ព្រះសីហនុៈ លោកនាយករដ្ឋមន្ត្រី ហ៊ុន សែន អញ្ជើញចុះពិនិត្យសមិទ្ធផលនានា ដែលសម្រេចបាននៅខេត្តព្រះសីហនុ ដូចជាផ្លូវថ្នល់ និងស្ថានីយប្រព្រឹត្តិកម្មទឹកកខ្វក់ មុននឹងសម្ពោធដាក់ឱ្យប្រើប្រាស់ជាផ្លូវការនៅថ្ងៃទី ២ ធ្នូ ដោយលោកចាត់ទុកសមិទ្ធផលទាំងនេះជាមោទនភាពរបស់កម្ពុជាសម្រេចបានដោយខ្លួនឯង ដែលខំសន្សំប្រាក់ក្នុងការកសាង។
ក្នុងឱកាសចុះពិនិត្យមើលសមិទ្ធផលហេដ្ឋារចនាសម្ព័ន្ធនានានៅខេត្តព្រះសីហនុ នារសៀលថ្ងៃទី ១ ខែធ្នូ លោកនាយករដ្ឋមន្ត្រី ហ៊ុន សែន មានប្រសាសន៍ថា សមិទ្ធផលទាំងនេះ គឺជាមោទនភាពរបស់កម្ពុជាដែលសម្រេចបានដោយខ្លួនឯង ដែលខំសន្សំប្រាក់ក្នុងការកសាងហេដ្ឋារចនាសម្ព័ន្ធទាំងនេះ។
លោកថ្លែងថា៖ «ទាំងនេះគឺកើតចេញពីការខិតខំរបស់យើង ទាំងការគិត ការទទួលខុសត្រូវ និងការរកប្រាក់ សន្សំប្រាក់ ដើម្បីធ្វើកិច្ចការទាំងអស់នេះ។ នេះជាមោទនភាពជាតិខ្មែររបស់យើង ដែលយើងបានប្រឹងតស៊ូងើបឡើងពីគំនរផេះផង់ ហើយធ្វើឱ្យទីក្រុងមួយនេះដែលជាទីក្រុងគ្មានមនុស្សរស់នៅទៅជាទីក្រុងដ៏ទំនើបមួយ»។
ទន្ទឹមនឹងនេះលោកថា ការអភិវឌ្ឍមិនសំដៅតែលើបញ្ហាការរីកចម្រើនផ្នែកណាមួយនោះទេ បញ្ហាបរិស្ថានក្លាយទៅជាបញ្ហាសំខាន់របស់ជាតិ ហើយក៏ជារបស់ពិភពលោកដែរ។ បើទំនើបត្រឹមតែអគារ មិនគ្រប់គ្រាន់ទេ គឺត្រូវទំនើបទាំងហេដ្ឋារចនាសម្ព័ន្ធ ហើយហេដ្ឋារចនាសម្ព័ន្ធ មិនសំដៅទៅលើបញ្ហាផ្លូវទេ ទាំងបញ្ហាទឹកមុននឹងទម្លាក់ចូលសមុទ្រ ត្រូវតែចម្រាញ់ឱ្យទៅជាទឹកស្អាត។ បើសិនជាធ្វើតែផ្លូវ ច្បាស់ណាស់ ទីក្រុងនេះនឹងធុំក្លិន ដោយសារទឹកដក់ និងមានមូស ឬអាចមានរោគផ្សេងៗកើតឡើង។
លោកបានបញ្ជាក់ថា បញ្ហាបរិស្ថាន គឺអាទិភាពដ៏សំខាន់មួយក្នុងចំណោមអាទិភាពផ្សេងទៀត។ ដូច្នេះហើយទើបរដ្ឋាភិបាលហ៊ានចំណាយលុយរាប់រយលានដុល្លារ ដើម្បីកសាងស្ថានីយប្រព្រឹត្តិកម្មទឹកកខ្វក់មុនបង្ហូរចូលសមុទ្រ។
លោកបញ្ជាក់ថា៖ «ដូច្នេះអ្នកដែលមកមុជទឹកនៅខេត្តព្រះសីហនុ មិនរងនូវហានិភ័យទាក់ទិននឹងការកើតរមាស់ ឬធំក្លិនស្អុយនៅសមុទ្រទេ។ សរុបខ្លីមក កសាងហេដ្ឋារចនាសម្ព័ន្ធចាំបាច់ រាប់ក្នុងនោះមានទាំងប្រព័ន្ធចម្រោះទឹកកខ្វក់ឱ្យទៅជាទឹកស្អាត មុនទម្លាក់ចូលសមុទ្រ ដើម្បីការពារបរិស្ថាន និងការពារធនធានធម្មជាតិក្នុងសមុទ្រ»។
បន្ថែមពីនេះ លោកក៏បានអនុញ្ញាតឱ្យប្រជាពលរដ្ឋដែលរស់នៅក្បែរនោះអាចយកទឹក ដែលចម្រោះចេញពីស្ថានីយប្រព្រឹត្តិកម្មទឹកកខ្វក់យកទៅប្រើប្រាស់ ដោយឥតគិតថ្លៃ សម្រាប់ស្រោចដំណាំ ឬចិញ្ចឹមត្រី។ លោកថា ស្ថានីយនេះបានប្រើប្រាស់បច្ចេកវិទ្យាទំនើបពីប្រទេសអ៊ីស្រាអែល ដែលអាចសម្លាប់មេរោគបានយ៉ាងល្អ។
