.jpg)
មន្ត្រីចុះទៅពិនិត្យទីតាំងដីព្រៃលិចទឹកនៅក្នុងស្រុកកំពង់ស្វាយ។ រូបថត រដ្ឋបាលខេត្តកំពង់ធំ
កំពង់ធំៈ សាលាដំបូងខេត្តកំពង់ធំនៅថ្ងៃទី ២ ខែធ្នូ បានប្រកាសឱ្យដឹងពីចំណាត់ការ ចំពោះសំណុំរឿងរំលោភកាន់កាប់ដីព្រៃលិចទឹកនៅបឹងទន្លេសាបចំនួន ៣៣ សំណុំរឿង ដែលសាលាដំបូងចាត់ការបាន ១៩ សំណុំរឿងលើផ្ទៃដីសរុប ៩២៦,៦៦៤ ហិកតា ដែលមានជនល្មើសចំនួន ៣០ នាក់ ត្រូវបានតុលាការផ្តន្ទាទោស (ក្រៅឃុំ)។
កាលពីថ្ងៃទី ២៩ វិច្ឆិកា លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានប្រកាសថា មន្ត្រីនគរបាលយុត្តិធម៌នៃមន្ទីរកសិកម្ម ខេត្តកំពង់ធំ បានកសាងសំណុំរឿងបញ្ជូនទៅតុលាការ ចំនួន ៤០ ករណី ពាក់ព័ន្ធនឹងបទល្មើសកាប់ទន្ទ្រានឈូសឆាយដីព្រៃលិចទឹក និងកាន់កាប់ដីខុសច្បាប់ ដែលមានផ្ទៃដីចំនួនជាង ៣ ៥៦៦ ហិកតា។ ពាក្យបណ្តឹងទាំងនេះ គឺបានដាក់ជាបន្តបន្ទាប់ ចាប់តាំងពីបទល្មើសនេះបានកើតមានឡើងក្នុងអំឡុងឆ្នាំ ២០១៩ រហូតដល់ឆ្នាំ ២០២១ ដែលស្ថិតនៅក្នុងស្រុកចំនួន ៤ មានក្រុងស្ទឹងសែនមាន ៣ ករណី ស្រុកបារាយណ៍មានចំនួន ២ ករណី ស្រុកស្ទោងមាន ៦ ករណី និងស្រុកកំពង់ស្វាយ មាន ១៩ ករណី ដែលក្នុងករណីទាំងនោះមានជាប់ពាក់ព័ន្ធនឹងព្រះរាជអាជ្ញារងខេត្តកំពង់ធំ ១ ករណី។
អយ្យការអមសាលាដំបូងខេត្តកំពង់ធំបានឱ្យដឹងនៅក្នុងសេចក្តីថ្លែងការណ៍ចុះថ្ងៃទី ១ ធ្នូថា ពាក់ព័ន្ធនឹងសំណុំរឿងអតីតព្រះរាជអាជ្ញា អយ្យការអមសាលាដំបូងខេត្តកំពង់ធំ ត្រូវបានផ្ទេរសមត្ថកិច្ចទៅសាលាដំបូងរាជធានីភ្នំពេញតាំងពីឆ្នាំ ២០១៩ មក។ សំណុំរឿងនេះត្រូវបានសាលាដំបូងរាជធានីធ្វើការជំនុំជម្រះក្តី និងប្រកាសសាលក្រមសម្រេចសេចក្ដីរួចរាល់ហើយ។
អ្នកនាំពាក្យសាលាដំបូង និងអយ្យការអមសាលាដំបូងខេត្តកំពង់ធំបន្តថា ចំពោះករណីពាក់ព័ន្ធនឹងសំណុំរឿងកាប់រានឈូសឆាយដីព្រៃលិចទឹក គិតចាប់ពីឆ្នាំ ២០១៩ ដល់ឆ្នាំ ២០២១ គឺសាលាដំបូងខេត្តកំពង់ធំបានទទួលសំណុំរឿងពីមន្ទីរកសិកម្មខេត្តកំពង់ធំចំនួន ៤៧ សំណុំរឿង ដោយក្នុងនោះ មានសំណុំរឿងអញ្ញាតជន (ជនមិនស្គាល់អត្តសញ្ញាណ) ២៥ សំណុំរឿង។
