.jpg)
លោក សាយ សំអាល់ នៅក្នុងវេទិកាថ្នាក់រដ្ឋមន្ត្រីលើកទី៧ នៅខេត្តព្រះសីហនុពីថ្ងៃទី២ ធ្នូ ។ រូបថត យូសុះ អាប់ឌុលរ៉ាស់ហ៊ីម
ព្រះសីហនុៈ លោក សាយ សំអាល់ រដ្ឋមន្ដ្រីក្រសួងបរិស្ថានថ្លែងថាកម្ពុជាប្តេជ្ញាចំពោះគោលការណ៍ផែនការខៀវ (Blue Print) ប្រកបដោយចីរភាព សមធ៌ម និងភាពធន់ សម្រាប់ការអភិវឌ្ឍសេដ្ឋកិច្ច-សង្គមវេទិកាថ្នាក់រដ្ឋមន្ត្រីលើកទី៧ ដែលមានប្រទេសជាងសមាជិក PEMSEA ចំនួន ១១ បានអនុម័តផែនទីបង្ហាញផ្លូវដល់ឆ្នាំ ២០៣០ ក្នុងការគាំទ្រការងើបឡើងវិញនៃភាពបៃតង និងពង្រឹងអភិបាលកិច្ចមហាសមុទ្រនៅអាស៊ីបូព៌ា។
លោក សាយ សំអាល់ ថ្លែងក្នុងឱកាសអញ្ជើញជាអធិបតីភាពក្នុងវេទិការដ្ឋមន្ត្រី លើកទី៧ នៃភាពជាដៃគូក្នុងការគ្រប់គ្រងបរិស្ថានសមុទ្រអាស៊ីបូព៌ានៃអង្គមហាសន្និបាតសមុទ្រអាស៊ីបូព៌ា ឆ្នាំ២០២១ នាព្រឹកថ្ងៃទី ២ ខែ ធ្នូ ឆ្នាំ ២០២១ នៅខេត្តព្រះសីហនុ៖ «កម្ពុជាប្តេជ្ញាចំពោះគោលការណ៍ផែនការខៀវ (Blue Print) ប្រកបដោយចីរភាព សមធ៌ម និងភាពធន់ សម្រាប់ការអភិវឌ្ឍសេដ្ឋកិច្ច-សង្គមរបស់យើង»។
លោកបានបន្តថា៖ «ឥឡូវនេះយើងបានឈានចូលមកដល់ទសវត្សរ៍នៃវិទ្យាសាស្ត្រមហាសមុទ្រ និងការស្ដារប្រព័ន្ធអេកូឡូស៊ី ដូច្នេះយើងត្រូវចេះច្បាមចាប់យកឱកាសទាំងអស់ ដែលមាននៅចំពោះមុខ ដើម្បីសម្រេចបាននូវគោលដៅអភិវឌ្ឍន៍ប្រកបដោយចីរភាពរួមជាមួយនឹងទស្សនវិស័យ SDS-SEA របស់យើង»។
លោក សាយ សំអាល់ បញ្ជាក់ថា ប្រវត្តិសាស្ត្រ វប្បធម៌សេដ្ឋកិច្ច និងសុខភាពក្នុងតំបន់ មានទំនាក់ទំនងយ៉ាងជិតស្និទ្ធជាមួយនឹងសមុទ្ររបស់ទាំងអស់គ្នា។ ដោយផ្អែកលើរបាយការណ៍សេដ្ឋកិច្ចពណ៌ខៀវរបស់ PEMSEA ជាមួយនឹងទិន្នន័យមកពីប្រទេសចំនួន ១០ សេដ្ឋកិច្ចមហាសមុទ្រត្រូវបានគេប៉ាន់ស្មានថា មានតម្លៃប្រហែល ១,៤ ពាន់ពាន់លានដុល្លារអាមេរិក។
លោកបានបញ្ជាក់ថា៖ «ក្នុងនាមជាមជ្ឈមណ្ឌលនៃជីវចម្រុះសមុទ្រក្នុងពិភពលោក និងមជ្ឈមណ្ឌលពាណិជ្ជកម្មដ៏មមាញឹកបំផុត តំបន់របស់យើងដើរតួនាទីយ៉ាងសំខាន់ក្នុងសន្តិសុខស្បៀង ការបង្កើតប្រាក់ចំណូល ជីវភាពរស់នៅ ការកម្សាន្ត ការការពារច្រាំងសមុទ្រ និងបទប្បញ្ញត្តិអាកាសធាតុ ក្នុងចំណោមប្រជាជនដទៃទៀត មិនត្រឹមតែនៅក្នុងតំបន់ ប៉ុន្តែនៅក្នុងពិភពលោកទាំងមូលផងដែរ»។
