ភ្នំពេញៈ តុលាការកំពូល នៅថ្ងៃទី ១ ធ្នូ បានលើកយកបណ្តឹងសារទុក្ខរបស់បុរសជាអតីតមន្រ្តីនគរបាលម្នាក់មកជំនុំជម្រះ បន្ទាប់ពីត្រូវបានសាលាឧទ្ធរណ៍ភ្នំពេញ បន្ថយទោសពី ៨ មក ៧ ឆ្នាំ ករណីនាំសង្សាអាយុ ១៦ ឆ្នាំ ឱ្យអ្នកផ្សេងរួមភេទបន្ត ដែលប្រព្រឹត្តនៅរាជធានីភ្នំពេញកាលពីឆ្នាំ ២០១៧។ តំណាងមហាអយ្យការស្នើក្រុមប្រឹក្សាបង្វិលរឿងនេះទៅឱ្យឧទ្ធរណ៍វិញ ដើម្បីបញ្ជាក់ពីមូលហេតុនៃការបន្ថយទោស។
សវនាការជំនុំជម្រះនេះ មានសមាសភាពចៅក្រម ៥ រូប ដែលមានលោកចៅក្រម ជីវ កេង ជាប្រធានក្រុមប្រឹក្សាជំនុំជម្រះ។ជនជាប់ចោទឈ្មោះឌឹម មករា ហៅ តឹក អាយុ ៣៨ ឆ្នាំ បានប្រាប់តុលាការ នៅក្នុងបន្ទប់សវនាការថា រូបគេជាអតីតមន្រ្តីនគរបាលនៅខេត្តព្រៃវែង បានស្រឡាញ់គ្នាជាមួយនារី ឈ្មោះល.ស.ហ អាយុ ១៦ ឆ្នាំ ជាសិស្សសាលា (ឆ្នាំ ២០១៧)។
ជនជាប់ចោទនិយាយថា៖ «ខ្ញុំ និងនាងបានស្រឡាញ់គ្នា និងរស់នៅជាមួយគ្នាដូចជាប្តីប្រពន្ធបាន ៥ ខែ។ ប៉ុន្តែអ្វី ដែលនាងចោទខ្ញុំថា ខ្ញុំយកនាងទៅលក់បន្តនោះគឺជារឿងមិនពិតទេ»។
តាមអង្គហេតុរបស់តុលាការកំពូលបង្ហាញថា នារីរងគ្រោះរស់នៅភូមិមួយ ក្នុងឃុំអន្សោង ស្រុកកំពង់ត្របែក ខេត្តព្រៃវែង។កាលពីថ្ងៃទី ១៧ វិច្ឆិកា ឆ្នាំ ២០១៧ ជនជាប់ចោទបានរួមភេទជាមួយនាង។ បន្ទាប់មកជនជាប់ចោទបាននាំនារីរងគ្រោះមករាជធានីភ្នំពេញ។ អង្គហេតុបន្តថា រយៈពេលរស់នៅរាជធានីភ្នំពេញ ជនជាប់ចោទបានបង្កើតអាខោនហ្វេសប៊ុកមួយដោយដាក់រូបថតរបស់នារីរងគ្រោះ។ គ្រានោះក៏មានបុរសម្នាក់ឈ្មោះណាំ នេត ទាក់ទងស្នេហាជាមួយនារីរងគ្រោះ តាមរយៈហ្វេសប៊ុក ប៉ុន្តែការសរសេរឆ្លើយឆ្លងគ្នា គឺជនសង្ស័យជាអ្នកដើរតួជំនួសនារីរងគ្រោះទាំងអស់។
