.jpg)
លោក ហ៊ុន សែន ក្នុងពេលកំពុងបំពេញការងារកន្លងមក ។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន បានអំពាវនាវដល់ប្រជាពលរដ្ឋកុំឱ្យមានការបារម្ភខ្លាំងពេកទាក់ទងនឹងវីរុសកូវីដ ១៩ បំប្លែងថ្មីឈ្មោះអូមីក្រុងនេះ រហូតបាត់ម្ចាស់ការ ហើយលោកក៏បានស្នើឱ្យរដ្ឋមន្ត្រីក្រសួងសុខាភិបាលពិចារណាក្នុងការដកចេញវិញនូវបម្រាមនៃការធ្វើដំណើររបស់អ្នកដំណើរពីប្រទេសចំនួន ១០ នៃអាហ្វ្រិកខាងត្បូង ចូលមកកម្ពុជា។
លោកបានថ្លែងដូចនេះនាព្រឹកថ្ងៃទី ២ ខែ ធ្នូ ឆ្នាំ ២០២១ ក្នុងពិធីដាក់ឱ្យប្រើប្រាស់ផ្លូវចំនួន៣៧ខ្សែ និងអាងប្រព្រឹត្តកម្មទឹកកខ្វក់ចំនួន៣ នាខេត្តព្រះសីហនុ។
លោកបានមានប្រសាសន៍ថា៖ «ទោះបីជាអូមីក្រុងនេះមកដល់ តែខ្ញុំសុំបញ្ជាក់ថា យើងកុំស្លន់ស្លោហួស កុំភ័យពេករហូតបាត់ម្ចាស់ការ ហើយខាងអាហ្វ្រិកខាងត្បូងក៏បានបញ្ជាក់ដែរថាវាមិនទាន់មានអីផង តែបែរជាប្រកាសគ្រប់កន្លែងទាំងអស់ហាក់ដូចជាបំភ័យមនុស្សគ្រប់កន្លែង»។
លោក ហ៊ុន សែន ក៏បានបន្ថែមថា ទោះជាយ៉ាងណាក៏កម្ពុជាត្រូវតែប្រុងប្រយ័ត្នដែរ ហើយលោកថាបើទុកឱ្យអាហ្វ្រិកឯកោ វាមិនគួរគប្បីទាល់តែសោះ ហើយណាមួយកម្ពុជាក៏មិនមានជើងហោះហើយត្រង់មកកម្ពុជាដែរ។
លោកបានបញ្ជាក់ថា៖ «យើងមិនមានភាពចាំបាច់ក្នុងការកំណត់ក្នុងការហាមឃាត់អ្នកដំណើរមកពីអាហ្វ្រិកទេ ក៏ប៉ុន្តែយើងអាចមានតម្រូវការបង្កើនការធ្វើតេស្តចំពោះអ្នកដំណើរមកពីប្រទេសទាំងនោះវិញ»៕
