.jpg)
លោក កឹម សុខា ប្រធានអតីតគណបក្សសង្គ្រោះជាតិ និងលោក សម រង្ស៊ី កាលពីឆ្នាំ ២០១៦។ ហុង មិនា
ភ្នំពេញៈ លោក កឹម សុខា ប្រធានអតីតគណបក្សសង្គ្រោះជាតិបានចេញប្រតិកម្មឆ្លើយតបទៅនឹងការចោទប្រកាន់របស់លោក សម រង្ស៊ី លើការចេញសេចក្តីថ្លែងការណ៍របស់លោកកាលពីថ្ងៃទី ២៨ វិច្ឆិកា ពាក់ព័ន្ធនឹងការមិនអនុញ្ញាតឱ្យលោក សម រង្ស៊ី យករូបថត និងឈ្មោះរបស់លោកទៅប្រើប្រាស់ក្នុងសកម្មភាពនយោបាយនោះថា អ្វីដែលលោកធ្វើ គឺធ្វើដោយឆន្ទៈពិតប្រាកដរបស់លោក មិនធ្វើតាមអ្នកណាគំរាមបង្ខំលោកឡើយ។
លោក កឹម សុខា ដែលស្ថិតនៅក្នុងនីតិវិធីរបស់តុលាការក្រោមការចោទប្រកាន់ពីបទ «ក្បត់ជាតិ» នៅឡើយបានសរសេរនៅលើទំព័រហ្វេសប៊ុកផ្លូវការរបស់លោកជាថ្មីទៀតនៅថ្ងៃទី ១ ធ្នូឆ្នាំ ២០២១ ថា៖ «ខ្ញុំធ្វើអ្វីដែលខ្ញុំអាចធ្វើបាន ទៅតាមលទ្ធភាពកាលៈទេសៈ និងដោយឆន្ទៈពិតរបស់ខ្ញុំ មិនធ្វើតាមអ្នកណាគំរាមបង្ខំខ្ញុំឡើយ ជាពិសេសអ្វីដែលខ្ញុំផ្សព្វផ្សាយក្នុងផេចផ្លូវការរបស់ខ្ញុំ»។
ជាមួយគ្នានេះ លោក កឹម សុខា បានបង្ហាញរបាយការណ៍សកម្មភាពមួយចំនួន ដែលលោកបានធ្វើកាលពីអំឡុងខែវិច្ឆិកាកន្លងមក ដោយមានចូលរួមកិច្ចការសាសនាជួបជាមួយនឹងមន្ត្រីទូតប្រចាំនៅកម្ពុជា និងសកម្មភាពមួយចំនួនទៀត ដោយមិនមានអ្នកណាមកបង្ខិតបង្ខំ ឬក៏គំរាមកំហែងនោះទេ។
ភ្នំពេញប៉ុស្តិ៍មិនអាចទាក់ទង លោក ចាន់ ចេន ជំនួយការផ្ទាល់ និងជាអ្នកធ្វើរបាយការណ៍ពីសកម្មភាពរបស់លោក កឹម សុខា ដើម្បីសុំធ្វើអត្ថាធិប្បាយបានទេនៅថ្ងៃទី ១ ខែធ្នូ។ ប៉ុន្តែលោកបានបង្ហោះរបាយការណ៍សកម្មភាពរបស់លោក កឹម សុខា ប្រចាំខែវិច្ឆិកាថា សម្រាប់សកម្មភាពសង្គមកិច្ច សាសនា លោក កឹម សុខា បាននាំយកបច្ច័យ និងទេយ្យវត្ថុទៅចូលរួមបុណ្យកឋិនទានចំនួន ៣ នៅខេត្តតាកែវ ត្បូងឃ្មុំ បាត់ដំបង និង ជូនម៉ាស់ការពារជំងឺឆ្លងទៅដល់ប្រជាពលរដ្ឋនៅតាមជនបទដោយផ្ទាល់ចំនួន ៤ កេះ (១ ម៉ឺនម៉ាស់)។
លោកបន្តថា ពាក់ព័ន្ធនឹងសកម្មភាពការទូតវិញលោក កឹម សុខា បានជួបជាមួយរដ្ឋមន្ត្រីការបរទេស និងជារដ្ឋមន្ត្រីកិច្ចការនារីនៃប្រទេសអូស្ត្រាលីជួបជាមួយឯកអគ្គរដ្ឋទូត សហគមន៍ អឺរ៉ុប និងជួបជាមួយឯកអគ្គរដ្ឋទូត សហរដ្ឋអាមេរិក។
