.jpg)
លោក ហ៊ុន សែន ក្នុងពិធីសម្ពោធផ្លូវ ៣៧ ខ្សែ នៅខេត្តព្រះសីហនុ ថ្ងៃទី ២ ធ្នូ។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន បានប្រកាសជាសាធារណៈគាំទ្រលោក ហ៊ុន ម៉ាណែត ដែលជាកូនប្រុសច្បងរបស់លោក និងបច្ចុប្បន្នជាអគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក ធ្វើជាបេក្ខជននាយករដ្ឋមន្ត្រីបន្តពីរូបលោក ប៉ុន្តែត្រូវឆ្លងកាត់ការបោះឆ្នោត ដែលការប្រកាសនេះធ្វើឡើងចំពេលប្រារព្ធខួបអនុស្សាវរីយ៍លើកទី ៤៣ ទិវាកំណើតរណសិរ្សសាមគ្គី អភិវឌ្ឍន៍មាតុភូមិកម្ពុជា ២ ធ្នូ ១៩៧៨ - ២ ធ្នូ ២០២១។
ការប្រកាសរបស់លោកនាយករដ្ឋមន្ត្រីត្រូវបានធ្វើឡើងនៅក្នុងពិធីសម្ពោធដាក់ឱ្យប្រើប្រាស់ហេដ្ឋារចនាសម្ព័ន្ធផ្លូវក្រុងចំនួន ៣៧ ខ្សែ និងស្ថានីយប្រព្រឹត្តិកម្មទឹកកខ្វក់ទី ១ និងទី ២ ក្នុងខេត្តព្រះសីហនុ នៅថ្ងៃទី ២ ធ្នូ ដែលលោកថា ជាការឆ្លើយតបទៅនឹងក្រុមអ្នកវិភាគ និងអ្នកប្រឆាំងមួយចំនួនដែលលើកឡើងជាដដែលៗថា លោកនឹងរៀបចំដាក់កូនប្រុសខ្លួន គឺលោក ហ៊ុន ម៉ាណែត ធ្វើជានាយករដ្ឋមន្ត្រីបន្ត។
លោក ហ៊ុន សែន លើកឡើងថា លោកបណ្តុះបណ្តាលកូនមិនមែនឱ្យធ្វើជាមេចោរនោះ ទេ។ លោក ហ៊ុន ម៉ាណែត ជាបេក្ខភាពនាយករដ្ឋមន្ត្រី ក្នុងចំណោមបេក្ខភាពនាយករដ្ឋមន្ត្រីផ្សេងទៀត ដែលលោកជាឪពុកបានគាំទ្រ ដោយកុំឱ្យអ្នកវិភាគ និងអ្នកប្រឆាំងមួយចំនួនពិបាកក្នុងការធ្វើការវិភាគ និងបរិយាយច្រើនពេក។
លោកនាយករដ្ឋមន្ត្រីថ្លែងថា៖ «អ៊ីចឹង ប្រាប់ហែ្អងឱ្យត្រង់ អញគាំទ្រកូនអញឱ្យធ្វើជានាយករដ្ឋមន្ត្រី ព្រោះហ្អែងវិភាគ វាយ៉ាប់ពេក។ ខ្ញុំសុំប្រកាសថ្ងៃនេះតែម្តង ពីព្រោះថ្ងៃនេះជាថ្ងៃ ២ ធ្នូ ថ្ងៃខ្ញុំចាប់ផ្តើម និងជាស្ថាបនិកកងប្រដាប់អាវុធ មិនមែនមេទ័ពទេ ប៉ុន្តែជាស្ថាបនិកកងទ័ព និងកាន់ទ័ព»។ លោកបន្តថា៖ «នៅថ្ងៃ ២ ធ្នូនេះជាថ្ងៃខ្ញុំចូលរួមក្បាលម៉ាស៊ីន អង្គការចាត់តាំង នយោបាយទទួលបន្ទុកកិច្ចការ បរទេស និងជាប្រធានយុវជន និងអង្គការមហាជនដទៃទៀត។ រឿងអីកូនអ្នកដទៃធ្វើបាន កូន ហ៊ុន សែន ធ្វើមិនបាន ប្រកាសឱ្យច្បាស់ កុំឱ្យវាពិបាកវិភាគ»។
