.jpg)
លោក ឃួង ស្រេង ពេលចុះពិនិត្យប្រឡាយលូនៅខណ្ឌដង្កោ នាថ្ងៃទី ២ ធ្នូ។រូប សាលាក្រុង
ភ្នំពេញៈ ក្នុងដំណើរចុះត្រួតពិនិត្យស្ថានភាពប្រព័ន្ធប្រឡាយមេ និងផ្លូវមួយចំនួន តាមសណ្ដស្ទឹងព្រែកត្នោត និងតំបន់រងគ្រោះដោយជំនន់ទឹកភ្លៀងក្នុងខណ្ឌដង្កោនាថ្ងៃទី ២ ធ្នូ លោក ឃួង ស្រេង អភិបាលរាជធានី-ភ្នំពេញ ជំរុញឱ្យក្រុមការងារនៃមន្ទីរជំនាញរៀបចំជួសជុលស្ដារឡើងវិញឱ្យបានឆាប់នូវហេដ្ឋារចនាសម្ព័ន្ធដែលរងការខូចខាតដោយជំនន់ទឹកស្ទឹងព្រែកត្នោតកាលពីថ្ងៃទី ១ វិច្ឆិកា។
លោកនិយាយថា ស្ថានភាពទឹកស្ទឹងព្រែកត្នោតពី ១ ឆ្នាំទៅ ១ ឆ្នាំកម្ពស់ទឹកចេះតែកើនឡើង ដោយសារមានការអភិវឌ្ឍច្រើននៅតាមបណ្ដោយដងស្ទឹងព្រែកត្នោត ធ្វើឱ្យទឹកហូរចូលមកទឹកស្ទឹងតែ ១ ធ្វើឱ្យកម្ពស់ទឹកកើនឡើងជាលំដាប់។ ហេតុនេះហើយទើបរដ្ឋបាលរាជធានី-ភ្នំពេញនឹងលើកធ្វើជាទំនប់នៅតាមបណ្ដោយសណ្តស្ទឹងព្រែកត្នោតនេះឱ្យបានខ្ពស់ជាងមុន ដោយធ្វើយ៉ាងណាទប់ស្កាត់ការលិចលង់ឱ្យបាននៅឆ្នាំក្រោយៗទៀត។
លោកនិយាយថា៖ «ឥឡូវនេះយើងត្រូវរៀបចំដាក់លូនៅផ្លូវបេតុងចូលទៅបឹងតាម៉ាតស្ថិតក្នុងភូមិសាស្ត្រភូមិម័រ និងភូមិសំបួរ សង្កាត់ដង្កោជាមុនសិន ទើបស្ថាបនាផ្លូវតាម ក្រោយដើម្បីរំដោះការលិចលង់ដោយជំនន់ទឹកភ្លៀងនៅក្នុងភូមិសាស្ត្រខាងលើ»។
បើតាមមន្ត្រីជំនាញការដាក់បណ្តាញលូនៅផ្លូវបេតុងចូលទៅបឹងតាម៉ាតនេះគឺដាក់លូទំហំ ១,៥ ម៉ែត្រ ២ ម៉ែត្រ ហើយមកដល់ពេលនេះ ក្រុមការងារបានអនុវត្តការដាក់លូនេះបានប្រវែង ៤៥០ ម៉ែត្រក្នុងប្រវែងសរុប ៧២៩ ម៉ែត្រ ស្មើ ៦០ ភាគរយ។ ចំពោះការងារដាក់លូទំហំ ១ ម៉ែត្រ ក្រុមការងារដាក់លូបានប្រវែង ១៩០ ម៉ែត្រ លើផែនការសរុប ៩៩៦ ម៉ែត្រ ស្មើនឹង ១៥ ភាគរយ។
ក្រោយពីពិនិត្យស្ថានភាពការងាររបស់ក្រុមមន្ត្រីជំនាញនៅចំណុចខាងលើនេះរួច លោក ឃួង ស្រេង បានបន្ដចុះពិនិត្យស្ថានភាពប្រឡាយជើងឯក ស្ថិតនៅភូមិកំរៀងក្នុងសង្កាត់ព្រៃវែង ខណ្ឌដង្កោ។ ប្រឡាយនេះមានតួនាទីយ៉ាងសំខាន់ក្នុងការរំដោះទឹកចេញពីផ្លូវជាតិលេខ ៣ ចូលមកបឹងជើងឯកដែលមានប្រវែង ១២ គីឡូម៉ែត្រ។
ក្រោយពិនិត្យស្ថានភាពនៅទីនោះរួច លោកប្រាប់មន្ត្រីជំនាញនៃអង្គភាពពាក់ព័ន្ធថា៖ «សូមលើកជាគម្រោងបន្ទាន់ ដើម្បីស្ដារឡើងវិញ គឺធ្វើឱ្យជ្រៅជាងមុននឹងពង្រីកទទឹងប្រឡាយឱ្យបានធំជាងមុន ព្រមទាំងធ្វើស្ពានឆ្លងកាត់ ដើម្បីសម្រួលដល់ការធ្វើដំណើររបស់ប្រជាពលរដ្ឋក្នុងមូលដ្ឋានភូមិកំរៀង សង្កាត់ព្រៃវែងនេះ និងត្រូវដាក់ទ្វារទឹកមួយចំនួនផងដែរ»។
នៅថ្ងៃដដែលនោះលោក ឃួង ស្រេង ក៏បានចុះពិនិត្យស្ថានភាពផ្លូវមួយចំនួនទៀតផងដែរនៅតាមបណ្ដោយស្ទឹងព្រែកត្នោត ដោយជំរុញឱ្យក្រុមមន្ត្រីជំនាញត្រូវបង្កើនល្បឿននៃការស្ថាបនាជួសជុលឡើងវិញឱ្យបានឆាប់ និងឱ្យបានធំខ្ពស់ជាងមុន និងរឹងមាំជាងមុនធ្វើយ៉ាងណាការពារកុំឱ្យបាក់ស្រុត ឬជន់លិចដោយគ្រោះទឹកជំនន់តទៅទៀត។
ជាមួយគ្នានេះ លោកអភិបាលរាជធានីក៏បានជំរុញឱ្យក្រុមការងារនៃមន្ទីរជំនាញពាក់ព័ន្ធចុះរៀបចំស្ថាបនាប្រព័ន្ធលូបង្ហូរទឹកថ្មីនៅក្នុងតំបន់ផ្លូវ ២០០៤ និង ផ្លូវ ២០០២ ក្នុងភូមិសាស្ត្រសង្កាត់អូរបែកក្អម និងសង្កាត់ទឹកថ្លា ខណ្ឌសែនសុខ រាជធានី-ភ្នំពេញ ដើម្បីរំដោះការជន់លិចដោយជំនន់ទឹកភ្លៀងក្នុងតំបន់ខាងលើនេះផងដែរ៕
