ភ្នំពេញៈ ក្នុង​រយៈពេល​ ១១ ​ខែ ឆ្នាំ​ ២០២១ ​នេះ សមត្ថកិច្ច​បង្ក្រាប​សារធាតុញៀន​គ្រប់​ប្រភេទ​បាន​ជិត​ ២ ​តោន និង​ឃាត់ខ្លួន​មនុស្ស​បាន​ជាង​ ១ ​ម៉ឺន​នាក់​ក្នុងនោះ​មាន​ជនបរទេស​ជាង​ ៣០០ ​នាក់​។ ​នេះ​បើ​យោងតាម​មន្ត្រី​នៃ​មន្ទីរ​ប្រឆាំង​គ្រឿងញៀន​អះអាង​ដោយ​ផ្អែក​តាម​របាយការណ៍​។

លោក អ៊ិន សុង នាយករង​មន្ទីរ​ប្រឆាំង​គ្រឿងញៀន​នៃ​អគ្គស្នងការដ្ឋាន​នគរបាល​ជាតិ​បាន​ប្រាប់​ភ្នំពេញ​ប៉ុស្តិ៍​នៅ​ថ្ងៃ​​ទី​ ១ ខែធ្នូ​ថា ផ្អែក​តាម​របាយការណ៍​លទ្ធផល​អនុវត្ត​ច្បាប់​ចាប់ពី​ថ្ងៃទី​ ១ ខែមករា ដល់​ថ្ងៃទី​ ៣០ ខែ​វិច្ឆិកា ឆ្នាំនេះ សមត្ថកិច្ច​បង្ក្រាប​គ្រឿងញៀន​បាន​ ៥ ៥៦០ ​ករណី ឃាត់​មនុស្ស ១២ ១៩៣ ​នាក់​ (​ស្រី​៧៣៦ ​នាក់​) ​ក្នុងនោះ ជនបរទេស​ជនបរទេស​ ៣១០ ​នាក់ ស្រី​ ៤៥ ​នាក់ ដែលមាន​ ១៣ ​សញ្ជាតិ​។

លោក​បាន​បន្តថា ក្នុង​កិច្ចការងារ​នេះ​សមត្ថកិច្ច​បាន​ដកហូត​សារធាតុ​ញៀន​គ្រប់​ប្រភេទ​ទម្ងន់​ ១ ​តោន ៧៤៨ ​គីឡូក្រាម ៧០៥,៩១ ​ក្រាម​,​កញ្ឆា ៥០ ០៨៨ ​ដើម​,​កញ្ឆា​សួត​ ១០៤ ​គីឡូក្រាម ៦៩៥ ​ក្រាម និង​សារធាតុ​ផ្សំ​គីមី​ ១ ​តោន​ ១៣៩ ​គីឡូក្រាម​។ បន្ថែម​ពីនេះ​សមត្ថកិច្ច​បាន​ឃាត់ទុក​ទ្រព្យសម្បត្តិ​អចលនទ្រព្យ ១២ ​កន្លែង​ (​ផ្ទះ និង​ដី​) ​ក្នុង​នោះ​នៅ​ខេត្តតាកែវ​ ១ ​កន្លែង បន្ទាយមានជ័យ​ ២ ​កន្លែង កោះកុង​ ១ ​កន្លែង ប៉ោយប៉ែត​ ២ ​កន្លែង សៀមរាប​ ២ ​កន្លែង ភ្នំពេញ​ ៣ ​កន្លែង និង​ខុនដូ​ ២ ​បន្ទប់​នៅ​ភ្នំពេញ​។ ចំណែក គណនី​ធនាគារ​ចំនួន​ ៩ ​គណនី​ និង​សាច់ប្រាក់​ចំនួន ១៦ ០៤៧,១៧ ​ដុល្លារ ត្រូវបាន​បង្កក​។

