.jpg)
ម៉ូតូ ១ គ្រឿងជិះឆ្លងកាត់មុខក្រសួងអប់រំ យុវជន និងកីឡា កាលពីថ្ងៃទី ៣០ វិឆ្ឆិកា ឆ្នាំ ២០២០។ ហុង មិនា
ភ្នំពេញៈ ក្រសួងអប់រំ យុវជន និងកីឡា ប្រកាសជ្រើសរើសនិស្សិតអាហារូបករណ៍ចំនួន ៣០ រូបទៅបន្តការសិក្សានៅតាមសាកលវិទ្យាល័យនានានៅប្រទេសហុងគ្រី ក្រោមកម្មវិធីអាហារូបករណ៍ Stipendium Hungaricum។
យោងតាមសេចក្តីជូនដំណឹងរបស់ក្រសួងអប់រំកាលពីថ្ងៃទី ១៦ វិច្ឆិកាឱ្យដឹងថា កម្មវិធីអាហារូបករណ៍នេះ ផ្តល់អាហារូបករណ៍ចំនួន ៥ ប្រភេទដែលក្នុងនោះមានអាហារូបករណ៍ថ្នាក់បរិញ្ញាបត្រ ១០ កន្លែងលើមុខជំនាញកសិកម្ម មនុស្សសាស្ត្រ វិស្វកម្ម សេដ្ឋកិច្ច និងវិទ្យាសាស្ត្រ ធម្មជាតិ។ ថ្នាក់បណ្ឌិត ៤ កន្លែង លើមុខជំនាញណាក៏បានជាភាសាហុងគ្រី ឬអង់គ្លេស ថ្នាក់បរិញ្ញាបត្រជាន់ខ្ពស់ ១០ កន្លែង លើមុខជំនាញកសិកម្ម មនុស្សសាស្ត្រ វិស្វកម្ម សេដ្ឋកិច្ច សិល្បៈ និងវិទ្យាសាស្ត្រធម្មជាតិ។
ក្រៅពីនេះក៏ផ្តល់ជូន ២ កន្លែងលើការសិក្សាមួយចប់ក្នុងមុខជំនាញណាមួយក៏បាន និងអាហារូបករណ៍រយៈពេល ១០ ខែ ៤ កន្លែងសម្រាប់វគ្គបណ្តុះបណ្តាលជំនាញដែលបង្រៀនជាភាសាអង់គ្លេស ដល់និស្សិតដែលមានសញ្ញាបត្រឯកទេសរួច។
យោងតាមសេចក្តីជូនដំណឹងដដែល បេក្ខជនដែលមានបំណងចូលរួមប្រជែងយកអាហារូបករណ៍ត្រូវដាក់ពាក្យតាមអនឡាញនៅលើគេហទំព័រ apply.stipendiumhungaricm.hu ឬ www.stipendiumhungaricum.com ឱ្យបានមុនថ្ងៃទី ១៥ ខែមករា ឆ្នាំ ២០២២។ បន្ថែមពីនេះបេក្ខជនក៏តម្រូវឱ្យចុះឈ្មោះនៅឯការិយាល័យអាហារូបករណ៍ និងកម្មសិក្សា នៅអគារលេខ ៨០ មហាវិថីព្រះនរោត្តម រហូតដល់ថ្ងៃទី ២១ មករា ឆ្នាំ ២០២២។
ក្រសួងអប់រំ នឹងរៀបចំធ្វើការប្រឡងលើវិញ្ញាសាភាសាអង់គ្លេស និងវប្បធម៌ទូទៅ ចំពោះថ្នាក់ក្រោយឧត្តមសិក្សា មធ្យមសិក្សា និងវិញ្ញាសា ភាសាអង់គ្លេស និងគណិតវិទ្យាសម្រាប់ថ្នាក់ឧត្តមសិក្សា ផ្អែកលើចំនួនបេក្ខជន ដែលបានដាក់ពាក្យ។ កាលបរិច្ឆេទជាក់លាក់នៃការប្រឡង និងមណ្ឌលប្រឡងនឹងជម្រាបជូននៅពេលក្រោយ។
