបរមាពី ១៦ ទៅ ១៨ អង្សាសេ សីតុណ្ហភាពអតិបរមា មានពី២៦ ទៅ ២៨អង្សាសេ។ ក្នុងនោះតំបន់មួយចំនួននៅខេត្តមណ្ឌលគិរី ខេត្តរតនគិរី ខេត្តព្រះវិហារ និងខេត្តឧត្តរមានជ័យ «សីតុណ្ហភាពអប្បបរមា អាចធ្លាក់ចុះដល់ រង្វង់កម្រិត ១៥ អង្សាសេ» ដែលទាមទារឱ្យមានការយកចិត្តទុកដាក់ថែទាំសុខភាពឱ្យបានល្អ ពិសេស សុខភាពកុមារ និងចាស់ជរា។
ជុំវិញការព្យាករអាកាសធាតុនេះ លោក ចាប កុយ ប្រធានមន្ទីរធនធានទឹកនិងឧតុនិយម ខេត្តព្រះវិហារ ប្រាប់ភ្នំពេញប៉ុស្តិ៍ថា នៅព្រឹកថ្ងៃទី ៣០ ខែ វិច្ឆិកា ឆ្នាំ ២០២១ អាកាសធាតុតាមខ្នងភ្នំ នៃជួរភ្នំដងរែក មានភាពត្រជាក់ខ្លាំងជាងតំបន់វាលទំនាប ដោយសីតុណ្ហភាពអប្បបរមា បានធ្លាក់ចុះមកនៅក្នុងរង្វង់ ១៧ អង្សា ខណៈតំបន់មួយចំនួនទៀត ដែលស្ថិតនៅផ្នែកវាលទំនាបក្នុងខេត្តនេះ សីតុណ្ហភាពអប្បបរមា បានធ្លាក់ចុះមកនៅក្នុងចន្លោះពី២០-២២អង្សាសេនៅឡើយ។
លោកថ្លែងថា៖«នៅពេលនេះផ្ទៃមេឃស្រទុំនិងមានខ្យល់បក់នាំមកនូវទឹកសន្សើមក្រាស់ ដែលអ្នកស្រុកនិយមហៅថា រលឹមផ្សែងក្រូច ហើយនៅលើខ្នងភ្នំប្រាសាទព្រះវិហារអាកាសធាតុត្រជាក់ បានធ្លាក់មកនៅក្នុងកម្រិត១៧អង្សាសេ»។
បើតាមលោកចាប កុយ ស្ថានភាពនេះ នៅមិនទាន់រងា ឬបង្កផលប៉ះពាល់ដល់បញ្ហាសុខភាពរបស់ប្រជាពលរដ្ឋទូទៅនៅក្នុងខេត្តនេះនៅឡើយទេ។ ប៉ុន្តែលោកបានអះអាងថា ក្នុងរយៈពេល ៣-៤ ថ្ងៃខាងមុខនេះ អាកាសធាតុនៅខេត្តព្រះវិហារ ជាពិសេសនៅលើខ្នងភ្នំប្រាសាទព្រះវិហារ និងបណ្ដាស្រុកមួយចំនួនទៀត ដែលស្ថិតនៅក្បែរតំបន់ជួរភ្នំដងរែក សីតុណ្ហភាពអប្បបរមាអាចនឹងធ្លាក់ចុះក្រោមកម្រិតនៃការព្យាកររបស់ក្រសួងធនធានទឹក និងឧតុនិយម ប្រមាណ ១-២ អង្សាសេ។
ស្រដៀងគ្នានេះ លោក ញើន កួន ប្រធានមន្ទីរធនធានទឹក និងឧតុនិយមនៅខេត្តឧត្តរមានជ័យ បាននិយាយថា កាលពីវេលាម៉ោង៤ព្រឹក ថ្ងៃទី៣០ ខែវិច្ឆិកា ឆ្នាំ២០២១ តំបន់មួយចំនួនក្នុងក្រុងសំរោង ស្រុកអន្លង់វែង និង ស្រុកត្រពាំងប្រាសាទ ដែលស្ថិតនៅជាប់ជួរភ្នំដងរែក អាកាសធាតុត្រជាក់ធ្លាក់ចុះក្នុងរង្វង់១៩អង្សាសេ គ្រាដែលតំបន់ផ្សេងទៀត នៅខេត្តនេះ មានសីតុណ្ហភាព ក្នុងចន្លោះពី ២១-២២អង្សាសេ។
លោកនិយាយថា៖«បើតាមការពិនិត្យនិងតាមដានអំពីស្ថានភាពអាកាសធាតុ ខ្ញុំអាចអះអាងថា ចាប់ពីម៉ោងសូន្យនៃយប់ថ្ងៃទី១ ខែធ្នូនេះទៅ នៅទូទាំងខេត្តឧត្តរមានជ័យ សីតុណ្ហភាពអប្បបរមានឹងធ្លាក់ចុះមកនៅក្រោម២០អង្សាសេ ហើយនៅថ្ងៃបន្តបន្ទាប់ក្នុងរង្វង់១សប្ដាហ៍នេះ វានឹងបន្តធ្លាក់ចុះបន្ថែមទៀត រហូតដល់កម្រិត១៥អង្សាសេ។ ជាពិសេសតំបន់មួយចំនួននៃក្រុងសំរោង និងបណ្ដាស្រុកមួយចំនួនទៀត ដែលស្ថិតនៅតាមខ្នងភ្នំនៃជួរភ្នំដងរែក»។
