.jpg)
លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល។ រូបថត ក្រសួងសុខាភិបាល
ភ្នំពេញៈ លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស (គ.វ.ក-១៩) បានធ្វើការចែករំលែកនូវបទពិសោធរបស់កម្ពុជាក្នុងការឆ្លើយតបទៅនឹងជំងឺរាតត្បាតជំងឺកូវីដ ១៩ នៅក្នុងកិច្ចប្រជុំពិសេសលើកទី ២ នៃមហាសន្និបាតអង្គការសុខភាពពិភពលោក (WHO) ដែលបានប្រព្រឹត្តឡើងនាថ្ងៃទី ២៩ វិច្ឆិកា ដល់ថ្ងៃទី ០១ ខែធ្នូ ឆ្នាំ ២០២១។
ក្រសួងសុខាភិបាលបានឱ្យដឹងតាមរយៈសេចក្តីជូនព័ត៌មាននាថ្ងៃទី ៣០ ខែវិច្ឆិកាថា កិច្ចប្រជុំពិសេសលើកទី ២ មហាសន្និបាត WHO គឺជាកិច្ចប្រជុំបន្ទាន់ ពិសេសលើកទី ២ ដែលប្រទេសកម្ពុជាជាសមាជិកមួយក្នុងចំណោមប្រទេសជាសមាជិកចំនួន ១៩៤ បានចូលរួម។
ក្រសួងបញ្ជាក់ថា៖ «កិច្ចប្រជុំនេះមានគោលបំណងពិភាក្សាស្វែងរកផលប្រយោជន៍ក្នុងការបង្កើតអនុសញ្ញានៃ WHO ក៏ដូចជាកិច្ចព្រមព្រៀង ព្រមទាំងរៀបចំយុទ្ធោបករណ៍សម្រាប់ប្រើប្រាស់ជាអន្តរជាតិ ដើម្បីពង្រឹងការត្រៀមលក្ខណៈ និងការឆ្លើយតបបន្ទាន់ ចំពោះគ្រោះអាសន្នផ្នែកសុខភាពសាធារណៈ»។
នៅក្នុងកិច្ចប្រជុំពិសេសលើកទី ២ មហាសន្និបាត WHO លោកស្រី ឱ វណ្ណឌីន បានធ្វើការថ្លែងបទអន្តរាគមន៍ ដោយបានលើកអំពីបទពិសោធរបស់កម្ពុជា ក្នុងការឆ្លើយតបទៅនឹងជំងឺរាតត្បាតជាពិសេសការរាតត្បាតពីជំងឺកូវីដ ១៩ ដែលបានឆ្លុះបញ្ចាំងពីសារៈសំខាន់នៃការត្រៀមលក្ខណៈជាមុន។
លោកស្រីក៏បានលើកឡើងផងដែរពីការត្រៀមនូវសមត្ថភាពក្នុងការឆ្លើយតបពីបញ្ហាសុខភាពសាធារណៈ សម្រាប់វាយតម្លៃការឆ្លើយតបបានយ៉ាងឆាប់រហ័ស ដែលកិច្ចការទាំងនេះអាចសម្រេចបានដោយជោគជ័យ គឺអាស្រ័យដោយមានការដឹកនាំដ៏ល្អ និងប៉ិនប្រសប់របស់លោក ហ៊ុន សែន។
លោកស្រីថា៖ «ដោយសារភាពជាអ្នកដឹកនាំដ៏ខ្លាំងរបស់សម្តេចតេជោនាយករដ្ឋមន្ត្រី ប្រទេសកម្ពុជាក៏ទទួលបានជោគជ័យ គួរឱ្យកត់សម្គាល់ក្នុងកិច្ចការងារចាក់វ៉ាក់សាំងកូវីដ ១៩ ជូនដល់ប្រជាជននៅក្នុងប្រទេសកម្ពុជារួមជាមួយនឹងការសម្របសម្រួល និងចាត់ចែងរបស់ គ.វ.ក-១៩ ក៏ដូចជាកិច្ចសហប្រតិបត្តិការពហុភាគី ទ្វេភាគី និងវិស័យឯកជន»។
ជាមួយគ្នានេះដែរ កម្ពុជាបានបង្ហាញពីការគាំទ្រការពង្រឹងច្បាប់និយតកម្មអន្តរជាតិឆ្នាំ ២០២៥ (IHR 200g) ដែលជាឧបករណ៍ច្បាប់អន្តរជាតិដ៏សំខាន់មួយសម្រាប់សន្តិសុខ សុខភាពពិភពលោកជាជាងការបង្កើតនូវឧបករណ៍ថ្មីដែលមានលក្ខណៈប្រហាក់ប្រហែល ឬស្ទួនគ្នា។
លោកស្រី វណ្ណឌីន បានបញ្ជាក់ថា៖ «យើងគួរតែពង្រឹងយន្តការ ដែលមានស្រាប់នៅក្រោមក្របខ័ណ្ឌច្បាប់និយតកម្មអន្តរជាតិ ឆ្នាំ ២០២៥ ជាពិសេសគឺផ្តោតសំខាន់ទៅលើសមត្ថភាពស្នូលរបស់ជាតិ និងបែបប្រព័ន្ធតាមលក្ខណៈសកលសម្រាប់ការសង្គ្រោះបន្ទាន់ ផ្នែកសុខភាពសាធារណៈ រួមទាំងការពិចារណាលើសារៈសំខាន់នៃអភិបាលកិច្ចល្អរបស់ប្រទេស ដែលជាសមាជិករបស់អង្គការសុខភាពពិភពលោក (WHO) ក្នុងគោលបំណងបង្កើនកម្លាំងដ៏ស្វាហាប់ដោយជោគជ័យក្នុងការត្រៀមបង្ការ និងការឆ្លើយតបទៅនឹងជំងឺរាតត្បាតនានា»។
កម្ពុជាក៏ស្វាគមន៍លើការពិភាក្សាដើម្បីពិចារណាពីយន្តការមួយចំនួនទៀត ដែលនឹងបំពេញបន្ថែមដល់ច្បាប់និយតកម្មអន្តរជាតិឆ្នាំ ២០២៥ ដើម្បីឆ្ពោះទៅរកការពង្រឹងកិច្ចខិតខំប្រឹងប្រែងជាសកល ថ្នាក់តំបន់ និងថ្នាក់ប្រទេសលើការត្រៀមខ្លួន និងការឆ្លើយតបនឹងជំងឺរាតត្បាត។
លោកស្រីបន្ថែមថា៖ «រាជរដ្ឋាភិបាលកម្ពុជាសម្តែងនូវការកោតសរសើរចំពោះការខិតខំ និងយកចិត្តទុកដាក់របស់ក្រុមការងារសម្រាប់ការពង្រឹងការត្រៀមលក្ខណៈ និងការឆ្លើយតប ចំពោះគ្រាអាសន្នផ្នែកសុខភាពសាធារណៈរបស់អង្គការសុខភាពពិភពលោក»។
លោកស្រី បន្តថាលើសពីនេះកម្ពុជាគាំទ្រដល់ការពិចារណាលើការផ្តល់ហិរញ្ញប្បទានគ្រប់គ្រាន់ និងនិរន្តរភាពលើការលើកកម្ពស់វិធីសាស្ត្រនៃរដ្ឋាភិបាលទាំងមូល និងសង្គមទាំងមូលក្នុងកិច្ចសហការពហុភាគី ទ្វេភាគី និងវិស័យឯកជនផងដែរ៕