លោកបានលើកឡើងថា វេទិកាថ្នាក់រដ្ឋមន្ត្រីលើកទី៧ នៃភាពជាដៃគូក្នុងការគ្រប់គ្រងបរិស្ថានសមុទ្រអាស៊ីបូព៌ានាពេលនេះ កាន់តែមានសារៈសំខាន់ថែមទៀតនៅពេលដែលបានដាក់ផែនទីបង្ហាញផ្លូវរួមគ្នាដើម្បីជួយឱ្យតំបន់នេះឆ្ពោះទៅថ្ងៃអនាគតដ៏ល្អប្រសើរមួយ។
យោងតាមសេចក្ដីប្រកាសរបស់វេទិកាថ្នាក់រដ្ឋមន្ត្រីលើកទី៧គឺបានអនុម័តផែនទីបង្ហាញផ្លូវដល់ឆ្នាំ២០៣០ក្នុងការគាំទ្រការងើបឡើងវិញនៃភាពបៃតង និងពង្រឹងអភិបាលកិច្ចមហាសមុទ្រនៅអាស៊ីបូព៌ា។
តាមសេចក្ដីប្រកាសបានលើឡើងថា នៅក្នុងប្រវត្តិសាស្ត្រដំបូង រដ្ឋមន្ត្រីនិងមន្ត្រីជាន់ខ្ពស់រដ្ឋាភិបាលមកពី១១ ប្រទេសក្នុងតំបន់សមុទ្រអាស៊ីបូព៌ា បានប្រមូលផ្តុំគ្នាក្នុងអំឡុងពេលនៃវេទិការដ្ឋមន្ត្រីលើកទី៧ និងអង្គមហាសន្និបាតសមុទ្រអាស៊ីបូព៌ាឆ្នាំ២០២១ ដោយបានសន្យាប្តេជ្ញាចិត្តក្នុងការជំរុញតាមគោលការណ៍របស់អង្គការសហប្រជាជាតិប្រកបដោយនិរន្តរភាព គោលដៅអភិវឌ្ឍន៍ (SDGs) តាមរយៈភាពជាដៃគូក្នុងការគ្រប់គ្រងបរិស្ថានសម្រាប់សមុទ្រអាស៊ីបូព៌ា តាមផែនទីបង្ហាញផ្លូវទៅកាន់ឆ្នាំ២០៣០។
លោក នេត្រ ភក្ត្រា រដ្ឋលេខាធិការក្រសួងបរិស្ថានថ្លែងប្រាប់អ្នកសារព័ត៌មានក្រោយបញ្ចប់វេទិការដ្ឋមន្ត្រីលើកទី៧នៃអង្គការភាពជាដៃគូក្នុងការគ្រប់គ្រងបរិស្ថានសមុទ្រអាស៊ីបូព៌ា នៃអង្គមហាសន្និបាតសមុទ្រអាស៊ីបូព៌ា ឆ្នាំ២០២១ នៅខេត្តព្រះសីហនុ នៅថ្ងៃទី២ ធ្នូដែរថា វេទិការដ្ឋមន្ត្រីលើកទី៧ មហាសន្និបាតសមុទ្រអាស៊ីបូព៌ា ឆ្នាំ២០២១ ដែលកម្ពុជាធ្វើជាម្ចាស់ផ្ទះចាប់តាំងពីថ្ងៃទី១-២ ខែធ្នូនេះ គឺដំណើការបានដោយរលូនហើយលទ្ធផលដែលទទួលបាន គឺជាទីមោទនៈ។
លោកថ្លែងថា៖«នៅក្នុងកិចុ្ចប្រជុំនៃមហាសន្និបាតនេះ រាប់ចាប់តាំងពីកិច្ចប្រជុំនៃរដ្ឋបាលថ្នាក់ក្រោមជាតិនៃបណ្ដាប្រទេសនៃអង្គការភាពជាដៃគូក្នុងការគ្រប់គ្រងបរិស្ថានសមុទ្រអាស៊ីបូព៌ាគឺមានការចេញនូវសេចក្ដីប្រកាសរួមហើយក៏បានពិនិត្យទៅលើផែនការរបស់ខ្លួនដែលគ្រោងធ្វើចាប់ពីឆ្នាំ២០២២ ដល់ឆ្នាំ២០៣០ នៅក្នុងការគ្រប់គ្រង និងអភិរក្សតំបន់ឆ្នេររបស់ខ្លួន»។
លោកបានឱ្យដឹងថា ចំពោះសន្និសីទអន្តរជាតិរបស់រដ្ឋមន្ដ្រី PEMSEA នៅថ្ងៃទី២ ខែធ្នូនេះ គឺបានពិនិត្យឡើងវិញនូវការអនុវត្តផែនការនាពេលកន្លងទៅ ក្នុងចំណោមនៃប្រទេសជាសមាជិកនៃអង្គការ PEMSEA ទាំង១១
