.jpg)
បុរសនាំពលករបម្រុងឆ្លងដែនចូលប្រទេសថៃត្រូវបានចាប់ខ្លួនពីថ្ងៃទី ១ ធ្នូ នៅស្រុកសំពៅលូន។ រូបថត ប៉ូលិស
បាត់ដំបងៈ បុរសមេខ្យល់ម្នាក់ពាក់ព័ន្ធនឹងការនាំពលករប្រុស-ស្រី ៤ នាក់ បម្រុងឆ្លងដែនចូលក្នុងប្រទេសថៃ ត្រូវបាននគរបាលស្រុកសំពៅលូនបញ្ជូនទៅស្នងការដ្ឋាននគរបាលខេត្តបាត់ដំបង ក្រោយពីឃាត់ខ្លួនបានប៉ុន្មានម៉ោង កាលពីរំលងអធ្រាត្រឈានចូលថ្ងៃទី ២ ធ្នូ នៅភូមិស្ពានយោល ឃុំជ្រៃសីមា ស្រុកសំពៅលូន។
លោក ទឹម វិឆ័យ អធិការនគរបាលស្រុកសំពៅលូនប្រាប់ភ្នំពេញប៉ុស្តិ៍នៅថ្ងៃទី ២ ធ្នូ ថា ជនសង្ស័យឈ្មោះ ឆុំ លឹមស្រ៊ី ភេទប្រុស អាយុ ៣៣ ឆ្នាំមានលំនៅក្នុងភូមិវាលវង់ ឃុំតាស្តា ស្រុកសំពៅលូន ខេត្តបាត់ដំបង។ ចំណែកពលករជាមនុស្សពេញវ័យមានស្រី ២ នាក់ និងប្រុស ២ នាក់ ហើយពួកគេរស់នៅខេត្តផ្សេងៗគ្នាមិនមានអ្នករស់នៅក្នុងខេត្តបាត់ដំបងទេ។
លោកថា៖ «កម្លាំងជំនាញរបស់ខ្ញុំបានបញ្ជូនជនសង្ស័យពីស្រុកសំពៅលូនទៅខេត្ត នៅថ្ងៃនេះ [ថ្ងៃទី ២ ធ្នូ]។ ជនសង្ស័យត្រូវចោទ បឋមតាមច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ»។
លោក លី រ៉ុម អធិការរងស្រុកសំពៅលូនឱ្យដឹងនៅថ្ងៃទី ២ ធ្នូ ថា មុនមានការឃាត់ខ្លួនជនសង្ស័យ កម្លាំងសមត្ថកិច្ចរបស់លោកសហការជាមួយកម្លាំងវរសេនាតូចនគរបាលការពារព្រំដែនគោកលេខ ៨១៧ និងកម្លាំងវរសេនាតូចប្រចាំការតាមមាត់អូរព្រំដែនកម្ពុជា-ថៃ ស្ថិតនៅចំណុចក្រុមទី ១ ភូមិស្ពានយោល ឃុំជ្រៃសីមា ស្រុកសំពៅលូន។ លុះនៅវេលាប្រមាណជាម៉ោង ១ កន្លះរំលងអធ្រាត្រឈានចូលថ្ងៃទី ២ ធ្នូ សមត្ថកិច្ចក៏ឃើញជនសង្ស័យ និងពលករស្រី ២ នាក់ប្រុស ២ នាក់កំពុងដើរបម្រុងឆ្លងដែនចូលទឹកដីថៃ ប៉ុន្តែក៏ត្រូវកម្លាំងសមត្ថកិច្ចព័ទ្ធចាប់ខ្លួនមេខ្យល់ម្នាក់នោះតែម្តង។
លោកបន្តថា ជារឿយៗសមត្ថកិច្ចរបស់លោកតែងតែធ្វើការទប់ស្កាត់ពលករ និងចាប់ខ្លួនមេខ្យល់បាននៅពេលយប់ជ្រៅ។ ព្រោះក្រុមមេខ្យល់គិតថា នៅពេលយប់ពួកគេអាចគេចផុតពីការចាប់ខ្លួនរបស់សមត្ថកិច្ច។ ទោះយ៉ាងណា សមត្ថកិច្ចបានដឹងអំពីល្បិចនេះរួចអស់ទៅហើយ។ ប៉ុន្តែនៅប៉ុន្មានខែចុងឆ្នាំ ២០២១ នេះ រលកនៃការលួចឆ្លងដែនរបស់ពលករទៅប្រទេសថៃហាក់មិនមានសកម្មភាពច្រើនទេ។ រីឯពលករទាំង ៤ នាក់នោះ ក្រោយសមត្ថកិច្ចសាកសួរចប់ បានអនុញ្ញាតឱ្យពួកគេត្រឡប់ទៅផ្ទះវិញ ប៉ុន្តែត្រូវអនុវត្តវិធានសុខាភិបាល ៣ កុំ ៣ ការពារ ពីការឆ្លងមេរោគកូវីដ ១៩ ឱ្យបានខ្ជាប់ខ្ចួន។
លោកស្រី រស់ ជីវី ស្នងការរងទទួលបន្ទុកការងារប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលខេត្តបាត់ដំបងឱ្យដឹងនៅថ្ងៃទី ២ ធ្នូ ថា ការឃាត់ខ្លួនមេខ្យល់ម្នាក់នេះក៏មានការបញ្ជាពីព្រះរាជអាជ្ញាអមសាលាដំបូងខេត្តបាត់ដំបងឱ្យចាប់ខ្លួនដែរ។
លោកស្រីថ្លែងថា៖ «រាល់អំពើ ឬសកម្មភាពប្រព្រឹត្តបទល្មើសរបស់ជនសង្ស័យ គឺពាក់ព័ន្ធនឹងអំពើជួញដូរមនុស្ស។ ចំពោះជនសង្ស័យឈ្មោះ ឆុំ លឹមស្រ៊ី គឺខាងនគរបាលស្រុកសំពៅលូនមិនទាន់បញ្ជូនដល់ការិយាល័យខ្ញុំទេ»៕
