.jpg)
លោក សឿន ប៊ុនលី អគ្គនាយកនៃអគ្គនាយកដ្ឋានផែនការ និងគោលនយោបាយក្រសួងសាធារណការ ក្នុងកិច្ចប្រជុំកាលពីថ្ងៃទី ១ ធ្នូ។ រូបថត MPWT
ភ្នំពេញៈ ក្រសួងសាធារណការ និងដឹកជញ្ជូនបានបើកវគ្គបណ្តុះបណ្តាលពង្រឹងសមត្ថភាពមន្ត្រីរបស់ខ្លួន ក្នុងក្របខ័ណ្ឌទូទាំងប្រទេស ពាក់ព័ន្ធនឹងការរៀបចំផែនការសកម្មភាពឆ្នាំ ២០២២ ខណៈឆ្នាំខាងមុខ សកម្មភាពដែលរួមបញ្ចូលទាំងអង្គភាពថ្នាក់ក្រោមជាតិរបស់ក្រសួង អាចនឹងកើនជាង ២ ០០០ សកម្មភាព ដែលនឹងត្រូវធ្វើការពិនិត្យ តាមដាន និងវាយតម្លៃឱ្យបានច្បាស់លាស់។
វគ្គបណ្តុះបណ្តាលលើកទី ២ ស្តីពីការរៀបចំផែនការសកម្មភាពឆ្នាំ ២០២២ នេះបានធ្វើឡើងកាលពីថ្ងៃទី ១ ធ្នូ តាមប្រព័ន្ធវីដេអូ (Zoom) ដែលមានការចូលរួមពីប្រធានមន្ទីររាជធានី-ខេត្ត អនុប្រធានមន្ទីរ ប្រធានការិយាល័យ អនុប្រធានការិយាល័យ និងមន្ត្រីជំនាញសរុបចំនួន ៩០ រូប។
លោក សឿន ប៊ុនលី អគ្គនាយកនៃអគ្គនាយកដ្ឋានផែនការ និងគោលនយោបាយក្រសួងសាធារណការថ្លែងថា វគ្គបណ្តុះបណ្តាលនេះមានគោលបំណងដើម្បីពង្រឹងសមត្ថភាព និងលើកកម្ពស់ការយល់ដឹងបន្ថែមទៀតដល់ថ្នាក់ដឹកនាំ និងមន្ត្រីបង្គោលក្នុងការជំរុញការរៀបចំផែនការសកម្មភាពឆ្នាំ ២០២២ របស់មន្ទីរសាធារណការ និងដឹកជញ្ជូនរាជធានី ខេត្ត ឱ្យកាន់តែមានប្រសិទ្ធភាពខ្ពស់ និងមានសង្គតិភាពច្បាស់លាស់។ លោកបញ្ជាក់ថា៖ «ការបណ្តុះបណ្តាលនេះ គឺស្របតាមទម្រង់តែមួយឈានឆ្ពោះទៅសម្រេចឱ្យបានតាមយុទ្ធសាស្ត្រចតុកោណដំណាក់កាលទី ៤ ផែនការយុទ្ធសាស្ត្រអភិវឌ្ឍន៍ជាតិ រួមទាំងផែនការ និងគោលនយោបាយនានារបស់រាជរដ្ឋាភិបាល និងទិសដៅរបស់ក្រសួងសាធារណការ និងដឹកជញ្ជូន ដែលបានដាក់ចេញនាពេលកន្លងមក»។
បន្ថែមពីនេះ លោក ប៊ុនលី ឱ្យដឹងទៀតថា កន្លងទៅក្រសួងបានរៀបចំផែនការសកម្មភាពរបស់ថ្នាក់ដឹកនាំ និងអង្គភាពថ្នាក់ជាតិចំនួន ២ ឆ្នាំជាប់ៗគ្នារួចមកហើយ ដែលឆ្នាំ ២០២០ មានចំនួនសរុប ៤៣៨ សកម្មភាព និងឆ្នាំ ២០២១ មានចំនួនសរុប ៩៣៨ សកម្មភាព។ លោកថ្លែងថា៖ «ដោយឡែកសម្រាប់ឆ្នាំ ២០២២ សកម្មភាពដែលរួមបញ្ចូលទាំងអង្គភាពថ្នាក់ក្រោមជាតិ ត្រូវបានរំពឹងទុកថា នឹងមានចំនួនកើនឡើងសរុបជាង ២ ០០០ សកម្មភាពដែលត្រូវធ្វើការពិនិត្យ តាមដាន និងវាយតម្លៃឱ្យបានច្បាស់លាស់ ដើម្បីជាឧបករណ៍ក្នុងការអនុវត្តការងារឱ្យកាន់តែមានប្រសិទ្ធភាពបន្ថែមទៀតជូនរាជរដ្ឋាភិបាល»។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គម-កម្ពុជាបានទទួលស្គាល់ថា ការពង្រឹងសមត្ថភាពរបស់មន្ត្រីផ្នែកបច្ចេកទេសជារឿងសំខាន់ ខណៈលោកចង់ឃើញផែនការសកម្មភាពជាក់ស្តែង ដើម្បីរក្សាគុណភាពផ្លូវថ្នល់។ «ទន្ទឹមនឹងនោះ យើងចង់ឃើញផែនការសកម្មភាពជាក់ស្តែង ដើម្បីរក្សាគុណភាពផ្លូវថ្នល់ដូចជា ការអនុវត្តឱ្យបាននូវវិធានការទាំងឡាយ នៅក្នុងច្បាប់ស្តីពីផ្លូវថ្នល់ ព្រោះយើងហាក់ឃើញផ្លូវថ្នល់ត្រូវបានគេបំពាន និងព្រងើយកន្តើយ នៅតាមតំបន់មួយចំនួន»។ ក្រៅពីនេះលោកថា៖ «ឆន្ទៈនយោបាយ បើកទូលាយឱ្យមានការចូលរួមតាមដាន គម្រោងហេដ្ឋារចនាសម្ព័ន្ធសំខាន់ៗពីសំណាក់សង្គមស៊ីវីល និងពលរដ្ឋជាគុណសម្បត្តិបន្ថែម ដើម្បីនិរន្តរភាពផ្លូវថ្នល់»៕