លោក សេង សារី អ្នកវិភាគពីបញ្ហាសង្គម និងនយោបាយយល់ឃើញថា ចំពោះការប្រកាសគាំទ្រលោក ហ៊ុន ម៉ាណែត ជាបេក្ខជននាយករដ្ឋមន្ត្រីពីលោក ហ៊ុន សែន នេះ វាជារឿងល្អមួយសម្រាប់អ្នកតស៊ូនយោបាយនៅក្នុងប្រទេសកម្ពុជា ជាពិសេសអ្នកដែលមាននិន្នាការទៅដណ្តើមអំណាចពីគណបក្សកាន់អំណាចបច្ចុប្បន្ន។
លោកបន្តថា ជាមួយគ្នានេះ វាកាន់តែល្អបន្ថែមទៀត ដោយដឹងថា បន្ទាប់ពីលោក ហ៊ុន សែន តើនរណាជាអ្នកបន្តវេនរបស់គណបក្សប្រជាជនកម្ពុជា និងដើម្បីងាយស្រួលដល់អ្នកនយោបាយកម្ពុជា ត្រៀមខ្លួនចូលរួមប្រកួតប្រជែងជាមួយនឹងបេក្ខជនថ្មីបន្តទៀត។
លោកបញ្ជាក់ថា៖ «នៅពេលដែលយើងដឹងច្បាស់អ៊ីចឹងថា ឯកឧត្តម ហ៊ុន ម៉ាណែត ជាអ្នកបន្តវេនយើងដឹងច្បាស់ហើយថា បុគ្គលិកលក្ខណៈបន្តវេននឹងយ៉ាងម៉េច រៀនដល់កម្រិតណាមានទេពកោសល្យដឹកនាំយ៉ាងម៉េច ដើម្បីងាយស្រួលដល់អ្នកនយោបាយត្រៀមបេក្ខជនរបស់ខ្លួនជាអ្នកបន្តវេនឱ្យស័ក្តិសមជាមួយនឹងគូប្រកួតប្រជែងដូចឯកឧត្តម ហ៊ុន ម៉ាណែត»។
បើតាមលោក សេង សារី ចំពោះការប្រកាសការគាំទ្រនេះ មិនមែនលោក ហ៊ុន ម៉ាណែត ក្លាយជានាយករដ្ឋមន្ត្រីនោះទេគឺត្រូវឆ្លងកាត់សង្វៀនការបោះឆ្នោត ឬក៏ឆ្លងកាត់ការបោះឆ្នោត ដែលវាជាសង្វៀនមួយ ដែលបង្ហាញពីរបៀបរបបប្រកួតប្រជែងមួយតាមបែបប្រជាធិបតេយ្យ ដែលគេត្រូវប្រើប្រាស់នៅទូទាំងពិភពលោក។ លោកថ្លែងថា៖ «កន្លងមក បើមើលទៅប្រវត្តិសាស្ត្រ ប្រវត្តិសាស្ត្រ បានបង្រៀន យើងហើយខ្លះដែរថា រាល់ការផ្លាស់ប្តូរមេដឹកនាំប្រទេសម្តងៗ តែងតែបង្កើតប្រដាប់អាវុធ។ ប៉ុន្តែលើកនេះសង្ឃឹមថា ប្រវត្តិសាស្ត្រ មិនច្រំដែល និងការបោះឆ្នោតជាការបោះឆ្នោតដែលគ្រប់ភាគី ដែលត្រៀមនឹងចូលរួមការបោះឆ្នោតទទួលយកបាន»។
លោក ហ៊ុន សែន បានសរសេរនៅលើទំព័រហ្វេសប៊ុកផ្លូវការរបស់លោក នៅថ្ងៃទី ២ ខែធ្នូ ឆ្នាំ ២០២១ ថា រណសិរ្សសាមគ្គីសង្គ្រោះជាតិកម្ពុជាត្រូវបានកើតឡើងដោយកម្លាំងមហាសាមគ្គីប្រជាជនទាំងមូល ទាំងក្នុង និងក្រៅប្រទេស ដែលមានលោក ហេង សំរិន លោក ជា ស៊ីម លោក ហ៊ុន សែន និងវីរជនស្នេហាជាតិជាច្រើនរូបទៀត ក្នុងការរៀបចំកម្លាំងផ្ដួលរំលំរបបប្រល័យពូជសាសន៍ ប៉ុល ពត និងទទួលបានជ័យជម្នះ លើរបបនេះនៅថ្ងៃទី ៧ មករា ឆ្នាំ ១៩៧៩។ «រណសិរ្សសាមគ្គីសង្គ្រោះជាតិកម្ពុជា» បច្ចុប្បន្នត្រូវបានដូរឈ្មោះជា «រណសិរ្សសាមគ្គី អភិវឌ្ឍន៍មាតុភូមិកម្ពុជា» ដែលជាអង្គការចាត់តាំងមហាជនមួយឈានមុខរបស់គណបក្សប្រជាជនកម្ពុជាបានបដិសន្ធិឡើងនៅក្នុងតំបន់រំដោះ នាភូមិជើងឃ្លូ ឃុំ ២ ធ្នូ ស្រុកស្នួល ខេត្ដក្រចេះ។