បើតាមលោក ញើន កួន នៅមុនពេលមានអាកាសធាតុត្រជាក់មកដល់ រដ្ឋបាលខេត្តឧត្តរមានជ័យ តែងតែផ្សព្វផ្សាយអប់រំសុខភាពដល់ពលរដ្ឋនៅតាមមូលដ្ឋាន និងផ្ដល់អំណោយជាអាវរងារ ឬជាសម្លៀកបំពាក់ក្រាស់ៗដល់ចាស់ជរា និងគ្រួសារក្រីក្រ ដើម្បីប្រើប្រាស់ សម្រាប់រក្សាភាពកក់ក្ដៅនៅក្នុងរាងកាយ។ ម្យ៉ាងទៀតលំនៅឋានរបស់ពលរដ្ឋ នាពេលបច្ចុប្បន្ន មានភាពរឹងមាំ ដែលធន់នឹងអាកាសធាតុ មិនដូចកាលពីជាង ១០ ឆ្នាំមុន លំនៅឋានពលរដ្ឋក្នុងតំបន់ជនបទដាច់ស្រយាល ភាគច្រើន មិនមានជញ្ជាំងបាំងបិទគ្រប់គ្រាន់នោះទេ។
ទោះយ៉ាងណា ប្រជាសហគមន៍ជនជាតិដើមភាគតិចគ្រឹង ក្នុងឃុំពូជ្រៃ ស្រុកពេជ្រាដា ខេត្តមណ្ឌលគិរី លោកឡា មី ប្រាប់ភ្នំពេញប៉ុស្តិ៍ថា អ្នកភូមិមួយចំនួនក្នុងសហគមន៍របស់គាត់ នៅតែមិនប្រើប្រាស់អាវរងា សម្រាប់រក្សាកំដៅនៅក្នុងរាងកាយនោះទេ តែប្រើវិធីបុរាណ គឺដុតបំពក់ភ្នក់ភ្លើង។
លោកឡា មី និយាយថា៖«ខ្ញុំនិងក្រុមគ្រួសារ បានរៀបចំរួចជាស្រេចនូវអាវរងារ និងថ្នាំពេទ្យមួយចំនួន សម្រាប់ព្យាបាលជំងឺ ដែលបង្កឡើងពីអាកាសធាតុត្រជាក់នេះ ប៉ុន្តែអ្នកភូមិខ្ញុំមួយចំនួនពួកគាត់មិនប្រើប្រាស់វាទេ។ ពួកគាត់នៅតែស្លៀកពាក់សម្លៀកបំពាក់ប្រពៃណី និងដុតបំពក់ភ្លើង ដើម្បីកំដៅរាងកាយ ហើយប្រើប្រាស់ថ្នាំឫសឈើ ដែលរកបានពីក្នុងព្រៃសហគមន៍ និងព្រៃការពារដែនជម្រកសត្វ»។
ប៉ុន្តែវិធីដុតបំពក់ភ្នក់ភ្លើងដើម្បីកំដៅរាងកាយនេះ អាចបង្កជាគ្រោះអគ្គិភ័យកើតឡើងនាំឱ្យខូចខាតផ្ទះសម្បែង និង បង្កជាភ្លើងឆេះព្រៃបាន ប្រសិនបើខ្វះការប្រុងប្រយ័ត្ន ព្រោះក្នុងរដូវរងានេះ មានខ្យល់បក់ខ្លាំង។ នេះបើតាមលោកនេត វន្ថា ប្រធាននាយកដ្ឋានបង្កា ពន្លត់អគ្គិភ័យ និងសង្គ្រោះនៃក្រសួងមហាផ្ទៃ។
លោកថ្លែងថា៖«បើអាចចៀសវាងបាន ក្នុងរដូវរងានេះ បងប្អូនប្រជាពលរដ្ឋក្នុងតំបន់ទីជនបទ គួរបញ្ឈប់ការដុតបំពក់ភ្លើងសម្រាប់កំដៅរាងកាយ ហើយប្ដូរមកស្លៀកពាក់អាវរងាទាំងអស់គ្នា។ ព្រោះភ្នក់ភ្លើងវាអាចបង្កជាអគ្គិភ័យឆេះឆាបរាលដាលជាភ្លើងឆេះព្រៃ និងឆេះផ្ទះសម្បែង ហើយអាចប៉ះពាល់ដល់អាយុជីវិត ប្រសិនបើខ្វះការប្រុងប្រយ័ត្ន»។
ក្នុងរដូវរងា បទល្មើសធនធានធម្មជាតិ អាចនឹងកើតមានច្រើនក្នុងតំបន់ដែនជម្រកសត្វព្រៃ ព្រោះវាជារដូវកាលមួយ ដែលប្រជាសហគមន៍ជនជាតិដើមភាគតិចក្នុងភូមិភាគឦសាន និយមចូលទៅរកប្រមូលផលនិងអនុផលព្រៃឈើ តាមបែបប្រពៃណីរបស់ពួកគេ ហើយក្រុមជនឱកាសនិយមមួយចំនួន តែងតែលួចបន្លំធ្វើសកម្មភាពកាប់បំផ្លាញព្រៃ និងបរបាញ់សត្វព្រៃ។នេះបើតាមលោកផាន់ សុផាត មេបញ្ជាការរងកងរាជអាវុធហត្ថ ខេត្តមណ្ឌលគិរី ទទួលបន្ទុកបង្ក្រាបបទល្មើសធនធានធម្មជាតិ។
លោកថ្លែងថា៖«ថ្វីដ្បិតអាកាសធាតុត្រជាក់បានមកដល់ ប៉ុន្តែវាមិនមែនជាឧបសគ្គសម្រាប់ការចុះល្បាតព្រៃ ស្រាវជ្រាវនិងបង្ក្រាបបទល្មើសធនធានធម្មជាតិនោះទេ។ ព្រោះក្រុមការងារយើងបានទទួលអំណោយជាអាវរងា ពីសម្ដេចតេជោ រួចរាល់ហើយ»៕