តាមរយៈសកម្មភាព ហ្វេសប៊ុកលោក កឹម សុខា បានផូស្តព្រះរាជសារព្រះមហាក្សត្រផ្ញើជូនលោក ផូស្តសារអបអរសាទរ ទិវាខួបលើកទី ៦៩ ទិវាបុណ្យឯករាជ្យជាតិ និងសារចូលរួមរំលែកទុក្ខ ចំពោះការសោយទិវង្គតសម្តេចក្រុមព្រះ នរោត្តម រណឫទ្ធិ។
កាលពីថ្ងៃទី ២៨ ខែវិច្ឆិកា លោក កឹម សុខា បានសរសេរនៅលើហ្វេសប៊ុកផ្លូវការរបស់លោកថា រហូតមកដល់ពេលនេះ លោក សម រង្ស៊ី និងសហការីនៅតែបន្តយកឈ្មោះ និងរូបថតរបស់លោកទៅប្រើប្រាស់ភ្ជាប់ជាមួយនឹងសកម្មភាពនានាដែលពុំមានការអនុញ្ញាត ឬគាំទ្រពីរូបលោក។
លោកបញ្ជាក់ថា៖ «លើសពីនេះទៅទៀត ជាក់ស្តែងលោក សម រង្ស៊ី និងសហការីបានដើរចេញពីគោលការណ៍ និងស្មារតីដើមនៃការរួបរួម ដោយទៅបង្កើតចលនានយោបាយផ្សេងៗ និងមុខតំណែងខ្លួនឯងជាពិសេសថ្មីៗនេះ គឺការត្រឡប់ទៅគាំទ្រដោយចំហ ឬ នៅពីក្រោយការដឹកនាំគណបក្សនយោបាយចាស់របស់ពួកគេ គឺគណបក្សភ្លើងទៀន»។
លោក កឹម សុខា បានលើកឡើងថា៖ «ទង្វើរបស់ពួកគេសបញ្ជាក់ឱ្យឃើញថា សម រង្ស៊ី និង កឹម សុខា មិនមែនជាមនុស្សតែមួយទេ ព្រោះសកម្មភាពទាំងអស់នេះមិនមានការគាំទ្រ ឬ ជាជំហររបស់ខ្ញុំឡើយ»។
បន្ទាប់ពីលោក កឹម សុខា បានសរសេរសារបែបនេះ នៅក្នុងថ្ងៃដដែលនោះ លោក សម រង្ស៊ី បានសរសេរបង្ហោះនៅលើហ្វេសប៊ុករបស់លោកដោយចាត់ទុកសេចក្តីថ្លែងការណ៍លោក កឹម សុខា ថា៖ «គឺជាលទ្ធផលនៃការគំរាមកំហែងពីសំណាក់លោក ហ៊ុន សែន ដែលភ័យខ្លាចជាទីបំផុត ចំពោះឯកភាពនៃអ្នកប្រជាធិបតេយ្យខ្មែរ ហើយដែលចាប់យកលោក កឹម សុខា ធ្វើជាចំណាប់ខ្មាំងរបស់គាត់»។
លោក ឯម សុវណ្ណារ៉ា សាស្ត្រាចារ្យវិទ្យាសាស្ត្រនយោបាយប្រាប់ភ្នំពេញប៉ុស្តិ៍នៅថ្ងៃទី ១ ខែធ្នូថាលោក សម រង្ស៊ី និងលោក កឹម សុខា បានដល់ដំណាក់កាលមួយចែកផ្លូវគ្នាដើរហើយ បន្ទាប់ពីលោក កឹម សុខា ប្រកាសឱ្យលោក សម រង្ស៊ី បញ្ឈប់យកឈ្មោះ និង រូបលោក ទៅប្រើប្រាស់ក្នុងសកម្មភាពនយោបាយ។
លោកបន្តថា គណបក្សសង្គ្រោះជាតិត្រូវបានគេរំលាយកាលពីចុងឆ្នាំ ២០១៧ ប៉ុន្តែ នៅមានស្មារតីគាំទ្រ។ បើទោះបី លោក កឹម សុខា នៅជាប្រធានគណបក្សនេះ ប៉ុន្តែមិនសូវបានធ្វើសកម្មភាពច្រើនដូចលោក សម រង្ស៊ីនោះទេ ដែលធ្វើឱ្យការកៀរគរកម្លាំង និងការគាំទ្រ នៅមានកម្រិត ដោយសារតែអ្នកនៅក្បែរលោក កឹម សុខា បានដើរចេញទៅបង្កើតបក្សថ្មី។ បើតាមលោក ឯម សុវណ្ណារ៉ា នាពេលបច្ចុប្បន្នតម្លៃនយោបាយភាគច្រើន គឺស្ថិតនៅលើលោក សម រង្ស៊ី ព្រោះលោក សម រង្ស៊ី បានធ្វើសកម្មភាពនយោបាយ និងមានរចនាសម្ព័ន្ធនៅមូលដ្ឋានច្រើនជាងលោក កឹម សុខា។
