សៀមរាបៈ ក្រុមសមត្ថកិច្ចនគរបាល កំពុងបន្តស្រាវជ្រាវបន្ថែមទៀតលើករណីអគ្គិភ័យ នៅក្លិបកម្សាន្ត អេលីត Elite Disco Club កាលពីយប់ថ្ងៃទី ១ ធ្នូ ឆ្នាំ ២០២១ ដែលយ៉ាងហោចណាស់មានមនុស្ស ៣ នាក់ស្លាប់ និងម្នាក់ទៀតរងរបួសធ្ងន់កំពុងសម្រាកព្យាបាលនៅមន្ទីរពេទ្យ។ នេះបើតាមលោក តេង ច័ន្ទណាត ស្នងការនគរបាលខេត្តសៀមរាប។
លោកស្នងការប្រាប់ ភ្នំពេញ ប៉ុស្តិ៍ថា ជនរងគ្រោះដែលបានស្លាប់ និងរងរបួសក្នុងគ្រោះអគ្គិភ័យនោះ សុទ្ធតែជាបុរស។ ជនរងគ្រោះដែលស្លាប់ រួមមានឈ្មោះ អ៊ឹង ស៊ីម អាយុ ៤២ ឆ្នាំ មានលំនៅភូមិបន្ទាយឈើ សង្កាត់ទឹកវិល ក្រុងសៀមរាប ជាបុគ្គលិកផ្នែកសន្តិសុខ ឈ្មោះ ធី មេសា អាយុ ៣៦ ឆ្នាំមានលំនៅភូមិកន្ត្រក សង្កាត់ស្វាយដង្គំ ក្រុងសៀមរាប ជាបុគ្គលិកសន្តិសុខ និងឈ្មោះ ឈឿន សំណាង អាយុ ២៦ ឆ្នាំរស់នៅភូមិខ្នារ សង្កាត់ជ្រាវ ក្រុងសៀមរាប ជាអ្នកចម្រៀងប្រចាំក្លិបអេលីត។ ចំណែកជនរងគ្រោះរងរបួសធ្ងន់ និងកំពុងសម្រាកព្យាបាលនៅមន្ទីរពេទ្យនោះ ឈ្មោះ ប្រាក់ សុភ័ណ្ឌ អាយុ ៤១ ឆ្នាំមានលំនៅភូមិតាភុល សង្កាត់ស្វាយដង្គំ ក្រុងសៀមរាបជាបុគ្គលិកផ្នែក DJ ប្រចាំក្លិបអេលីត។
លោកបញ្ជាក់ថា៖ «ក្នុងជំហានបឋមនេះ សមត្ថកិច្ចយើងសង្ស័យថា អគ្គិភ័យនេះបង្កឡើងដោយសារការផ្ទុះឆ្លងចរន្តអគ្គិសនីពីបន្ទប់ក្រោមដី ហើយនៅពេលនេះក្រុមមន្ត្រីនគរបាលជំនាញយើងកំពុងបន្តធ្វើការស្រាវជ្រាវបន្ថែម ដើម្បីស្វែងរកការពិត»។
បើតាមលោក ច័ន្ទ ណាត កងកម្លាំងនគរបាលពន្លត់អគ្គិភ័យបានជួបឧបសគ្គមួយចំនួនក្នុងអំឡុងពេលនៃការចុះប្រតិបត្តិការពន្លត់អគ្គិភ័យ ដោយសារទីតាំងដែលឆេះនោះ ស្ថិតនៅក្រោមដី និងមានច្រកចេញចូលតូចមួយ ដែលមិនអាចចល័តរថយន្តពន្លត់អគ្គិភ័យចូលទៅខាងក្នុងបាន។
លោកថា៖ «ការពន្លត់អគ្គិភ័យចេញពីបន្ទប់ក្រោមដីនៃអគារដ៏ធំមួយ ដែលមានច្រកចេញចូលតែមួយនោះ វាមិនងាយស្រួលទេ។ ប៉ុន្តែក្រុមការងារយើងបានប្រឹងប្រែងអស់ពីលទ្ធភាពក្នុងកិច្ចអន្តរាគមន៍ពន្លត់វា រហូតបានជោគជ័យដោយមិនឱ្យឆេះរាលដាលបន្តទៅផ្នែកផ្សេងទៀត»។
លោកបន្តថា ក្នុងប្រតិបត្តិការពន្លត់អគ្គិភ័យនេះ ក្រុមសមត្ថកិច្ចបានប្រើប្រាស់ពេលជាង ៣ ម៉ោង ដោយចាប់ផ្ដើមពីម៉ោង ១៩:៣០ ដល់ម៉ោង ២២:៥០ ទើបរលត់អស់ទាំងស្រុង ដោយប្រើប្រាស់រថយន្តពន្លត់អគ្គិភ័យ ១០ គ្រឿងមកពីអង្គភាពពាក់ព័ន្ធមួយចំនួននៅទូទាំងខេត្តសៀមរាប។ ក្នុងនោះមកពីស្នងការដ្ឋាននគរបាលខេត្តសៀមរាប ៣ គ្រឿង ពីអធិការដ្ឋាននគរបាលក្រុងសៀមរាប ១ គ្រឿង កងរាជអាវុធហត្ថខេត្ត ២ គ្រឿង អង្គភាពនគរបាលការពារបេតិកភណ្ឌ ១ គ្រឿង អាជ្ញាធរអប្សរា ២ គ្រឿង និងមកពីអាកាសយានដ្ឋានអន្តរជាតិសៀមរាប ១ គ្រឿង។
