ភ្នំពេញៈ សហព័ន្ធកីឡាទាញព្រ័ត្រក្រសួងមហាផ្ទៃ គ្រោងរៀបចំកម្មវិធីប្រកួតកីឡាទាញព្រ័ត្រនៅ សាលាគរុកោសល្យ និងវិក្រឹត្រការខេត្តកណ្តាលនៅថ្ងៃទី ៥ និងទី ៦ ខែធ្នូ ដើម្បីអបអរសាទរខួបលើកទី៦ នៃការដាក់បញ្ចូលល្បែងទាញព្រ័ត្រ ទៅក្នុងបញ្ជីបេតិកភណ្ឌវប្បធម៌អរូបីរបស់មនុស្សជាតិ នៃអង្គការយូណេស្កូ។
កញ្ញា មាស តឿ ប្រតិភូក្លិបកីឡាទាញព្រ័ត្រ ក្រសួងមហាផ្ទៃ ថ្លែងនៅថ្ងៃទី ២ ធ្នូថា កម្មវិធីប្រកួតទាញព្រ័ត្រនេះ សហព័ន្ធកីឡាទាញព្រ័ត្រក្រសួងមហាផ្ទៃ រៀបចំឡើង ដើម្បីធ្វើការប្រកួតប្រជែងជ្រើសរើសជើងឯកថ្នាក់ជាតិនៃការទាញព្រ័ត្រផង និងដើម្បីចូលរួម អបអរសាទរការដាក់បញ្ជូលល្បែងទាញព្រ័ត្រចូលជាសម្បត្តិបេតិកភណ្ឌអរូបីរបស់មនុស្សជាតិនៅថ្ងៃទី ២ ខែធ្នូផង។
កញ្ញាប្រាប់ថា ដើមឡើយសហព័ន្ធមានបំណងរៀបចំឡើងឱ្យទាន់ថ្ងៃទី ២ ខែធ្នូ ប៉ុន្តែដោយសារតែការរៀបចំធ្វើកម្មវិធីនេះមិនទាន់ទើប លើកពេលទៅធ្វើនៅថ្ងៃទី៥និងទី៦ ខែធ្នូវិញ។
កញ្ញា មាស តឿ បានកត់សម្គាល់ថា ប្រជាពលរដ្ឋទូទៅ នៅតែចាប់អារម្មណ៍ចូលចិត្តលេងល្បែងទាញព្រ័ត្រដែលជាល្បែងប្រជាប្រិយខ្មែរ ជាក់ស្តែងក្នុងការកម្មវិធីប្រកួតកីឡាទាញព្រ័ត្រ ដែលសហព័ន្ធគ្រោងរៀបចំនេះ មានអ្នកចង់ចូលរួមជាច្រើន ប៉ុន្តែដោយសារតែបរិបទកូវីដ១៩ ទើបមិនអាចបំពេញតាមការចង់បាន។
កញ្ញាថ្លែងថា ៖«អ្នកចង់ចូលរួមលេង គឺពលរដ្ឋទូទៅ ជាពិសេសសិស្សានុសិស្ស តាមសាលារៀនហ្នឹងតែម្តង» ។
កញ្ញាបញ្ជាក់ថា សហព័ន្ធបានរៀបចំកម្មវិធីប្រកួតទៅតាមភូមិភាគ ដើម្បីបញ្ជ្រាបការយល់ដឹងតាមបណ្តាខេត្តទាំងអស់ឱ្យស្គាល់អំពី ប្រភេទកីឡាទាញព្រ័ត្រ និងល្បែងប្រជាប្រិយទាញព្រ័ត្រ ថាតើវាមានលក្ខណៈខុសគ្នាឬយ៉ាងណា ។
បើកញ្ញា មាស តឿ ល្បែងទាញព្រ័ត្រ ជាទូទៅយើងអាចទាញដោយមិនបាច់ថ្លឹងគីឡូទេ ប៉ុន្តែកីឡាទាញព្រ័ត្រវិញ គឺត្រូវតែថ្លឹងគីឡូទៅតាមបទបញ្ជាបច្ចេកទេសរបស់អន្តរជាតិ។
