.jpg)
អាជ្ញាធរជាតិអប្សរាបណ្ដុះបណ្ដាលភ្នាក់ងារទេសចរណ៍ ពីការរៀបចំសណ្ដាប់ធ្នាប់ថ្មនៅតាមប្រាសាទ។ រូបថត ANA
សៀមរាបៈ អាជ្ញាធរជាតិអប្សរាបានរៀបចំវគ្គបណ្ដុះបណ្ដាលពីការរៀបចំសណ្ដាប់ធ្នាប់ថ្មតាមប្រាសាទដល់ភ្នាក់ងារទេសចរណ៍ប្រចាំប្រាសាទ ដើម្បីពង្រឹងសមត្ថភាពជំនាញ និងចូលរួមអភិរក្សបេតិកភណ្ឌដ៏អស្ចារ្យនេះឱ្យបានគង់វង្សយូរអង្វែង។
អាជ្ញាធរជាតិអប្សរាបានឱ្យដឹងថាដោយសារកត្តាធម្មជាតិ និងអាយុកាលនៃថ្មបានធ្វើឱ្យថ្មតាមប្រាសាទជាច្រើនប្រឈមនឹងហានិភ័យខ្ពស់។ ដើម្បីឆ្លើយតបនឹងបញ្ហានេះ អាជ្ញាធរជាតិអប្សរាបានបង្កើតកម្មវិធីបណ្តុះបណ្តាលជាច្រើន ដើម្បីអភិវឌ្ឍធនធានមនុស្សជាអ្នកបន្តវេននាពេលអនាគត។
អាជ្ញាធរជាតិអប្សរាបានឱ្យដឹងថា «ក្នុងន័យនេះ វគ្គបណ្តុះបណ្តាលអំពីការរៀបចំសណ្តាប់ធ្នាប់ថ្មនៅតាមប្រាសាទរៀបចំឡើងក្នុងគោលបំណងពង្រឹងសមត្ថភាពជំនាញជូនភ្នាក់ងារទេសចរណ៍ ដើម្បីជាចំណេះដឹងផ្នែកជំនាញបច្ចេកទេស និងយល់ដឹងពីស្ថានភាពថ្មប្រាសាទទាំងទ្រឹស្តី និងការអនុវត្តជាក់ស្ដែងនៅទីតាំងផ្ទាល់»។
បើតាមអាជ្ញាធរជាតិអប្សរា ភ្នាក់ងារទេសចរណ៍ដែលកំពុងធ្វើការជាប់ជាប្រចាំនៅតាមប្រាសាទ ក៏មានភារកិច្ចចូលរួមជាចាំបាច់ក្នុងការផ្តល់ព័ត៌មានឱ្យបានទាន់ពេលវេលាដល់អ្នកជំនាញអភិរក្ស ពិសេសទាក់ទងនឹងការអភិរក្សថ្មផងដែរ។ វគ្គបណ្តុះបណ្តាលនេះមានរយៈពេល ៤ សប្ដាហ៍គិតចាប់ពីថ្ងៃទី ២៩ ខែវិច្ឆិកា ឆ្នាំនេះតទៅដែលមានទីតាំងនៅប្រាសាទព្រះគោដោយមានសិក្ខាកាមចូលរួម ២០ រូប។
ទីប្រឹក្សាសមាគមទីភ្នាក់ងារទេសចរណ៍កម្ពុជា លោក ហូ វណ្ឌី បានថ្លែងថា ការរៀបចំវគ្គបណ្តុះបណ្តាលនេះពិតជាល្អមែនទែន ហើយវាជារបត់ថ្មីផងដែរ សម្រាប់ផ្តល់ចំណេះដឹងបន្ថែមដល់ភ្នាក់ងារទេសចរណ៍។
លោកថា៖ «ចំពោះការីទេសចរណ៍លោកត្រូវតែផ្តល់ទស្សនទាននេះទៅដល់ភ្ញៀវទេសចរគ្រប់រូប ពីព្រោះថាក្នុងនាមជាប្រតិបត្តិករ ឬអ្នករកទទួលទានក្នុងវិស័យនេះយើងត្រូវតែចូលរួមទប់ស្កាត់ [ការបំផ្លាញ] បេតិកភណ្ឌ ក៏ដូចជាការលើកតម្កើងបេតិកភណ្ឌរបស់ជាតិ និងមនុស្សជាតិក្នុងសកលលោក ព្រោះមិនមែនសម្រាប់តែកម្ពុជាទេ ដោយសារគ្រប់ប្រាង្គប្រាសាទត្រូវបានដាក់បញ្ចូលជាបេតិកភណ្ឌពិភពលោក»។
