.jpg)
ជំនួបរវាងនាយករដ្ឋមន្ត្រីកម្ពុជា-ឡាវ កាលពីថ្ងៃទី ២៩ វិច្ឆិកា។ រូបថត SPM
ភ្នំពេញៈ កម្ពុជា និងឡាវព្រមព្រៀងបង្កើនកិច្ចសហប្រតិបត្តិការទប់ស្កាត់ប្រយុទ្ធប្រឆាំងគ្រឿងញៀន និងឧក្រិដ្ឋកម្មឆ្លងដែនខុសច្បាប់ ដោយជំរុញការពិគ្រោះយោបល់គ្នារវាងមេដឹកនាំនៃប្រទេសទាំង ២ ឱ្យបានទៀងទាត់ និងចែករំលែកព័ត៌មាន រវាងអាជ្ញាធរនៅតាមព្រំដែននៃប្រទេសទាំង ២ ព្រមទាំងការងារបោះបង្គោលព្រំដែនបន្ថែមផងដែរ។
សេចក្តីប្រកាសព័ត៌មានក្រសួងការបរទេសបញ្ជាក់ពីថ្ងៃទី ៣០ ខែវិច្ឆិកាថា៖ «ថ្នាក់ដឹកនាំនៃប្រទេសទាំង ២ បានព្រមព្រៀងជំរុញកិច្ចសហប្រតិបត្តិការបន្ថែមទៀតក្នុងការទប់ស្កាត់ និងបង្ក្រាបសកម្មភាពខុសច្បាប់ តាមរយៈការផ្លាស់ប្តូរ និងចែករំលែកព័ត៌មានរវាងស្ថាប័នមានសមត្ថកិច្ចនៅតំបន់ព្រំដែននៃប្រទេសទាំង ២»។
ការព្រមព្រៀងនេះធ្វើឡើងក្នុងជំនួបទ្វេភាគីកាលពីថ្ងៃទី ២៩ ខែវិច្ឆិកា រវាងលោកនាយករដ្ឋមន្ត្រី ហ៊ុន សែន និងលោក ផនខាំ វីផាវ៉ាន់ នាយករដ្ឋមន្ត្រីឡាវថ្មីដែលបានបំពេញទស្សនកិច្ចនៅកម្ពុជារយៈពេល ២ ថ្ងៃចាប់ពីថ្ងៃទី ២៩ ដល់ថ្ងៃទី ៣០ ខែវិច្ឆិកាដែលជាឱកាសនៃខួបលើកទី៦៥ នៃការបង្កើតទំនាក់ទំនងការទូតរវាងកម្ពុជា និងឡាវ។
សេចក្តីប្រកាសព័ត៌មានបន្តថា «នាយករដ្ឋមន្ត្រីទាំង ២ បានឯកភាពជំរុញបន្តការពិគ្រោះយោបល់គ្នាឱ្យបានទៀងទាត់ និងផ្លាស់ប្តូរទស្សនកិច្ចនៅគ្រប់កម្រិត កិច្ចសហប្រតិបត្តិការផ្លូវច្បាប់ និងកុងស៊ុល ការប្រយុទ្ធប្រឆាំងគ្រឿងញៀន ឧក្រិដ្ឋកម្មឆ្លងដែន ការទប់ស្កាត់ជំងឺឆ្លង និងគ្រោះមហន្តរាយធម្មជាតិ»។
ប្រភពដដែលបន្តថា នាយករដ្ឋមន្ត្រីទាំង ២ បានឯកភាពបន្តជំរុញពន្លឿនការបញ្ចប់សេចក្តីព្រាងផែនការសកម្មភាព សម្រាប់ភាពជាដៃគូយុទ្ធសាស្ត្រគ្រប់ជ្រុងជ្រោយ និងយូរអង្វែងរវាងប្រទេសទាំង ២ ដែលអាចនឹងឈានដល់ការចុះហត្ថលេខាក្នុងពេលដ៏ឆាប់ៗខាងមុខនេះស្របតាមការឯកភាពគ្នាក្នុងជំនួបទ្វេភាគីរវាងលោក ហ៊ុន សែន និងលោក ថងលុន ស៊ីសុលីត អតីតនាយករដ្ឋមន្ត្រីឡាវដែលបានបំពេញទស្សនកិច្ចនៅកម្ពុជាកាលពីថ្ងៃទី ១២-១៣ ខែ កញ្ញា ឆ្នាំ ២០១៩។
