ភ្នំពេញៈ រដ្ឋាករស្វយ័តដឹកជញ្ជូនសាធារណៈរថយន្តក្រុង លើកឡើងពីអត្ថប្រយោជន៍ម៉ូតូអគ្គិសនី E. bike ភ្ជាប់ជាមួយសេវារថយន្តក្រុង ដោយជំរុញឱ្យប្រជាពលរដ្ឋចូលរួមប្រើប្រាស់សេវានេះ បន្ទាប់ពីបានដាក់ឱ្យដំណើរការជាង ១០ គោលដៅក្នុងរាជធានីភ្នំពេញ។
ម៉ូតូអគ្គិសនី E. bike ភ្ជាប់ជាមួយសេវារថយន្តក្រុង ត្រូវសាលារាជធានីដាក់ឱ្យប្រើប្រាស់កាលពីថ្ងៃទី ២ វិច្ឆិកាដំណាលគ្នានឹងការបើកឱ្យប្រើប្រាស់ឡើងវិញនូវសេវារថយន្តក្រុង បន្ទាប់ពីបានផ្អាកមួយរយៈ ដោយសារការរីករាលដាលជំងឺកូវីដ ១៩។
លោក អ៊ាង សុខឃីម អភិបាលរដ្ឋាករស្វយ័ត ដឹកជញ្ជូនសាធារណៈរថយន្តក្រុង ថ្លែងនៅថ្ងៃទី ១ ធ្នូថា ការដាក់ប្រើប្រាស់ម៉ូតូ-អគ្គិសនី E. bike ភ្ជាប់ជាមួយសេវារថយន្តក្រុង ក្នុងពេលនេះ គឺមាន ១១ គោលដៅនៅតាមចំណតឡានក្រុង ដោយមានម៉ូតូអគ្គិសនី ចំនួន ៧៥ គ្រឿង។ ក្នុងពេលខាងមុខ E. bike នេះនឹងពង្រីកខ្លួនឱ្យបាន ២៥០ គ្រឿង។ លោកថា៖ «របៀបប្រើប្រាស់ E. bike នេះ គឺមិនមានបើកឱ្យយើងទេ គឺយើងបើកវាដោយខ្លួនឯង បន្ទាប់ពីចុះពីរថយន្តក្រុងទៅ។ យើងចង់ជិះក៏ជិះហើយបើយើងមិនចង់ជិះក៏អត់ទៅ ហើយពេលជិះហើយ យើងយកទៅទុកនៅណាក៏បានព្រោះក្រុមហ៊ុន គេមានបុគ្គលិករបស់គេទៅប្រមូលយកមកទុកនៅកន្លែងដើមវិញ»។
លោកបន្ថែមថា៖ «សម្រាប់សេវាប្រើប្រាស់ E. bike នេះ គឺដូចជាគេគិត ៤ សេន (ជាង ១៦០ រៀល ក្នុង ១ នាទី) ដោយដាក់លុយដូចកាតទូរស័ព្ទរបស់យើងអ៊ីចឹង។ យើងដាក់លុយក្នុងម៉ាស៊ីនគេទៅ ហើយយើងបញ្ជាតាម App ទាំងការបញ្ឆេះ និងធ្វើដំណើរ ក្រុមហ៊ុន គេតាមដានមើល តាម App ហ្នឹង»។
ចំពោះសារប្រយោជន៍ E. bike វិញលោក សុខឃីម មើលឃើញថាល្អសម្រាប់ប្រជាពលរដ្ឋដែលគ្មានមធ្យោបាយផ្ទាល់ខ្លួន ខណៈការចំណាយលើសេវានេះ ហើយមធ្យោបាយនេះ គឺមិនប៉ះពាល់ដល់បរិស្ថាន និងចូលរួមកាត់បន្ថយការកកស្ទះចរាចរណ៍ ព្រោះតែការចូលរួមប្រើប្រាស់សេវានេះ គឺរួមគ្នា។ «សារប្រយោជន៍របស់វាគឺជួយឱ្យអ្នកដំណើរបានទៅដល់គោលដៅ ដោយសុវត្ថិភាពមានន័យថា បន្ទាប់ពីគាត់ចុះពីរថយន្តក្រុងទៅគាត់មានមធ្យោបាយ សម្រាប់ធ្វើដំណើរបន្តទៅដល់គោលដៅ ឬផ្ទះរបស់គាត់ ដែលជាកន្លែងដែលរថយន្តក្រុងយើងទៅមិនដល់»។
លោក មូល ស៊ុយហេង គ្រូបង្រៀននៃវិទ្យាល័យព្រះស៊ីសុវត្ថិបានលើកឡើងថា E. bike នេះ គឺជាមធ្យោយបាយថ្មីមួយដែលបង្កភាពងាយស្រួលដល់ពលរដ្ឋ ជាពិសេសសិស្សានុសិស្ស។
លោកបន្តថា៖ «ការប្រើប្រាស់វា គឺកាត់បន្ថយចំណាយ និងជួយបរិស្ថានបានច្រើន។ ខ្ញុំនឹងជួយផ្សព្វផ្សាយដល់សិស្សានុសិស្សឱ្យចូលរួមប្រើប្រាស់មធ្យោបាយ E. bike នេះដើម្បីឱ្យគាត់មានឱកាសសន្សំសំចៃថវិកាផង និងបរិស្ថានផង»។
លោក គង់ រតនៈ ប្រធានវិទ្យាស្ថានសុវត្ថិភាពចរាចរណ៍ផ្លូវគោកលើកឡើងថា ចំណុចគន្លឹះនៃការប្រើប្រាស់ E. bike គឺបង្កភាពងាយស្រួល តម្លៃធូរថ្លៃ និងមានគ្រប់ទីកន្លែង។ «ដើម្បីឱ្យពលរដ្ឋប្រើប្រាស់ E. bike នេះត្រូវឱ្យពលរដ្ឋស្គាល់ និងដឹងពីសេវានេះ ដោយមានការលើកទឹកចិត្ត និងមានគំរូពីមនុស្សសំខាន់ៗ...។ បន្ថែមពីនេះគឺត្រូវប្រាកដថាមធ្យោបាយនេះអាចជំនួសមធ្យោបាយផ្ទាល់ខ្លួនគាត់បាន និងផ្តល់ផលចំណេញដល់គាត់»៕
វីដេអូ៖