លោក មាស វិរិទ្ធ អគ្គលេខាធិការ​អាជ្ញាធរ​ជាតិ​ប្រយុទ្ធប្រឆាំង​គ្រឿងញៀន​បាន​ថ្លែងថា លទ្ធផល​បឋម​ចំនួន​ករណី​បង្ក្រាប​មាន​ការថយចុះ រីឯ​បរិមាណ​ចាប់យក​សារធាតុ​ញៀន​មាន​ការកើនឡើង ក៏ប៉ុន្តែ​លោក​ថា ព័ត៌មាន​លម្អិត​នឹង​ជម្រាបជូន​នៅពេល​ធ្វើ​សន្និសីទ​​កាសែត​នៅ​ថ្ងៃទី​ ៦ ខែធ្នូ​ខាងមុខនេះ​។

យ៉ាងណា​ក៏ដោយ លោក​បានបញ្ជាក់​​ថា ថ្វីដ្បិត​ពិភពលោក រួមទាំង​កម្ពុជា ប្រឈម​ទៅនឹង​ការរាតត្បាត​នៃ​ជំងឺ​កូវីដ​ ១៩ ប៉ុន្តែ​កិច្ចការ​ប្រយុទ្ធប្រឆាំង​គ្រឿងញៀន កម្ពុជា​នៅតែ​អនុវត្ត​យ៉ាង​ក្តៅគគុក​។ ​លោក​ថា​៖ «​ក្នុង​កិច្ចការ​នេះ​យើង​ផ្តោត​សំខាន់​ទៅលើ​ក្រុម​អង្គការ​ចាត់តាំង​ធំៗ​ហើយ​ប្រទេស​ជិតខាង​ក៏​រងគ្រោះ​ដូចគ្នា​ដែរ ប៉ុន្តែ​គេ​រងគ្រោះ​ខ្លាំង​ជាង​យើង​»​។

ប្រធាន​សមាគម​សង្គ្រោះ​ជនរងគ្រោះ​ដោយ​គ្រឿងញៀន​កម្ពុជា​លោក មាស សុវណ្ណ បាន​សាទរ​ចំពោះ​សមត្ថកិច្ច​​ពាក់ព័ន្ធ​ដែល​បាន​បង្ក្រាប​ជនល្មើស និង​ដកហូត​សារធាតុ​ញៀន​ធ្វើជា​វត្ថុតាង​​ និង​ដុត​កម្ទេចចោល​។ ទន្ទឹមនឹងនេះ​​លោក​ក៏បាន​ជំរុញ​សមត្ថកិច្ច​អនុវត្ត​ឱ្យ​ម៉ឺងម៉ាត់​ទៅលើ​ជនល្មើស​តាមផ្លូវ​ច្បាប់ និង​ស្រាវជ្រាវ​រក​មេឧក្រិដ្ឋជន​គ្រឿងញៀន ដែលជា​មុខសញ្ញា​ដើមចម​ធំ​នៃ​បញ្ហា​នេះ​។

លោក​ថា​៖ «​សារធាតុញៀន​យើង​ចាប់​​បាន​ហើយ​ទុកជា​ភ័ស្តុតាង​សំខាន់​គឺ​មនុស្ស មានន័យ​ថា មនុស្ស​ដែល​ចាប់បាន​នោះ​ចំ​ទិសដៅ​អត់​? ​ម្នាក់​នោះ​ជា​ឧក្រិដ្ឋជន​គ្រឿងញៀន​មែនដែរ​ឬ​អត់​? ព្រោះ​ចាប់​ភាគច្រើន​បានតែ​អ្នកបម្រើ​ឱ្យគេ ជា​ដៃជើង​គេ តែបើ​យើង​ចាប់បាន​អ្នក​នៅ​ពីក្រោយ​តែម្តង គឺជា​ល្អ​កាន់តែ​ខ្លាំង​»​។ លោក​បាន​បញ្ជាក់ថា បើ​ចាប់​បាន​មេ​គ្រឿងញៀន​ដែលជា​ឫសគល់​នៃ​បញ្ហា នោះ​គ្រឿងញៀន​នឹង​ឆាប់​អស់ហើយ​នឹង​ឈានដល់​ទីបញ្ចប់​។

