កំពង់ធំៈ ក្រុមការងារពង្រឹងការអនុវត្តច្បាប់នៃគម្រោងរេដបូកទំរីង ចាប់បានរទេះក្របីកង់ឡានចំនួន ៥ គ្រឿង ដឹកជញ្ជូនឈើហុបមូល ២០ កំណាត់ និងរណារយន្តចំនួន ២ គ្រឿងនៅក្នុងភូមិត្រពាំងឫស្សី ឃុំក្រយា ស្រុកសន្ទុក ខេត្តកំពង់ធំ នៅដើមខែធ្នូនេះ។
តាមរយៈហ្វេសប៊ុកគម្រោងរេដបូកទំរីង បានឱ្យដឹងថា ក្រុមការងារពង្រឹងការអនុវត្តច្បាប់នៃគម្រោងរេដបូកទំរីង សហការជាមួយកម្លាំងតំបន់ប្រតិបត្តិការសឹករងកំពង់ធំ បានចុះប្រតិបត្តិការបង្ក្រាបបទល្មើសព្រៃឈើនៅក្នុងភូមិត្រពាំងឫស្សី ឃុំក្រយា ស្រុកសន្ទុក ខេត្តកំពង់ធំ កាលពីថ្ងៃទី ១ ខែធ្នូ ឆ្នាំ ២០២១ នេះ។
ជាលទ្ធផលក្រុមសមត្ថកិច្ចចាប់ឃាត់បានរទេះក្របីកង់ឡានចំនួន ៥ គ្រឿង ដឹកជញ្ជូនឈើហុបមូលសរុបចំនួន ២០ កំណាត់ ស្មើប្រមាណជាង ៨ ម៉ែត្រគុប និងរណារយន្តចំនួន ២ គ្រឿង។ វត្ថុតាងទាំងនោះត្រូវបានយកទៅរក្សាទុកនៅស្នាក់ការសង្កាត់រដ្ឋបាលព្រៃឈើក្រយា (អូរកំពុបអំបិល) ឃុំបឹងល្វា ស្រុកសន្ទុក ខេត្តកំពង់ធំ។
ដោយឡែកនៅថ្ងៃទី ២ ខែធ្នូ ក្រុមការងារពង្រឹងការអនុវត្តច្បាប់នៃគម្រោងរេដបូកទំរីង បានបន្តចុះល្បាតបន្ថែមទៀត នៅតំបន់អូរងើយ ស្ថិតនៅក្នុងឃុំក្រយា ស្រុកសន្ទុក ខេត្តកំពង់ធំ និង តំបន់សហគមន៍ព្រៃឈើរំចេក ស្ថិតនៅក្នុងឃុំសុចិត្រ ស្រុកសណ្តាន់ ខេត្តកំពង់ធំ។ ការចុះល្បាតនៅ ២ គោលដៅចុងក្រោយនេះ ជាលទ្ធផលពុំបានជួបប្រទះបទល្មើសព្រៃឈើឡើយ៕