លោកនាយករដ្ឋមន្ត្រីបន្តថា ឆ្លើយតបទៅនឹងការអំពាវនាវរបស់រណសិរ្ស ប្រជាជនគ្រប់ទិសទីបានក្រោកឈររួបរួមគ្នាជាកម្លាំងមហាសាមគ្គីជាតិដោយបានទទួលការជួយឧបត្ថម្ភយ៉ាងធំធេងពីកងទ័ពស្ម័គ្រចិត្ដវៀតណាម និងការគាំទ្រពីមិត្ដភក្ដិជិតឆ្ងាយលើសកលលោក ដើម្បីផ្ដួលរំលំរបបកម្ពុជាប្រជាធិបតេយ្យរហូតដល់ទទួលបានជ័យជម្នះដ៏ត្រចះត្រចង់នាថ្ងៃ ៧ មករា ឆ្នាំ ១៩៧៩។
ចំណែកលោក ហេង សំរិន ប្រធានរដ្ឋសភាក៏បានថ្លែងដែរថា មានរណសិរ្សសាមគ្គីសង្គ្រោះជាតិកម្ពុជា ទើបមានថ្ងៃនេះ។ មហាជ័យជម្នះ ៧ មករា ១៩៧៩ បានបពា្ចប់នូវសម័យកាលដ៏ខ្មៅងងឹតបំផុត ដែលពុំធ្លាប់មាននៅក្នុងប្រវត្ដិសាស្ដ្រកម្ពុជាបានបើកឡើងនូវសករាជថ្មី ដែលប្រជាជនកម្ពុជាយើងក៏បានទទួលមកវិញនូវសិទ្ធិសេរីភាព និងឱកាសដើម្បីស្ដារ កសាងមាតុភូមិរបស់ខ្លួនឡើងវិញ។ លោកថា៖ «ប្រជាជនគ្រប់រូបសុទ្ធតែយល់ច្បាស់ថា បើគ្មានថ្ងៃកំណើតរណសិរ្ស ២ ធ្នូ និងជ័យជម្នះ ៧ មករាទេនោះ ក៏គ្មានអ្វីៗដូចថ្ងៃនេះដែរ នេះគឺជាសច្ចធម៌នៃប្រវត្ដិសាស្ដ្រ»។
លោក ហ៊ុន ម៉ានី ប្រធានសភាសហព័ន្ធយុវជនកម្ពុជាថ្លែងថា ថ្ងៃ ២ ធ្នូ ជាថ្ងៃកំណើត សហភាពសហព័ន្ធយុវជនកម្ពុជា ដែលប្រែក្លាយពីសមាគមយុវជនកម្ពុជា និងពីសមាគមយុវជនសាមគ្គីសង្គ្រោះជាតិកម្ពុជាដែលបានចាប់បដិសន្ធិក្នុងថ្ងៃ ២ ធ្នូ ឆ្នាំ ១៩៧៨។ លោកថាស្មារតីនៃការលះបង់សាច់ស្រស់ ឈាមស្រស់ ត្រៀមខ្លួនបូជាជីវិត ដើម្បីបុព្វហេតុជាតិមាតុភូមិដែលបានឆ្លុះបញ្ចាំងក្នុងថ្ងៃ ២ ធ្នូ កាលពី ៤៣ ឆ្នាំមុន បានដក់ជាប់ក្នុងបេះដូងពលរដ្ឋខ្មែរទាំងអស់គ្នាជាយុវជនជំនាន់ក្រោយ។ លោកថា៖ «ខ្ញុំសូមឧទ្ទិសទិវានេះជូនដល់អតីតយុវជនទាំងអស់ដែលបានធ្វើពលិកម្មគ្រប់បែបយ៉ាង ដើម្បីកសាងបាននូវសុខសន្តិភាព និងភាពសម្បូររុងរឿង ដែលពួកយើងកំពុងមានសព្វថ្ងៃ។ បើគ្មានស្មារតី និងឆន្ទៈប្តូរផ្តាច់មោះមុតនោះទេ យើងក៏មិនអាចមានថ្ងៃនេះដែរ»៕
វីដេអូ៖