លោក​ សុវណ្ណ បាន​បន្តថា ក្នុង​មណ្ឌល​បន្សាប​គ្រឿងញៀន​របស់​លោក​នៅ​ឆ្នាំ ២០២១ មាន​អ្នក​មក​បន្សាប​គ្រឿងញៀន​ជាង​ ៣០០ ​នាក់ ប៉ុន្តែ​បច្ចុប្បន្ន​នៅសល់តែ​ ១៨០ ​នាក់​ប៉ុណ្ណោះ ខណៈ​អ្នកខ្លះ​ត្រឡប់​ទៅ​ផ្ទះ​វិញ​ បន្ទាប់ពី​បន្សាប​រួចហើយ​។

លោក​បាន​បញ្ជាក់ថា​៖ «​គិត​ជា​ ១ ​ឆ្នាំនេះ​មាន​ជាង​ ៣០០ ​នាក់ តែបើ​គិត​ជាប្រចាំ​ឥឡូវនេះ​នៅសល់​ ១៨០ ​នាក់​ ព្រោះ​មាន​អ្នកចេញ​មាន​អ្នក​ចូល ចំនួន​នេះ​យើង​អត់​សូវ​ទទួល​ផង ដោយសារ​បញ្ហា​កូវីដ​ ១៩ ដោយសារ​យើង​ចង់​រក្សា​គម្លាត ដើម្បី​កុំឱ្យ​មានការ​ឆ្លង​ក្នុង​មណ្ឌល​»​។

យ៉ាងនេះ​ក្តី លោក​បាន​ព្រមាន​ពី​ហានិភ័យ​ធ្ងន់ធ្ងរ​ចំពោះ​អ្នកប្រើប្រាស់​គ្រឿងញៀន ទោះបីជា​ពួកគេ​ត្រូវ​បាន​បន្សាប​សារធាតុ​គ្រឿងញៀន​រួចហើយ​ក៏ដោយ​។

លោក​ថា​៖ «​អ្នក​មក​បន្សាប​អាស្រ័យ​លើ​ស្ថានភាព​ធ្ងន់​ ឬ​ស្រាល​ដែរ បើ​ប៉ះពាល់​​ធ្ងន់ធ្ងរ​ដល់​ប្រព័ន្ធ​សរសៃប្រសាទ​ត្រូវការ​ពេល​ដល់​ ១ ​ឆ្នាំ ដើម្បី​បន្សាប បើស្រាល​ ៦ ​ខែ​អាច​ប្រសើរ​ឡើងវិញ និយាយ​​ឱ្យចំ​ទៅ​បើ​អ្នក​ធ្លាប់ប្រើប្រាស់​គ្រឿងញៀន​ហើយ​ប្រៀប​ដូច​យើង​របួស​ស្នាមជើងដៃ​អ៊ីចឹង ចុះ​ទម្រាំ​របួសស្នាម​ខួរក្បាល​ប្រព័ន្ធ​សរសៃប្រសាទ អ៊ីចឹង​វា​ងាយ​នឹង​លាប់​ឡើងវិញ​»​។

ពាក់ព័ន្ធ​គ្រឿងញៀន​នេះ លោក​ឧបនាយករដ្ឋមន្ត្រី ស ខេង រដ្ឋមន្ត្រី​ក្រសួងមហាផ្ទៃ​បាន​ឱ្យដឹងថា អ្នក​ជាប់ពន្ធនាគារ​ជាង ៣ ​ម៉ឺន​នាក់​នៅ​ទូទាំងប្រទេស មាន​ ៥០ ​ភាគរយ ពាក់ព័ន្ធ​បញ្ហា​គ្រឿងញៀន​។ លោក​ថា​៖ «​បញ្ហា​នេះ​មិន​ត្រឹមតែ​កម្ពុជា​តែឯង​ទេ​ធ្វើបាន គឺ​ត្រូវការ​ប្រទេស​អន្តរជាតិ​ជួយ​សហការ​គ្នា​»៕