ភ្នំពេញៈ ក្រសួងអប់រំ យុវជន និងកីឡា ប្រកាសអនុញ្ញាតឱ្យបើកដំណើរការសកម្មភាពនិងសេវាកម្មនានា ដើម្បីគាំទ្រដល់ដំណើរការរៀន និងបង្រៀនជាលក្ខណៈបណ្តុំ នៅតាមគ្រឹះស្ថានសិក្សាឯកជននានានៅទូទាំងប្រទេស។
យោងតាមសេចក្តីជូនដំណឹងរបស់ក្រសួងអប់រំ យុវជន និងកីឡា នៅថ្ងៃទី ២ ខែ ធ្នូ ឆ្នាំ ២០២១ បានឱ្យដឹងថា ក្នុងដំណាក់កាលនៃការបើកដំណើរការប្រទេសពេញលេញឡើងវិញលើគ្រប់វិស័វ័យ និងការរស់នៅ ជាមួយជំងឺកូវីដ ១៩ «តាមគន្លងប្រក្រតីភាពថ្មី» ក្រសួងអប់រំ យុវជន និងកីឡាបានអនុញ្ញាតឱ្យចាប់ផ្តើមដំណើរការរៀន និងបង្រៀនជាលក្ខណៈបណ្តុំ សម្រាប់គ្រឹះស្ថានសិក្សាចំណេះទូទៅ និងការបើកដំណើរការឡើងវិញនូវគ្រឹះស្ថានឧត្តមសិក្សា។
សេចក្តីជូនដំណឹងនេះបន្តថា ដើម្បីគាំទ្រដល់ដំណាក់កាលនេះ និងយោងតាមអនុសាសន៍របស់លោកនាយករដ្ឋមន្ត្រី ហ៊ុន សែន ក្រសួងអប់រំ យុវជន និងកីឡាសម្រេចអនុញ្ញាតឱ្យបើកដំណើរការសកម្មភាពនិងសេវាកម្មនានា ។
ដើម្បីគាំទ្រដល់ដំណើរការរៀន និងបង្រៀនជាលក្ខណៈបណ្តុំ នៅតាមគ្រឹះស្ថានសិក្សាឯកជន ក្រសួងអប់រំ យុវជន និងកីឡា បានដាក់ឱ្យដំណើរការដូចតទៅ៖ ១) សកម្មភាពកីឡា ដែលមានការប៉ះទង្គិច ឬការប៉ះពាល់រវាងរូបរាងកាយតិចតួច រួមមាន លំហាត់ប្រាណ អត្តពលកម្ម ការហែលទឹក កីឡាវាយសី។ អាហារដ្ឋាននិងសេវាផ្តល់អាហារដែលអាចគ្រប់គ្រងពេលវេលាចូលទទួលទានអាហាររបស់សិស្សមិនឱ្យកុះករនិងរក្សាគម្លាតសុវត្ថិភាព។
រីឯបណ្ណាល័យ បន្ទប់នេត្រា-សោតទស្សន៍ បន្ទប់ពិសោធន៍ ដែលពុំប្រើប្រាស់ប្រព័ន្ធត្រជាក់ ឬ ប្រព័ន្ធបន្សុទ្ធខ្យល់រួមគ្នា (ដោយត្រូវបើកបង្អួចឱ្យបានទូលាយ)។ សកម្មភាពសិល្បៈ ការរាំ ការប្រគំតន្ត្រី ការសម្តែងកាយវិការ ដែលមានការប៉ះពាល់រវាងរូបរាង កាយតិចតួច (ដោយមានការប្រុងប្រយ័ត្នខ្ពស់ចំពោះការធ្វើអនាម័យលើឧបករណ៍ដែលត្រូវប្រើប្រាស់រួមគ្នា)។
ចំពោះសេវាដឹកជញ្ជូនសិស្សត្រូវបន្តរក្សាគម្លាតសុវត្ថិភាព (មិនអនុញ្ញាតឱ្យអង្គុយជាប់គ្នា) ការបើកដំណើរការសកម្មភាព និងសេវាកម្មនានាដើម្បីគាំទ្រដល់ដំណើរការរៀននិងបង្រៀនជាលក្ខណៈបណ្ដុះដូចរៀបរាប់ខាងលើនឹងត្រូវអនុវត្តស្របតាម គោលការណ៍ប្រតិបត្តិស្តងដា (SOP) ស្ដីពីសេវារថយន្តដឹកសិស្ស សេវាបណ្ណាល័យ សកម្មភាពអប់រំកាយ និងកីឡា សកម្មភាពសិល្បៈ និងសេវាអាហារដ្ឋាននៅតាមគ្រឹះស្ថានសិក្សាសាធារណៈនិងឯកជនក្នុងបរិបទជំងឺកូវីដ ១៩ ចុះថ្ងៃទី ២២ ខែ តុលា ឆ្នាំ ២០២១ និងគោលការណ៍ណែនាំដទៃទៀត ដែលមានជាធរមាន។
ក្រសួងអប់រំបញ្ជាក់ថា គ្រឹះស្ថានសិក្សាឯកជន ដែលមានបំណងបើកដំណើរការសកម្មភាពនិងសេវាកម្មខាងលើត្រូវឆ្លងកាត់ការពិភាក្សាជាមួយមាតាបិតា និងអ្នកអាណាព្យាបាលសិស្សជាមុន៕