លោក រស់ សុវាចា អ្នកនាំពាក្យក្រសួងអប់រំប្រាប់ភ្នំពេញប៉ុស្តិ៍ថា ដៃគូអភិវឌ្ឍន៍រួមមានប្រទេសហុងគ្រីបាននិងកំពុងដើរតួនាទីសំខាន់ក្នុងការចូលរួមលើកកម្ពស់គុណភាពមូលធនមនុស្សកម្ពុជា តាមរយ:គ្រប់រូបភាព ដូចជាការផ្តល់ឱកាសអាហារូបករណ៍ដែលផ្នែកសំខាន់មួយក្នុងការចូលរួមលើកកម្ពស់គុណភាពមូលធនមនុស្សសម្រាប់អភិវឌ្ឍសេដ្ឋកិច្ចកម្ពុជាលើគ្រប់វិស័យនាពេលបច្ចុប្បន្ន និងអនាគត។
លោកថ្លែងថា៖ «នេះជាឱកាសអាហារូបករណ៍ដែលឆ្លើយតបទៅនឹងការអប់រំពលរដ្ឋសកលដែលមានបំណងចូលរួមពង្រឹងសមត្ថភាពសិស្សនិស្សិតគ្រប់កម្រិតឱ្យក្លាយជាពលរដ្ឋសកលដែលមានចរិយាសម្បទា វិជ្ជាសម្បទា បំណិនសម្បទា និងគុណតម្លៃឆ្លើយតបនឹងបរិបទជាតិ តំបន់ និងពិភពលោក»។
កញ្ញា វ៉ា វិសិដ្ឋម៉ូល្លីកា និស្សិតដែលទទួលបានអាហារូបករណ៍ថ្នាក់បរិញ្ញាបត្រជំនាញទំនាក់ទំនងអន្តរជាតិទៅកាន់ប្រទេសហុងគ្រីកាលពីឆ្នាំ ២០១៩ ថ្លែងថា គោលបំណងរបស់កញ្ញាចំពោះការសិក្សានៅក្រៅប្រទេសនេះគឺដើម្បីអភិវឌ្ឍចំណេះដឹង និងជំនាញវិជ្ជាជីវៈ។
កញ្ញាបន្តថា៖ «អាហារូបករណ៍ហ្នឹងពិតជាមានន័យមែនទែន សម្រាប់រូបខ្ញុំ និងប្រទេសខ្មែរ ពីព្រោះខ្ញុំរៀននូវជំនាញសិក្សាអន្តរជាតិ។ ដូច្នេះនៅពេលដែលខ្ញុំរៀនពីច្បាប់អឺរ៉ុប ច្បាប់ផ្សេងៗរបស់គេហ្នឹងវាជួយពេលដែលខ្ញុំទៅខ្មែរវិញហ្នឹងខ្ញុំនឹងអាចចែករំលែកអ្វីដែលខ្ញុំបានសិក្សារៀនសូត្រនៅទីនេះ ទៅប្រទេសខ្មែរ និងជួយប្រទេសខ្មែរផ្នែកសេដ្ឋកិច្ចផងដែរ»។
បើតាមលោក រស់ សុវាចា ចាប់តាំងពីឆ្នាំ ១៩៨០ ដល់ឆ្នាំ ២០២០ និស្សិតកម្ពុជាចំនួន ២៧៥ នាក់បានទទួលអាហារូបករណ៍ទៅសិក្សានៅប្រទេសហុងគ្រី។ ជាមួយគ្នានេះ កាលពីឆ្នាំ ២០២០ មាននិស្សិត កម្ពុជាសរុបចំនួន ៤២១ នាក់ ទទួលបានអាហារូបករណ៍ពីប្រទេសផ្សេងៗក្នុងនោះក៏មាននិស្សិតកម្ពុជាចំនួន ១៥ នាក់ផងដែរទទួលបានអាហារូបករណ៍ពីប្រទេសហុងគ្រី៕
រ៉ូ គឹមឡុង