លោកបានបន្តថា កន្លងមកសមាគមតែងតែគាំទ្រយុទ្ធសាស្ត្រនេះ ដោយលោកចាត់ទុកថា ជាយុទ្ធសាស្ត្ររក្សាបាននូវបេតិកភណ្ឌជាតិយូរអង្វែង។
លោកថា៖ «ទន្ទឹមនេះដែរ យើងឃើញថា ឥរិយាបថនេះក៏ធ្វើឱ្យការដើរទស្សនកិច្ចរបស់ភ្ញៀវទេសចរមានតម្លៃ និងមានកិត្តិនាមផងដែរ»។
ពាក់ព័ន្ធការរៀបចំសណ្តាប់ធ្នាប់ថ្មនៅតាមប្រាសាទកន្លងមក លោក វណ្ឌី សង្កេតឃើញថា នៅមានបញ្ហាតិចតួចដោយតំបន់ខ្លះនៅមិនទាន់រៀបចំឱ្យមានសណ្តាប់ធ្នាប់នោះទេ។
លោកថា៖ «កន្លងមកការរៀបចំសណ្តាប់ធ្នាប់នៅតំបន់ប្រាង្គប្រាសាទខ្លះមិនសូវមានសណ្តាប់ធ្នាប់ ដោយសារភ្ញៀវខ្លះគាត់ដើរចុះឡើងមិនទៅតាមការកំណត់របស់អាជ្ញាធរ ហើយថ្មខ្លះមិនទាន់បែកបាក់ មិនទាន់បានរៀបចំ»។
យ៉ាងណាក៏ដោយលោកនៅតែមានសុទិដ្ឋិនិយម ចំពោះកំណើនភ្ញៀវទេសចរទៅលេងរមណីយដ្ឋានអង្គរ បន្ទាប់ពីរាជរដ្ឋាភិបាលកម្ពុជាអនុញ្ញាតទទួលភ្ញៀវទេសចរក្រៅប្រទេសដែលបានចាក់វ៉ាក់សាំងរួចរាល់។
ដោយឡែក អាជ្ញាធរជាតិអប្សរាគ្រោងនឹងបញ្ចប់ការងារដំឡើងព្រះសិរទេវតាចំនួន ៦ និងអសុរាចំនួន ៧ នៅខ្លោងទ្វារតាកាវនៃក្រុងអង្គរធំ ក្នុងរយៈពេល ១ ខែទៀត។
ស្ថាបត្យករ និងជាក្រុមការងារបច្ចេកទេសជួសជុលខ្លោងទ្វារតាកាវ កញ្ញា ម៉េង សុវណ្ណលីលីន បានឱ្យដឹងថា ក្រុមការងារកំពុងបង្ហើយការងារជួសជុល និងដំឡើងព្រះសិរទេវតា និងអសុរា ការងារបំពេញថ្មភក់ថ្មី ការងារដាប់ក្បាច់ និងការងារដំឡើងតួមេទ័ពទេវតា មុននឹងបញ្ចប់ការងារដំឡើងព្រះសិរនៃចម្លាក់កូរសមុទ្រទឹកដោះ គម្រោងជួសជុលខ្លោងទ្វារតាកាវនៃក្រុងអង្គរធំ។
សូមជម្រាបថា ព្រះសិរទេវតា និងព្រះសិរអសុរាចំនួន ១៣ ត្រូវបានរកឃើញក្នុងពេលធ្វើកំណាយស្រាវជ្រាវបុរាណវិទ្យាដែលក្នុងនោះប្រទះឃើញព្រះសិរទេវតាចំនួន ៦ (ព្រះសិរពេញរូបរាងចំនួន ៤ និងពាក់កណ្ដាលចំនួន ២) និងព្រះសិរអសុរាចំនួន ៧ (ព្រះសិរពេញរូបរាងចំនួន ៦ និងពាក់កណ្ដាលចំនួន ១)៕
