ភ្នំពេញៈ នៅក្នុងរយៈពេល ១១ ខែក្នុងឆ្នាំ ២០២១ ក្រសួងសាធារណការ និងដឹកជញ្ចូនបានលក់ស្លាកលេខពិសេសផ្ទាល់ខ្លួនបានចំនួន ៤ ៨០២ ស្លាកទទួលបានចំណូលថវិកាប្រមាណ ៣៤ ៥៦៧ ៣៥៣ ៣០០ រៀល និងស្លាកលេខពិសេសរាជធានី-ខេត្ត លក់បាន ២៥ ៣៦៤ លេខទទួលបានចំណូល ថវិកាប្រមាណ ២៧ ៣៥៨ ១៩៧ ២០០ រៀល។
តាមរយៈហ្វេសប៊ុកនៅថ្ងៃទី ១ ខែធ្នូ ក្រសួងសាធារណការ និងដឹកជញ្ជូនបង្ហាញរបាយការណ៍របស់គណៈកម្មការអន្តរក្រសួងគ្រប់គ្រងការលក់លេខចុះបញ្ជីរថយន្តឱ្យដឹងថា ក្នុងរយៈពេល ១១ ខែចាប់ពីខែមករាដល់វិច្ឆិកា ឆ្នាំ ២០២១ ក្រសួង បានលក់ស្លាកលេខពិសេសផ្ទាល់ខ្លួនលក់បានចំនួន ៤ ៨០២ លេខ ទទួលបានចំណូលថវិកាប្រមាណ ៣៤ ៥៦៧ ៣៥៣ ៣០០ រៀល និងស្លាកលេខពិសេសរាជធានី-ខេត្តលក់បាន ២៥ ៣៦៤ លេខទទួលបានចំណូលថវិកាប្រមាណ ២៧ ៣៥៨ ១៩៧ ២០០ រៀល។
លោកស្រី កុយ សុដានី រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានគណៈកម្មការអន្តរក្រសួងគ្រប់គ្រងការលក់លេខចុះបញ្ជីរថយន្តនៅថ្ងៃទី ៣០ ខែវិច្ឆិកា បានដឹកនាំកិច្ចប្រជុំនៅទីស្តីការក្រសួង ដើម្បីពិភាក្សាស្តីពីការរៀបចំវឌ្ឍនភាពការងាររបស់អនុគណៈកម្មការកំណត់តម្លៃ និងរៀបចំការលក់ ឬដេញថ្លៃ និងអនុគណៈកម្មការផ្សព្វផ្សាយ និងផ្តល់ជំនួយបច្ចេកទេសសម្រាប់ឆ្នាំ ២០២១ និងទិសដៅការងារបន្ត ឆ្នាំ ២០២២ ដោយមានការចូលរួមពីសមាជិកសមាជិកានៃអនុគណៈកម្មការទាំង ២។
ក្នុងអង្គប្រជុំនោះលោកស្រី កុយ សុដានី បានថ្លែងអំណរគុណ និងកោតសរសើរយ៉ាងជ្រាលជ្រៅដល់អនុគណៈកម្មការទាំង ២ ដែលបានរាយការណ៍ពីបច្ចុប្បន្នការងារ ក៏ដូចជាបញ្ជាក់បន្ថែមអំពីបច្ចេកទេសព័ត៌មានវិទ្យា និងលទ្ធផលការងារដែលបានខិតខំប្រឹងប្រែងសម្រេចបានក្នុងរយៈពេល ១១ ខែ ឆ្នាំ ២០២១ ជាពិសេសបានកោតសរសើរចំពោះមណ្ឌលប្រឹក្សាយោបល់សេវាសាធារណៈ ដែលបានឆ្លើយតប និងផ្តល់ព័ត៌មានដល់បងប្អូនប្រជាពលរដ្ឋ និងដោះស្រាយបញ្ហាបានទាន់ពេលវេលា។
លោកស្រីរដ្ឋលេខាធិការបានគូសបញ្ជាក់ថា៖ «សមិទ្ធផលការងារសម្រេចបានទាក់ទងនឹងការងារផ្សព្វផ្សាយព័ត៌មានយ៉ាងទូលំទូលាយ ប្រព័ន្ធលក់លេខពិសេសផ្ទាល់ខ្លួនកាន់តែមានភាពល្អប្រសើរពី ១ ឆ្នាំទៅ ១ ឆ្នាំ ដែលបង្ហាញពីភាពចាស់ទុំជាងមុន និងគួរតែលើកយកទៅបង្ហាញនៅក្នុងសន្និបាតបូកសរុបការងារប្រចាំឆ្នាំ ២០២១ និងទិសដៅឆ្នាំ ២០២២ របស់ក្រសួងផងដែរ »។
លោកស្រី កុយ សុដានី បានលើកឡើងអំពីផែនការសកម្មភាពក្នុងការផ្សព្វផ្សាយឱ្យបានទូលំទូលាយអំពីការលក់លេខពិសេសផ្ទាល់ខ្លួន ជាពិសេសការអញ្ជើញក្រុមហ៊ុននានា ឱ្យធ្វើការជាមួយដើម្បីធ្វើការផ្សព្វផ្សាយឱ្យបានទូលំទូលាយ និងបានឯកភាពលើផែនការយុទ្ធនាការផ្សព្វផ្សាយតាមប្រព័ន្ធ DIGITAL។
លោកស្រីថ្លែងថា៖ «ការប្រារព្ធខួប ២ ឆ្នាំនៃការដាក់ឱ្យដំណើរការប្រព័ន្ធលក់លេខពិសេសផ្ទាល់ខ្លួន ការរៀបចំសិក្ខាសាលាផ្សព្វផ្សាយស្ដីពីនីតិវិធីនៃការលក់ស្លាកលេខចុះបញ្ជីពិសេសផ្ទាល់ខ្លួនសម្រាប់រថយន្ដតាមបណ្ដារាជធានី-ខេត្ត ដើម្បីជំរុញការយល់ដឹងបន្ថែមទៀតអំពីលេខពិសេសផ្ទាល់ខ្លួនក៏ដូចជាលេខពិសេសចុះបញ្ជីរថយន្តគ្រួសារ និងរថយន្តធុនស្រាលនៅតាមរាជធានី-ខេត្ត» ។
ជាមួយគ្នានេះ លោកស្រីក៏បានឯកភាពចំពោះការបណ្តុះបណ្តាលក្រុមការងារបច្ចេកទេស (Developer) ឱ្យមានចំណេះដឹងលើផ្នែកព័ត៌មានវិទ្យា (IT) កម្រិតខ្ពស់ផ្នែកដោះស្រាយបញ្ហា (Algorithm) និងបញ្ញាសិប្បនិម្មិត AI (Artificial Intelligence) ដើម្បីឱ្យកាន់ការងារស្លាកលេខពិសេស និងស្លាកលេខពិសេសផ្ទាល់ខ្លួន គឺត្រូវធ្វើយ៉ាងណា ក្រោយពីបានបញ្ចប់ការបណ្តុះបណ្តាលនេះ ក្រុមការងារបច្ចេកទេសទាំងនេះមានសមត្ថភាពពេញលេញអាចធ្វើការងារបានឱ្យកាន់តែមានប្រសិទ្ធភាពជាងមុន៕