ប្រទេស ពិនិត្យទៅលើការគ្រប់គ្រង និងការអភិវឌ្ឍនៅក្នុងតំបន់ឆ្នេរសមុទ្រ ពិនិត្យទៅលើការអភិវឌ្ឍប្រកបដោយចីរភាព និងពិនិត្យទៅលើសុខុមាលភាពរបស់ប្រជាពលរដ្ឋដោយពាក់ព័ន្ធទៅលើការបង្កើនសមត្ថភាព និងបង្កើនប្រាក់ចំណូល។
លោក នេត្រ ភក្ត្រា បញ្ជាក់ថា៖«ចំពោះកិច្ចប្រជុំនៅថ្ងៃចុងក្រោយ ដែលយើងចាត់ទុកថាជាភាពជោគជ័យសំខាន់មួយទៀត គឺប្រទេសទាំង១១ ដែលជាសមាជិកនៃអង្គការ PEMSEA បានចុះហត្ថលេខាលើសេចក្ដីថ្លែងការណ៍រួមដែលហៅថា សេចក្ដីថ្លែងការណ៍នៃរដ្ឋមន្ដ្រីនៃអង្គការPEMSEA គឺសេចក្ដីថ្លែងការណ៍ទីក្រុងព្រះសីហនុ ដែលសេចក្ដីថ្លែងការណ៍នេះ បញ្ជាក់អំពីកិច្ចខិតខំប្រឹងប្រែងរបស់បណ្ដាប្រទេសទាំងអស់ជាសមាជិកនៅក្នុងការការពារនិងអភិរក្សសមុទ្រដែលវាជាអាយុជីវិតរបស់ប្រជាពលរដ្ឋរាប់រយលាននាក់នៅក្នុងតំបន់»។
លោករំឭកថា ក្រសួងបរិស្ថាន បានធ្វើជាម្ចាស់ផ្ទះនៃមហាសន្និបាតសមុទ្រអាស៊ីបូព៌ា ឆ្នាំ២០២១ និងវេទិកាថ្នាក់រដ្ឋមន្ត្រីលើកទី៧ នៃភាពជាដៃគូក្នុងការគ្រប់គ្រងបរិស្ថានសមុទ្រអាស៊ីបូព៌ា ក្រោមប្រធានបទ «បង្កើតទសវត្សរ៍ថ្មីនៃសុខុមាលភាពសមុទ្រ មនុស្ស និងសេដ្ឋកិច្ច» ដែលប្រព្រឹត្តទៅរយៈពេល២ថ្ងៃ ចាប់ពីថ្ងៃទី១ ដល់២ ខែធ្នូឆ្នាំ២០២១ នាខេត្តព្រះសីហនុ។
លោកបានបញ្ជាក់ថា គោលបំណងសំខាន់ៗនៃការរៀបចំមហាសន្និបាតសមុទ្ររួមមាន ទី១ ចែករំលែកមេរៀនជាបទពិសោធ តាមដានវឌ្ឍនភាពការងារកន្លងមក និងពង្រីកបន្ថែមនូវការអនុវត្តយុទ្ធសាស្ត្រ ដែលបានប្រតិបត្តិនៅថ្នាក់តំបន់ ជាតិ និងរដ្ឋបាលថ្នាក់ក្រោមជាតិ។ទី២ បង្កើតនិងរៀបចំឡើងវិញនូវយន្តការគ្រប់គ្រងដែលមានស្រាប់ និងជំរុញបង្កើតឱកាសថ្មីៗបន្ថែមទៀត សម្រាប់ភាពជាដៃគូក្នុងតំបន់តាមរយៈបច្ចេកវិទ្យា នវានុវត្តន៍ ការវិនិយោគ និងហិរញ្ញប្បទាន ដើម្បីបន្តនិរន្តរភាពនៃបរិស្ថានតំបន់ឆ្នេរ និងសមុទ្រ និងទី៣ កំណត់នូវផែនទីបង្ហាញផ្លូវដ៏ច្បាស់លាស់មួយ សម្រាប់ជាដំណោះស្រាយចំពោះបញ្ហាសមុទ្រនាទសត្សរ៍ខាងមុខ ដោយអនុលោមទៅតាមផែនការ១ទសវត្សរ៍របស់អង្គការសហប្រជាជាតិនៃវិទ្យាសាស្ត្រមហាសមុទ្រ របៀបវារៈរបស់អង្គការសហប្រជាតិឆ្នាំ២០៣០ អនុសញ្ញាក្របខ័ណ្ឌសហប្រជាតិស្តីពីការប្រែប្រួលអាកាសធាតុនិងក្របខ័ណ្ឌជីវចម្រុះសកលក្រោយឆ្នាំ២០២០ ព្រមទាំងបណ្តាក្របខ័ណ្ឌពាក់ព័ន្ធនានា៕