ពាក់ព័ន្ធនឹងបញ្ហាព្រំដែនកម្ពុជា និងឡាវសម្រេចបានការខណ្ឌសីមា និងបោះបង្គោលចំនួន ១២១ បង្គោល ស្មើនឹង ៨៦ ភាគរយនៃខ្សែព្រំដែនរួម។ រីឯបញ្ហាដែលនៅសេសសល់ភាគីទាំង ២ បានឯកភាពប្រគល់ភារកិច្ចជូនគណៈកម្មាធិការចម្រុះព្រំដែននៃប្រទេសទាំង ២ ឱ្យពន្លឿនការចរចាលើសន្ធិសញ្ញាកំណត់ព្រំដែនរដ្ឋរវាងកម្ពុជា និងឡាវ សម្រាប់ខ្សែព្រំដែនដែលបានឯកភាព និងពិភាក្សាគ្នាលើការបោះបង្គោលព្រំដែនបំពេញបន្ថែមចន្លោះបង្គោលដែលមានស្រាប់ក្នុងតំបន់ដែលបានឯកភាពគ្នាទាំង ៨៦ ភាគរយនោះព្រមទាំងផលិតផែនទីជាឧបសម្ព័ន្ធនៃសន្ធិសញ្ញាខាងលើនេះ។
ក្រៅពីនេះភាគីទាំង ២ ក៏បានឯកភាពជំរុញឱ្យអាជ្ញាធរពាក់ព័ន្ធថ្នាក់កណ្តាល និងថ្នាក់មូលដ្ឋានរបស់ខ្លួនអនុវត្តភារកិច្ចប្រកបដោយការទទួលខុសត្រូវខ្ពស់ធានាបាននូវសន្តិភាព និងស្ថិរភាពតាមតំបន់ព្រំដែនកម្ពុជា-ឡាវ ដើម្បីប្រែក្លាយតំបន់ព្រំដែនទៅជាតំបន់ប្រកបដោយសន្តិភាព មិត្តភាពយូរអង្វែង និងកិច្ចសហប្រតិបត្តិការ។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជាប្រាប់ ភ្នំពេញ ប៉ុស្តិ៍ កាលពីថ្ងៃទី ១ ខែធ្នូថា ជាញឹកញាយ ព្រំដែនរវាងប្រទេសទាំង ២ បានក្លាយទៅជាកន្លែងឆ្លងកាត់រត់ពន្ធគ្រឿងញៀន ដែលទាមទារឱ្យមានវិធានការរួមរវាងប្រទេសទាំង ២ ពីព្រោះគ្រឿងញៀនជះឥទ្ធិពលអាក្រក់ខ្លាំងសម្រាប់ប្រទេសទាំង ២។
ការបង្កើតនូវយន្តការរួមសម្រាប់ដោះស្រាយបញ្ហាសន្តិសុខផ្សេងៗដូចជាគ្រឿងញៀនការជួញដូរមនុស្ស និងបញ្ហាអសន្តិសុខតាមបណ្តោយព្រំដែននេះ គឺជារឿងសំខាន់។
លោក ភា បានបន្តថា៖ «ទៅមុខទៀតខ្ញុំគិតថា កិច្ចសហប្រតិបត្តិការរវាងប្រទេសទាំង ២ នេះនឹងកាន់តែមានភាពស៊ីជម្រៅទៅលើវិស័យការពារជាតិលើវិស័យសន្តិសុខបន្តទៀត ពីព្រោះបញ្ហាប្រឈមរួមដែលមេដឹកនាំនៃប្រទេសទាំង ២ មើលឃើញក្នុងរូបភាពដូចគ្នា។ បើកាលណាមេដឹកនាំនៃប្រទេសទាំង ២ មើលឃើញក្នុងរូបភាពដូចគ្នាដូច្នេះខ្ញុំគិតថា ការដាក់ចេញនូវវិធានការគោលការណ៍ និងយុទ្ធសាស្ត្ររួមគ្នានេះគឺវាជាលទ្ធភាពមួយដែលអាចទៅរួច ហើយមានការរីកចម្រើនទៅមុខទៀត»៕
