.jpg)
ប៉ាណូផ្សាយពាណិជ្ជកម្មគ្រឿងស្រវឹងនៅតាមផ្លូវព្រះមុនីវង្ស ក្បែរស្ពានអាកាសក្បាលថ្នល់។ ហេង ជីវ័ន
ភ្នំពេញៈ សមាគមនារីកម្ពុជា ដើម្បីសន្តិភាព និងអភិវឌ្ឍន៍ និងអង្គការចលនាដើម្បីសុខភាពកម្ពុជា ស្នើឱ្យមានការហាមផ្សាយពាណិជ្ជកម្មគ្រឿងស្រវឹងគ្រប់ទម្រង់ ដោយហេតុថា ការផ្សាយពាណិជ្ជកម្មគ្រឿងស្រវឹងគឺជាមូលហេតុចម្បងមួយដែលជំរុញឱ្យប្រជាជនប្រើប្រាស់គ្រឿងស្រវឹងកាន់តែច្រើន ខណៈអំពើហិង្សា និងដើមហេតុនៃការកើតជំងឺផ្សេងៗ រួមទាំងគ្រោះថ្នាក់ចរាចរណ៍ ភាគច្រើនបង្កឡើងដោយសារការប្រើប្រាស់គ្រឿងស្រវឹង។
ការស្នើនេះត្រូវបានធ្វើឡើង នៅក្នុងសិក្ខាសាលាក្រោមប្រធានបទ “ផលប៉ះពាល់នៃគ្រឿងស្រវឹង” ដែលរៀបចំដោយស្ថាប័នទាំងពីរខាងលើ ដើម្បីលើកជាយោបល់ បញ្ហាប្រឈម និងរកដំណោះស្រាយរួមគ្នា ក្នុងការហាមឃាត់ការផ្សព្វផ្សាយគ្រឿងស្រវឹងគ្រប់ទម្រង់កាលពីថ្ងៃទី ២៩ ខែ វិច្ឆិកា។ បញ្ហាដែលត្រូវបានលើកឡើងនោះរួមមានគ្រោះថ្នាក់ចរាចរណ៍ អំពើហិង្សា ការជួញដូរមនុស្ស ការឆ្លងជំងឺកូវីដ ១៩ និងកើតជំងឺផ្សេងៗទៀត ដែលសុទ្ធសឹងតែបង្កឡើងពីការប្រើប្រាស់គ្រឿងស្រវឹង។
អនុប្រធានសមាគមនារីកម្ពុជា ដើម្បីសន្តិភាព និងអភិវឌ្ឍន៍លោកស្រី ជូ ប៊ុនអេង បានថ្លែងថា គោលបំណងនៃអង្គសិក្ខាសាលានេះ គឺដើម្បីចែករំលែកចំណេះដឹងស្តីពីផលប៉ះពាល់នៃការប្រើប្រាស់គ្រឿងស្រវឹង និងការឆ្លងជំងឺកូវីដ ១៩ និងស្វែងរកការកំហិតការផ្សាយពាណិជ្ជកម្មគ្រឿងស្រវឹង ដែលមូលហេតុនាំឱ្យការសេពគ្រឿងស្រវឹងក្នុងបរិមាណច្រើន។
លោកស្រីបន្តថា កម្មវិធីនេះក៏ធ្វើឡើងក្នុងគោលបំណងបំផុសការយល់ដឹង និងកង្វល់អំពីផលប៉ះពាល់នៃគ្រឿងស្រវឹងចំពោះសង្គម ជាពិសេសការរំលោភបំពានផ្លូវភេទ ការជួញដូរមនុស្សផងដែរ។
លោកស្រីបញ្ជាក់ថា៖ «ម្យ៉ាងវិញទៀត កម្មវិធីនេះក៏មានគោលបំណងកំណត់រកគំនិតផ្ដួចផ្ដើមក្នុងការស្នើឡើងនូវយុទ្ធសាស្ត្រជាតិជាអាទិភាពសម្រាប់ការឆ្លើយតបទៅនឹងផលប៉ះពាល់សង្គមដោយគ្រឿងស្រវឹង»។