កញ្ញាថា ការផុសផុលក្នុងការលេងកីឡាទាញព្រ័ត្រនេះ មានច្រើនដូចជាតាមបណ្តារោងចក្រ ដែលមានសមាគមរោងចក្រកាត់ដេរនៅកម្ពុជា បានធ្វើការប្រកួតរាល់ឆ្នាំ ខាងកងទ័ពទាំងជើងគោក និងជើងទឹក មានទាំងខាងអង្គការមួយចំនួន ដែលគេបង្កើតការលេងដោយខ្លួនឯង ក្រោយពីទទួលបានវគ្គបណ្តុះបណ្តាលពីខាងសហព័ន្ធ។
លោក ឆាយ វិសុទ្ធ ប្រធាននាយកដ្ឋានសារមន្ទីរជាតិ ថ្លែងនៅថ្ងៃទី ២ធ្នូថា ក្នុងខួបលើកទី៦ នៃការដាក់បញ្ចូលល្បែងទាញព្រ័ត្រទៅក្នុងបញ្ជីបេតិកភណ្ឌវប្បធម៌ អរូបីរបស់ មនុស្សជាតិ នៃអង្គការ យូណេស្កូ ក្រសួងវប្បធម៌ មិនមានការរៀបចំកម្មវិធីអ្វីនោះទេ ប៉ុន្តែមានសារដែលបង្ហោះតាមបណ្តាញសង្គមហ្វេសប៊ុក ដើម្បីអបអរសារទរ។
លោកបញ្ជាក់ថា ៖« ប្រជាពលរដ្ឋខ្មែរតែងថែរក្សា និងអភិរក្សល្បែងនេះរហូតមក តាមរយៈការលេងក្នុងពិធីបុណ្យចូលឆ្នាំខ្មែរប្រពៃណីជាតិ ក៏ដូចជាក្នុងកិច្ចពិធីបុណ្យសាសនានានានៅតាមវត្តអារាម» ។
លោក ស៊ីយ៉ុន សុភារិទ្ធ អគ្គនាយក នៃអគ្គនាយកដ្ឋានបច្ចេកទេសវប្បធម៌ ថ្លែងនៅថ្ងៃទី ២ ខែធ្នូថា ការដាក់បេតិកភណ្ឌអរូបី ទៅអង្គការយូនេស្កូ មិនមែនជារឿងអាក្រក់នោះទេ ព្រោះនោះបង្ហាញពីការយកចិត្តទុកដាក់ពីរដ្ឋ និងការចូលរួមថែរក្សារបស់អ្នកភូមិដែលចង់លើកតម្កើងបេតិកភណ្ឌអរូបីដែលគេចង់លើកតម្កើងនោះ។
លោកបញ្ជាក់ថា ៖« មនុស្សភាគច្រើនតែងតែយល់ច្រឡំ បេតិកភណ្ឌអរូបី ទាមទារឱ្យមានការយកចិត្តទុកដាក់បន្ទាន់ ដោយសារវាជិតបាត់បង់ និងមួយទៀត បេតិកភណ្ឌអរូបី ដែលគេដាក់ចូលទៅក្នុងបញ្ជីតំណាងរបស់អង្គការយូណេស្កូ មិនអាក្រក់ទេ។ ពីរហ្នឹងល្អដូចគ្នា មួយគឺបង្ហាញអំពីការយកចិត្តទុកដាក់របស់រដ្ឋ មួយទៀត បង្ហាញអំពី មនោសញ្ចេតនារបស់អ្នកភូមិដែលគេចង់លើកតម្កើងរបស់គេ» ៕
វីដេអូ៖