ជនជាប់ចោទបានលួងលោមជនរងគ្រោះឱ្យរួមភេទជាមួយបុរសម្នាក់នោះជាថ្នូរនឹងម៉ូតូ១គ្រឿង។ ប៉ុន្តែត្រូវឪពុករបស់ជនរងគ្រោះប្តឹងឱ្យសមត្ថកិច្ចចាប់ខ្លួនតែម្តង។ សំណុំរឿងនេះត្រូវបានសាលាដំបូងខេត្តព្រៃវែងបើកសវនាការជំនុំជម្រះ និងប្រកាសសាលក្រមនៅថ្ងៃទី ៥ មិនា ឆ្នាំ ២០១៩ ផ្តន្ទាទោសដាក់ពន្ធនាគារ៨ឆ្នាំនិងបង្គាប់ឱ្យសងសំណងទៅជនរងគ្រោះ ២៨ លានរៀល។ តែជនជាប់ចោទមិនសុខចិត្តប្តឹងជំទាស់មកសាលាឧទ្ធរណ៍ភ្នំពេញ ហើយបានត្រូវសាលាឧទ្ធរណ៍បើកសវនាការ និងប្រកាសសាលដីកានៅថ្ងៃទី៤ ខែមិនា ឆ្នាំ២០២១ សម្រេចបន្ថយទោសពី៨ឆ្នាំ មក៧ឆ្នាំវិញ។
លោកស្រី ស៊ិន សុវ៉ន មេធាវីការពារសិទ្ធិឱ្យជនជាប់ចោទសន្និដ្ឋានថា តុលាការខេត្តព្រៃវែង និងសាលាឧទ្ធរណ៍ភ្នំពេញសម្រេចផ្តន្ទាទោសជនជាប់ចោទ ឈ្មោះ ឌឹម មករា ពុំត្រឹមត្រូវទេ។ ព្រោះបើតាមជនជាប់ចោទថា នារីឈ្មោះ ទ.ស.ហ ព្រមព្រៀងស្រឡាញ់គ្នា គ្មានអ្នកណាបង្ខំអ្នកណាទេ។
លោកស្រីស្នើតុលាការថា៖ «សូមតុលាការកំពូលពិចារណាលើអង្គហេតុ ហើយខ្ញុំស្នើសុំដល់តុលាការ មេត្តាដោះលែងកូនក្តីខ្ញុំ ឱ្យមានសេរីភាពវិញ។ ព្រោះកូនក្តីខ្ញុំ និងនារីរងគ្រោះស្ម័គ្រចិត្តស្រឡាញ់គ្នាទេ»។
លោកស្រីអ៊ុក ស៊ីណាកេត មេធាវីការពារសិទ្ធិឱ្យនារីរងគ្រោះថា កូនក្តីរបស់លោកស្រីអះអាងថា ជនជាប់ចោទបានរំលោភនាង ហើយបានយកនាងឱ្យបុរសម្នាក់ឈ្មោះ ណាំ នេត រំលោភសេពសន្ថវៈជាថ្នូរនឹងម៉ូតូ១គ្រឿង។
លោកស្រីថ្លែងថា៖ «តាមចម្លើយរបស់កូនក្តីខ្ញុំថា ជនជាប់ចោទពិតជាបានបង្កើតអាខោនហ្វេសប៊ុក ហើយអូសទាញបុរសម្នាក់ឱ្យរួមភេទជាមួយកូនក្តីខ្ញុំពិតមែន។ សូមតុលាការតម្កល់ទោសជនជាប់ចោទ តាមសាលដីកា របស់សាលាឧទ្ធរណ៍ភ្នំពេញ និងរក្សាសំណងនៅដដែល»។
លោក អ៊ុក គឹមសិទ្ធិ តំណាងមហាអយ្យការបានប្រាប់ចៅក្រមថា សាលាឧទ្ធរណ៍ភ្នំពេញទទួលស្គាល់ពិរុទ្ធភាពរបស់ជនជាប់ចោទហើយបន្ថយទោសពី ៨ ឆ្នាំ មក ៧ ឆ្នាំវិញ។
លោកថ្លែងថា៖ «តែសាលាឧទ្ធរណ៍មិនបានបញ្ជាក់ពីមូលហេតុនៃការសម្រាលទោសនោះទេ។ ដូច្នេះខ្ញុំស្នើសុំក្រុមប្រឹក្សាជំនុំជម្រះបង្វិលរឿងនេះឱ្យសាលាឧទ្ធរណ៍ដើម្បីបញ្ជាក់ឱ្យច្បាស់ពីមូលហេតុនៃការសម្រាលទោសនោះ»។
ក្រោយពីប្រើពេលជំនុំជម្រះរយៈពេលប្រហែលជិត ១ ម៉ោង លោកចៅក្រមជីវ កេង បញ្ជាក់ថា សាលដីកា នឹងប្រកាស នៅថ្ងៃទី ៨ ខែធ្នូ៕