លោកឱ្យដឹងដែរថា នៅមានទីក្រុងមួយចំនួនទៀតចាំបាច់ត្រូវតែមានស្ថានីយប្រព្រឹត្តិកម្មទឹកកខ្វក់ ដូចជានៅខេត្តកោះកុង កំពត និងខេត្តកែប និងសូម្បីតែខេត្តនៅជាប់ដងទន្លេមេគង្គ និងដងទន្លេសាប ក៏ត្រូវមានដែរ ដើម្បីធានាកិច្ចការពារបរិស្ថាន។
លោក ហ៊ុន សែន បានបញ្ជាក់ទៀតថា សមិទ្ធផលដែលត្រូវបានកសាងទាំងនេះ គឺសម្រាប់ដោះស្រាយជូនមនុស្សជំនាន់នេះផង និងសម្រាប់ក្មេងជំនាន់ក្រោយផង។ លោកប្តេជ្ញាខិតខំធ្វើឱ្យសេដ្ឋកិច្ចមានការរីកចម្រើន ទោះបីធនធាននៅមានកម្រិតក៏ដោយ។
អំឡុងពេលធ្វើដំណើរទៅពិនិត្យត្រង់ផ្លូវបំបែក ដែលបានសរសេរអក្សរធំៗថា «ខ្មែរធ្វើបាន» លោកបានពន្យល់ថា អត្ថន័យនេះ គឺមិនសំដៅសម្រាប់លើកកម្ពស់តួនាទីរបស់លោកក្នុងនាមជានាយករដ្ឋមន្ត្រីនោះទេ។
លោកថ្លែងថា៖ «អត្ថន័យ «ខ្មែរធ្វើបាន» គឺសំដៅ គ្របដណ្ដប់ទាំងអស់តាំងពីបុរាណកាលមក ឧទាហរណ៍ ខ្មែរអាចកសាងប្រាសាទអង្គរវត្តបាន ខ្មែរអាចដឹកនាំប្រទេសឱ្យមានការរីកចម្រើនបាន។
ក្រៅពីនេះលោកនាយករដ្ឋមន្ត្រី ហ៊ុន សែន ក៏បានពន្យល់អត្ថន័យថា អ្វីទៅជាសិលាចាំស្នេហ៍ និងដើមឈើចាំស្នេហ៍ ដែលលោកបានដាក់ឈ្មោះនាពេលកន្លងមក។
លោកមានប្រសាសន៍ថា៖ «ក្នុងចំណុចនេះ ខ្ញុំចង់សំដៅទៅលើភាពគង់វង្សជាអមតៈរបស់វា ដែលខ្ញុំចង់និយាយសំដៅគ្របដណ្តប់ទៅលើសន្តិភាពរបស់ប្រទេសដែលមិនត្រូវឱ្យបាត់បង់ឯករាជ្យ អធិបតេយ្យជាតិ របបរាជានិយមអាស្រ័យរដ្ឋធម្មនុញ្ញ រាជបល្ល័ង្ក ហើយទឹកដីរបស់យើងក៏មិនត្រូវឱ្យបាត់បង់ទេ ទោះបីអ្នកណាគំរាមកំហែង បំផ្លាញក៏ដោយ»។
លោក យង់ គឹមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្ដិភាព សម្តែងការកោតសរសើរដល់រាជរដ្ឋាភិបាលកម្ពុជា ដែលចំណាយថវិកាក្នុងការអភិវឌ្ឍហេដ្ឋារចនាសម្ព័ន្ធ នៅក្រុងព្រះសីហនុឱ្យមានភាពលេចធ្លោ។ លោកក៏បានជំរុញដល់ស្ថាប័នជំនាញ ត្រូវពង្រឹងគុណភាពហេដ្ឋារចនាសម្ព័ន្ធឱ្យបានរឹងមាំ ចៀសវាងបាត់បង់ទំនុកចិត្តពីសាធារណជន។
លោកបានថ្លែងថា៖ «ចំពោះការកសាងហេដ្ឋារចនាសម្ព័ន្ធគួរតែគោរពតាមស្តង់ដា កុំឱ្យប្រជាពលរដ្ឋរអ៊ូថា ធ្វើហើយមិនទាន់បានប៉ុន្មានឆ្នាំផងខូចបាត់។ អ៊ីចឹងអ្វីដែលសំខាន់ត្រូវតែគិតអំពីគុណភាព។ បើខ្វះការត្រួតពិនិត្យច្បាស់លាស់ នោះភាពជឿជាក់ទៅលើសមត្ថភាពរបស់កម្ពុជាក្នុងការកសាងនេះនៅតែជាបញ្ហា»៕
វីដេអូ៖