ក្រចេះៈ គណៈកម្មាធិការគ្រប់គ្រងដីរដ្ឋខេត្តក្រចេះ បានសម្រេចកាត់ឆ្វៀលដី ផ្ទៃដីទំហំ ៧ ៥០៤,៩៧ ហិកតា ជូនប្រជាពលរដ្ឋ តាមរូបមន្តស្បែកខ្លា សម្រាប់ប្រជាពលរដ្ឋដាំដុះអាស្រ័យផលបន្ត ខណៈដែលដីទំហំ ២ ៦៨៦,៨៦ហិកតា នឹងធ្វើការចុះបញ្ជីជាដីឯកជនរបស់រដ្ឋវិញ ដើម្បីឱ្យក្រុមហ៊ុន ស៊ី អេច ភី ប៊ី ឌីវេឡុបមេន បន្តវិនិយោគ។
លោក កៅ ម៉ាឌីឡែន ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តក្រចេះ ថ្លែងនៅថ្ងៃទី ២ ធ្នូថា ក្រុមហ៊ុន ស៊ី អេច ភី ប៊ី ឌីវេឡុបមេន បានទទួលដីវិនិយោគសម្បទានសេដ្ឋកិច្ចជាង ១ម៉ឺនហិកតា ស្ថិតក្នុងឃុំកំពង់ចាម ឃុំវឌ្ឍនៈ ស្រុកសំបូរ និងឃុំជ្រោយបន្ទាយ ស្រុកព្រែកប្រសព្វ។
លោកប្រធានមន្ទីរបញ្ជាក់ថា លទ្ធផលក្រុមការងារចុះវាស់វែង សិក្សាផលប៉ះពាល់លម្អិត លើដីសម្បទានសេដ្ឋកិច្ចរបស់ក្រុមហ៊ុននេះ ជាលទ្ធផល ក្រុមការងារចម្រុះ បានសម្រេចកាត់ឆ្វៀលដី ជូនប្រជាពលរដ្ឋ តាមរូបមន្តស្បែកខ្លា លើផ្ទៃដីទំហំ ៧ ៥០៤,៩៧ ហិកតា សម្រាប់ប្រជាពលរដ្ឋធ្វើការដាំដុះ និងអាស្រ័យផលបន្ត។
ចំណែកដីទំហំ ២ ៦៨៦,៨៦ ហិកតា ដែលមិនមានពលរដ្ឋដាំដុះ នឹងចុះបញ្ជីជាដីឯកជនរបស់រដ្ឋ ជូនក្រុមហ៊ុនធ្វើការវិនិយោគបន្ត។
លោកថ្លែងថា ៖«ដីដែលប្រជាពលរដ្ឋបានដាំដុះ និងអាស្រ័យផលជាក់ស្តែង មានដំណាំ មានការរស់នៅ គឺយើងរក្សាទុកឱ្យគាត់ប្រើប្រាស់បន្ត ដីណាដែលគាត់អត់បានដាំដុះទេ យើងយកមកចុះបញ្ជីជាដីឯកជនរបស់រដ្ឋវិញ»។
លោក កៅ ម៉ាឌីឡែន ប្រាប់ថា ក្រុមការងារចុះដោះស្រាយទំនាស់ដីរដ្ឋថ្នាក់ខេត្ត នឹងបង្កើតក្រុមការងារចម្រុះមានទាំងថ្នាក់ឃុំ ស្រុក និងខេត្ត ចុះធ្វើព្រំដី នៅទីតាំងដីនោះ ដើម្បីកុំឱ្យភាគីខាងក្រុមហ៊ុន និងភាគីខាងប្រជាពលរដ្ឋច្រឡំព្រំប្រទល់រៀងៗខ្លួន។
លោកថ្លែងថា៖ «ពេលនេះ យើងកំពុងរៀបចំឯកសារឱ្យបានពេញលេញដើម្បីយកទៅបិទផ្សាយជាសាធារណៈ ចំពោះដីដែលយើងបម្រុងនឹងចុះបញ្ជីជាដីឯកជនរបស់រដ្ឋហ្នឹង។ ឥឡូវហ្នឹង ឯកឧត្តមអភិបាលខេត្ត កំពុងឱ្យក្រុមការងារដីរដ្ឋថ្នាក់ខេត្ត ចុះទៅជីកក្រវ៉ាត់ព្រំព័ទ្ធជុំវិញកុំឱ្យពេលដែលក្រុមហ៊ុន ចុះទៅធ្វើឬពលរដ្ឋអត់ដឹងព្រំត្រឹមណា លោកអាចកាប់ទន្ទ្រានដីរដ្ឋបន្តទៀត»។