ជាមួយគ្នានេះដែរលោក មុំ គង់ នាយកប្រតិបត្តិអង្គការចលនាដើម្បីសុខភាពកម្ពុជា មានប្រសាសន៍ថា តាមរយៈកម្មវិធីនេះសមាជិកអង្គសិក្ខាសាលាទាំងមូលបានសំណូមពរដល់អាជ្ញាធរពាក់ព័ន្ធត្រូវមានវិធានការផ្សេងៗ ជាពិសេសវិធានការទៅលើការហាមឃាត់ការផ្សាយពាណិជ្ជកម្មគ្រឿងស្រវឹង។
លោកក៏បានគូសបញ្ជាក់ថា ការផ្សាយពាណិជ្ជកម្មគ្រឿងស្រវឹង នាពេលបច្ចុប្បន្នស្ថិតនៅក្នុងកម្រិតមួយគួរឱ្យព្រួយបារម្ភ។ លោកបន្តថា៖ «ការប្រើប្រាស់រង្វាន់ទាក់ទាញ ការប្រើប្រាស់តារាល្បីៗតាមគ្រប់មធ្យោបាយមានលក្ខណៈទាក់ទាញយ៉ាងខ្លាំងដល់ស្ត្រី កុមារ និងយុវជន ឱ្យប្រើប្រាស់គ្រឿងស្រវឹងប្រកបដោយគ្រោះថ្នាក់។
ពាក់ព័ន្ធនឹងការផ្សព្វផ្សាយគ្រឿងស្រវឹងនេះដែរ កាលពីខែឧសភា ឆ្នាំ ២០២១ អភិបាលខេត្តកំពង់ស្ពឺ លោក វ៉ី សំណាង បានដាក់បទបញ្ជាឱ្យអាជ្ញាធរពាក់ព័ន្ធ ធ្វើការរុះរើចេញជាបន្ទាន់នូវស្លាកប៉ាណូដែលបានលើកតាំងផ្សព្វផ្សាយពីផលិតផលស្រាបៀរផ្សេងៗ។
លោកបានបញ្ជាក់ទៀតថា៖ «ចាប់ពីពេលនេះតទៅ សុំឱ្យមានការរុះរើប៉ាណូផ្សព្វផ្សាយផលិតផលស្រាបៀរទាំងអស់ ចេញពីក្របខ័ណ្ឌដែនដីខេត្តកំពង់ស្ពឺ ដោយដាក់ជំនួសមកវិញនូវប៉ាណូទាំងឡាយណា ដែលជួយដល់សុខភាពពលរដ្ឋទូទៅ ព្រោះប៉ាណូ (ស្រាបៀរ) ទាំងនេះ វាគ្មានចំណេញអ្វីដល់សង្គមជាតិនោះទេ»។
បើតាមរដ្ឋបាលខេត្តកំពង់ស្ពឺបច្ចុប្បន្នស្លាកផ្សាយពាណិជ្ជកម្មស្រាបៀរនៅក្នុងខេត្តនេះត្រូវបានដកចេញអស់ហើយ។
យោងសេចក្តីប្រកាសព័ត៌មានរបស់អង្គការចលនាដើម្បីសុខភាពកម្ពុជាបានឱ្យដឹងថា ការប្រើប្រាស់គ្រឿងស្រវឹង បង្កឱ្យមានជំងឺជាង ២០០ មុខរួមមាន ជំងឺប្រព័ន្ធរំលាយអាហារ ជំងឺប្រព័ន្ធសរសៃប្រសាទ និងជំងឺប្រព័ន្ធបន្តពូជ។ លើសពីនេះគ្រឿងស្រវឹង ជាកត្តាចម្បងដែលបង្កឱ្យមានគ្រោះថ្នាក់ចរាចរណ៍ហើយក៏ជាកត្តាហានិភ័យ ជំរុញឱ្យមានអំពើហិង្សាគ្រប់ប្រភេទ។
សេចក្តីប្រកាសបន្តថា បើតាមលទ្ធផលស្រាវជ្រាវរបស់ក្រសួងកិច្ចការនារីបានបង្ហាញថា ភាពញឹកញាប់ និងភាពធ្ងន់ធ្ងរនៃអំពើហិង្សាក្នុងគ្រួសារកើនឡើងស្របគ្នាជាមួយការកើនឡើងនៃការសេពគ្រឿងស្រវឹងរបស់ដៃគូ។
បើយោងតាមអង្គការសុខភាពពិភពលោកគ្រឿងស្រវឹងបានបណ្ដាលឱ្យមានអ្នកស្លាប់ប្រមាណ ៣ លាននាក់ក្នុងមួយឆ្នាំៗនៅលើពិភពលោក៕