លោកថ្លែងថា៖ «ការចែកផ្លូវគ្នាហ្នឹងពីណាចេញមុនពីណាវាយប្រហារទៅលើសង្គ្រោះជាតិច្រើន អាចរងផលប៉ះពាល់ច្រើន និងរងការដកសេចក្តីទុកចិត្តពីប្រជាពលរដ្ឋ»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា ថ្លែងថា ករណីលោក សម រង្ស៊ី និងលោក កឹម សុខា ចែកផ្លូវគ្នាដើរនៅពេលនេះនឹងមិនអាចវិលបញ្ចូលគ្នាវិញបានទេ ប៉ុន្តែបើបានក៏ត្រូវប្រើពេលយូរដែរ។ ទោះជាយ៉ាងណា អ្វីដែលត្រូវធ្វើបន្តគឺលោក កឹម សុខា ត្រូវស្នើឱ្យតុលាការបន្តនីតិវិធីឱ្យបានលឿន និងជំរុញឱ្យអ្នកគាំទ្ររបស់គាត់ ដំណើរការគណបក្សសិទ្ធិមនុស្សឡើងវិញ ដើម្បីបន្តជីវភាពគណបក្សឱ្យដូចកាលពីមុនឆ្នាំ ២០១២។
លោកបន្តថា ចំពោះលោក សម រង្ស៊ីមិនអាចចូលរួមប្រឡូកក្នុងនយោបាយបានទេ ព្រោះលោក សម រង្ស៊ី ជាប់បណ្តឹងនៅតុលាការមានចំនួនច្រើន និងមានការបំពានទៅលើព្រះមហាក្សត្រ និងមកលើប្រជាពលរដ្ឋ។ ប៉ុន្តែអ្វីដែលលោក សម រង្ស៊ី អាចធ្វើបានគឺជំរុញឱ្យក្រុមរបស់គាត់ ដំណើរការគណបក្សភ្លើងទៀនដើម្បីចូលរួមបោះឆ្នោតជ្រើសរើសក្រុមប្រឹក្សាឃុំ សង្កាត់ នាពេលខាងមុខ។
លោកថ្លែងថា៖ «ជារឿងមួយល្អ ប្រសិនបើពួកគាត់វិលទៅរកគណបក្សរៀងៗខ្លួនហើយធ្វើនយោបាយ ដោយផ្អែកលើគោលការណ៍ប្រជាធិបតេយ្យ និងប្រកួតប្រជែងដោយស្មើភាពគ្នាទៅ វាសុខសប្បាយទាំងអ្នកនយោបាយ និងប្រជាពលរដ្ឋ ហើយប្រទេសជាតិក៏មិនត្រូវបានសម្លឹងឃើញថា ធាក់ថយប្រជាធិបតេយ្យដែរ»។
ពាក់ព័ន្ធនឹងបញ្ហានេះកញ្ញា កឹម មនោវិទ្យា កូនស្រីរបស់លោក កឹម សុខា កាលពីថ្ងៃទី ៣០ ខែវិច្ឆិកា បានសរសេរនៅលើទំព័រ Twiter ថា លោក កឹម សុខា ដែលជាឪពុករបស់កញ្ញាមានសិទ្ធិក្នុងការបញ្ចេញមតិ ដើម្បីប្រាប់ទៅដៃគូបោកប្រាស់របស់លោក (លោក សម រង្ស៊ី) ឱ្យបញ្ឈប់យករូបលោកឪពុករបស់កញ្ញា ដើម្បីកេងចំណេញ និងបោកប្រាស់សាធារណជនតទៅទៀត។
កញ្ញាសរសេរថា៖ «ភាពជាដៃគូត្រូវបានបញ្ចប់យ៉ាងមានប្រសិទ្ធភាព នៅពេលដែលដៃគូរបស់គាត់ (លោក សម រង្ស៊ី) បានអំពាវនាវឱ្យគណបក្ស និងប្រជាពលរដ្ឋនៅក្នុងប្រទេសកម្ពុជាបោះបង់ចោលគាត់ (កឹម សុខា) នៅពេលដែលគាត់បានជាប់ពន្ធនាគារ និងនៅពេលដែល (លោក សម រង្ស៊ី ) ដឹកនាំយុទ្ធនាការមួយ ដែលពោរពេញដោយការបោកប្រាស់»៕
វីដេអូ៖