លោក ស៊ឹង សែនករុណា អ្នកនាំពាក្យសមាគមអាដហុក ថ្លែងនៅថ្ងៃទី ២ ធ្នូថា ការសម្រេចកាត់ឆ្វៀលដីតាមរូបមន្តស្បែកខ្លារបស់ក្រុមការងារដោះស្រាយទំនាស់ ជូនប្រជាពលរដ្ឋនៅខេត្តក្រចេះ បើសិនជាមិនមានការទាមទារតវ៉ា ជំទាស់ ឬការមិនពេញចិត្តណាមួយពីសំណាក់ប្រជាពលរដ្ឋទេនោះ គឺជារឿងល្អព្រោះបានឆ្លើយតបនូវអ្វីដែលពលរដ្ឋចង់បានពិតប្រាកដ។
ប៉ុន្តែបើការសម្រេចកាត់ឆ្វៀលដីនោះ ធ្វើឱ្យមានការមិនពេញចិត្ត ដោយការដោះស្រាយធ្វើឱ្យប្រជាពលរដ្ឋមិនអាចទទួលយកបាននោះ អាជ្ញាធរមានសមត្ថកិច្ច គួរតែមានការពិនិត្យមើលឡើងវិញ និងរកដំណោះស្រាយជូនប្រជាពលរដ្ឋឱ្យបានសមរម្យ។
លោកថ្លែងថា ៖«ចំណុចហ្នឹង បើអាចមានការជួយសម្រួល នូវអ្វីដែលជាការទាមទារ របស់ប្រជាពលរដ្ឋ គួតែមានការពិនិត្យ ហើយរកដំណោះស្រាយជូនពួកគាត់» ។
លោកបញ្ជាក់ថា ក្នុងនាមអង្គការសង្គមស៊ីវិល លោកមិនគាំទ្រចំពោះជនខិលខូច ដែលទន្ទ្រានយកដីមកធ្វើការលក់យកកម្រៃហើយបែរជាទៅទន្ទ្រានទីតាំងផ្សេងទៀតនោះទេ ព្រោះជាសកម្មភាពដែលធ្វើឱ្យប៉ះពាល់ដល់ប្រជាពលរដ្ឋស្លូតត្រង់ដែលត្រូវការដីបង្កបង្កើនផលសម្រាប់ប្រកបរបរផ្សេងៗក្នុងការផ្គត់ផ្គង់ជីវភាពគ្រួសារ ។
លោកថា ចំណុចនេះ អាជ្ញាធរគួរសង្កេតពិនិត្យស្រាវជ្រាវ និងធ្វើកិច្ចសន្យាណែនាំឱ្យច្បាស់លាស់ចំពោះជនខិលខូច ដើម្បីឱ្យឈប់ធ្វើសកម្មភាពបែបនោះបន្តទៀត និងត្រូវប្រគល់ដីជូនទៅដល់អ្នកដែលត្រូវការដីពិតប្រាកដ ឱ្យសមទៅនឹងអ្វីដែលជាការប្រើប្រាស់សម្រាប់សមាជិកគ្រួសាររបស់ពួកគាត់។ ចំណុចមួយទៀតគួរតែមានការយកចិត្តទុកដាក់ សង្គេតពិនិត្យផងដែរ ចំពោះការចូលកាន់កាប់និងប្រើប្រាស់ដីទាំងនោះ។
លោកបញ្ជាក់ថា៖ «គួរតែមានការចាត់ចែងឱ្យច្បាស់អំពីការចូលគ្រប់គ្រងប្រើប្រាស់ដីទាំងអស់ហ្នឹង អ្នកខ្លះ បានតែដីហើយអត់ប្រើ ទុកចោលទៅវាអត់ធ្វើឱ្យមានភាពរីកចម្រើន។ កន្លែងខ្លះខ្ញុំចង់ទទួចដែរដូចរឿងខ្លះ ផ្តល់ដីតំបន់ដែលគ្មានជីវជាតិ ផ្តល់ដីហើយមិនបានយកចិត្តទុកដាក់ជួយបណ្តុះបណ្តាលគាត់ក្នុងការប្រើប្រាស់ដី ការដាំដុះផ្សេងៗ ចិញ្ចឹមសត្វផ្គត់ផ្គង់ជីវភាព ការរកទីផ្សារអីផ្សេងៗ ក៏ជាចំណុចមួយដែរ ដើម្បីបញ្ជៀសកុំឱ្យគាត់វិលត្រឡប់ទៅនៅក្នុងភាពក្រីក្រវិញបាន» ៕