ភ្នំពេញៈ ក្រសួងសុខាភិបាលបានប្រកាសឱ្យដឹងថាមនុស្សចំនួន ៥ នាក់បន្ថែមទៀតបានស្លាប់ដោយសារជំងឺកូវីដ ១៩ ក្នុងនោះមាន ៤ នាក់មិនបានចាក់វ៉ាក់សាំងកូវីដ ១៩ និងបានរកឃើញអ្នកឆ្លងថ្មីទៀតជាង ២០ នាក់ និងអ្នកជាសះស្បើយជិត ២០ នាក់។
យោងតាមសេចក្តីប្រកាសរបស់ក្រសួងសុខាភិបាលនាព្រឹកថ្ងៃទី ២ ខែ ធ្នូ ឆ្នាំ ២០២១ នេះ បានឱ្យដឹងថា ក្រសួងបានរកឃើញអ្នកឆ្លងថ្មីចំនួន ២៣ (PCR) នាក់ទៀត និងអ្នកជាសះស្បើយចំនួន ១៩ នាក់។ អ្នកដែលរកឃើញឆ្លងថ្មីនេះមានករណីឆ្លងសហគមន៍ចំនួន ២០ នាក់ និងអ្នកដំណើរពីបរទេសចំនួន ៣ នាក់។
គិតត្រឹមព្រឹកថ្ងៃទី ២ ខែ ធ្នូ ឆ្នាំ ២០២១ កម្ពុជាមានអ្នកឆ្លងវីរុសកូវីដ១៩សរុបចំនួន ១២០ ១៨៣ នាក់ អ្នកជាសះស្បើយសរុបចំនួន ១១៦ ៥៤៨ នាក់ និងអ្នកស្លាប់បានកើនឡើងដល់ចំនួន ២ ៩៤៩ នាក់៕