ខណៈសមត្ថកិច្ចនគរបាលកំពុងបន្តស្រាវជ្រាវ រកមូលហេតុនៃការឆេះនេះ សពជនរងគ្រោះទាំង ៣ ត្រូវបានក្រុមគ្រួសារសាច់ញាតិរបស់ពួកគេមកស្នើសុំនាំយកទៅធ្វើបុណ្យនៅតាមផ្ទះ និងវត្តអារាមក្នុងភូមិ-សង្កាត់ របស់ពួកគេរៀងៗខ្លួនអស់ហើយកាលពីព្រឹកថ្ងៃព្រហស្បតិ៍។ នេះបើតាមតំណាងម្ចាស់ក្លិបអេលីត ដែលស្នើសុំមិនបញ្ចេញឈ្មោះ។
បុរសជាតំណាងម្ចាស់ក្លិបនោះប្រាប់ តាមរយៈទូរស័ព្ទដៃថា នៅពេលនេះពួកគាត់ជាតំណាងភាគីម្ចាស់ក្លិប «កំពុងជាប់រវល់ផ្ដល់ចម្លើយដល់សមត្ថកិច្ចជុំវិញករណី គ្រោះអគ្គិភ័យនេះ»។ នៅពេលរួចរវល់កិច្ចការនេះ ពួកគាត់ជាតំណាង ម្ចាស់ក្លិបនឹងទៅជួបសួរសុខទុក្ខ និងផ្ដល់ប្រាក់ឧបត្ថម្ភដល់គ្រួសារសពជនរងគ្រោះទាំងអស់ ដើម្បីរៀបចំពិធីបុណ្យសពទៅតាមប្រពៃណី និងទៅជួបសួរសុខទុក្ខជនរងគ្រោះ ដែលរងរបួសនៅមន្ទីរពេទ្យ ដើម្បីជួយចេញថ្លៃព្យាបាលរបួសផងដែរ។
លោក ឈឿន វណ្ណា អាយុ ២១ ឆ្នាំដែលជាប្អូនបង្កើតរបស់ជនរងគ្រោះជាតារាចម្រៀងឈឿន សំណាង ប្រាប់ភ្នំពេញប៉ុស្តិ៍ថា នៅពេលនេះ សពបងប្រុសគាត់កំពុងរៀបចំពិធីបូជានៅវត្តគោកខ្មោច។ លោកថា លោក និងក្រុមគ្រួសារ មិនចង់បានសំណងអ្វីពីម្ចាស់ក្លិបនោះទេ។ លោកបញ្ជាក់ថា៖ «បងប្រុសខ្ញុំគាត់ស្លាប់ទៅហើយ។ ចំណែកម្ចាស់ក្លិប ក៏រងការខូចខាតច្រើនណាស់ដែរ បើប្ដឹងទាមទារសំណង ទៀតនោះ វាដូចជាអាក្រក់ពេកណាស់ ព្រោះខ្ញុំជឿថា គ្មាននរណាម្នាក់ចង់ឱ្យកើតមានគ្រោះអគ្គិភ័យនោះទេ។ ប៉ុន្តែបើភាគីម្ចាស់ក្លិប គាត់មានសទ្ធាចង់ជួយជាថវិកា សម្រាប់ដោះស្រាយការចំណាយផ្សេងៗ សម្រាប់ពិធីបុណ្យសពបងប្រុសខ្ញុំនោះ ខ្ញុំនិងក្រុមគ្រួសាររីករាយនឹងទទួលយក»។
លោក វណ្ណា និយាយថា៖ «បងប្រុសខ្ញុំឈ្មោះសំណាងនេះ គឺគាត់ជាមនុស្សល្អខ្លាំងណាស់។ គាត់មិន ដែលប្រព្រឹត្តកំហុសឆ្គងអ្វីជាមួយយើងខ្ញុំជាប្អូនៗ និងឪពុកម្ដាយនោះ ទេ។ គាត់ដឹងតែពីខំធ្វើការរកប្រាក់ ជួយដល់ការរៀនសូត្ររបស់ប្អូន ដោយមិនគិតពីពេលវេលាយប់ ឬថ្ងៃ ឡើយហើយអំពើល្អរបស់គាត់យើង ខ្ញុំរៀបរាប់មិនអស់ឡើយ»៕
បើតាមលោក វណ្ណា សមត្ថកិច្ចនៅមិនទាន់ប្រាប់ឱ្យបានច្បាស់ថា ករណីឆេះក្លិបកម្សាន្តនោះ បណ្ដាលមកពីអ្វីឱ្យច្បាស់នោះទេ គ្រាន់តែដាក់ការសង្ស័យទៅលើការផ្ទុះឆ្លងចរន្តអគ្គិសនីប៉ុណ្ណោះ៕