សេចក្តីថ្លែងការណ៍របស់ស្ថាប័ននេះបញ្ជាក់ថា៖ «ក្នុងនោះ មានសំណុំរឿងអញ្ញាតជនចំនួន ២៥ រឿង មិនមែនត្រឹមចំនួន ៤០ រឿង ដូចការលើកឡើងនោះទេ ហើយសំណុំរឿងទាំង ៤៨ រឿងនេះ សាលាដំបូង និងអយ្យការអមសាលាដំបូងខេត្តកំពង់ធំបានចាត់ការរួចរាល់ចំនួន ៣៣ រឿង»។
ជុំវិញបញ្ហានេះ សាលាដំបូង និងអយ្យការអមសាលាដំបូងខេត្តកំពង់ធំក៏ស្នើសុំឱ្យមន្ត្រីនគរបាលយុត្តិធម៌នៃមន្ទីរកសិកម្ម រុក្ខាប្រមាញ់ ខេត្តកំពង់ធំ ខិតខំស្រាវជ្រាវ និងស្វែងរកឱ្យឃើញនូវអត្តសញ្ញាណជនប្រព្រឹត្ត ដើម្បីចាត់ការសំណុំរឿងបន្តផងដែរ។
តុលាការបន្តថា៖ «សំណុំរឿងពាក់ព័ន្ធបទល្មើសកាប់រានឈូសឆាយដីព្រៃលិចទឹកខាងលើ ដែលមន្ត្រីនគរបាលយុត្តិធម៌នៃមន្ទីរកសិកម្ម ខេត្តកំពង់ធំ បានបញ្ជូនមក ភាគច្រើនជាសំណុំរឿងអញ្ញាតជន (មានតែសំណុំរឿង និងវត្ថុតាងមួយចំនួនប៉ុណ្ណោះ) ដោយពុំបានចាប់ខ្លួន ឬឃាត់ខ្លួនជនល្មើស ឬជនសង្ស័យ ដែលករណីនេះ បានបង្កភាពស្មុគស្មាញក្នុងការស្វែងរកអត្តសញ្ញាណជនប្រព្រឹត្ត និងទាមទារពេលវេលាក្នុងការស៊ើបអង្កេតស្រាវជ្រាវ»។
លោក សូ សុវណ្ណារ៉េត អ្នកនាំពាក្យសាលាដំបូងខេត្តកំពង់ធំបានប្រាប់ភ្នំពេញប៉ុស្តិ៍បន្ថែមនៅថ្ងៃទី ២ ធ្នូថា ក្នុងករណីដែលតុលាការសម្រេចជាស្ថាពរលើបណ្តឹងទាំង ៣៣ គឺមានសំណុំរឿងមួយចំនួនបានផ្តន្ទាទោសជនជាប់ពាក់ព័ន្ធ និងមួយចំនួនទៀត ត្រូវបានលើកលែងការចោទប្រកាន់ ខណៈសំណុំរឿងមួយចំនួន មិនអាចស្វែងរកជនជាប់ពាក់ព័ន្ធឃើញ ដោយសារតែបទល្មើស គឺជាអញ្ញាតជន។
យ៉ាងណាក្តី លោកអះអាងថា គ្រប់សំណុំរឿងដែលតុលាការបានសម្រេច គឺបានរក្សាទុកដីព្រៃលិចទឹកដែលត្រូវបានកាប់ទន្ទ្រានទាំងនោះមករក្សាទុកជាសម្បត្តិរដ្ឋដដែល។
លោកបញ្ជាក់ថា៖ «ទាក់ទងចំណាត់ការរបស់តុលាការ គឺគាត់ផ្តន្ទាទោសទៅលើជនដែលប្រព្រឹត្ត ជនល្មើស និងវត្ថុតាងទេ ចំពោះដីរដ្ឋ គឺនៅជាដីរដ្ឋដដែល មិនមានការបាត់បង់អ្វីទេ»។
លោក ងួន រតនៈ អភិបាលខេត្តកំពង់ធំមិនអាចសុំការអត្ថាធិប្បាយបានទេ នៅថ្ងៃទី ២ ធ្នូ ដោយសារតែទូរស័ព្ទរបស់លោកមិនអាចទាក់ទងបាន។
ប៉ុន្តែកាលពីថ្ងៃទី ៣០ វិច្ឆិកា លោកឱ្យដឹងថា រដ្ឋបាលខេត្តនឹងមានចំណាត់ការក្នុងការរៀបចំដកហូតដីទាំងជាង ៣ ៥០០ ហិកតានេះត្រឡប់មកវិញ ក្រោយមានសេចក្តីសម្រេចពីតុលាការ៕
