.jpg)
កិច្ចប្រជុំបូកសរុបលទ្ធផលការងារសមាគមអតីតយុទ្ធជនកម្ពុជា ខេត្តព្រះសីហនុ កាលពីថ្ងៃទី ៣ ខែធ្នូ ។ រដ្ឋបាលខេត្តព្រះសីហនុ
ខេត្តព្រះសីហនុៈ ក្នុងកិច្ចប្រជុំបូកសរុបលទ្ធផលការងារសមាគមអតីតយុទ្ធជនកម្ពុជា ខេត្តព្រះសីហនុ កាលពីថ្ងៃទី ៣ ខែធ្នូ អភិបាលខេត្តព្រះសីហនុ បានណែនាំដល់គណៈបញ្ជាការឯកភាពស្រុកបន្តធ្វើការស្រាវជ្រាវសាវតារអ្នកកាន់កាប់ដីខុសច្បាប់លើដីសម្បទានសង្គមកិច្ច។
លោក គួច ចំរើន អភិបាលខេត្តព្រះសីហនុ បានធ្វើការណែនាំដល់គណៈបញ្ជាការឯកភាពស្រុកត្រូវបន្តស្រាវជ្រាវសាវតារអ្នកកាន់កាប់ដីខុសច្បាប់ និងកាយព្រំការពារដីសម្បទានសង្គមកិច្ចឱ្យបានច្បាស់លាស់។ ជាមួយគ្នានោះ ត្រូវបង្កើតក្រុមការងារចុះស្រាវជ្រាវ រុករកដីអតីតយុទ្ធជន ដែលមានការពាក់ព័ន្ធជាមួយអង្គការវាយអេដផងដែរ។
លោកថ្លែងថា៖ «យើងចង់ដឹងថា ដីអតីតយុទ្ធជននៅសល់ប៉ុន្មាន បន្ទាប់ពីការកាត់ឆ្វៀល និងធ្វើផ្លូវល្បឿនលឿន? ផ្ទៃដីទាក់ទងដីរបស់អង្គការវាយអេដប៉ុន្មាន? ត្រូវកំណត់និយាមការឱ្យច្បាស់លាស់ និងស្រាវជ្រាវក្រុមគ្រួសារ ដែលបានសាងសង់ផ្ទះនៅទីនោះ តើអតីតយុទ្ធជនបានស្នាក់នៅប៉ុន្មាន? ស្ថានភាពយ៉ាងដូចម្តេច? យើងត្រូវធ្វើការដោះស្រាយជាជំហានៗ» ។
លោកឧត្តមសេនីយ៍ត្រី នូវ សំអុល មេបញ្ជាការតំបន់ប្រតិបត្តិការសឹករងខេត្តព្រះសីហនុ និងជាប្រធានសមាគមអតីតយុទ្ធជនខេត្តព្រះសីហនុ បានឱ្យដឹងថា អតីតយុទ្ធជនខេត្តព្រះសីហនុ មានចំនួន ១ ២៦៣ នាក់ (សមាជិក សមាគមអតីតយុទ្ធជនចំនួន ៨២៤ នាក់) ក្នុងនោះ ពិការចំនួន ១៤៦នាក់ ពលីចំនួន ២៤៧នាក់ មរណៈចំនួន ១៦២នាក់ និវត្តជនចំនួន ៦៩០នាក់ និងបាត់បង់សមត្ថភាពចំនួន ១៨នាក់។
លោកបញ្ជាក់ថា សមាជិកសមាគមអតីតយុទ្ធជន ដែលមានដីគ្មានផ្ទះ ឬផ្ទះស្នាក់នៅមិនសមរម្យមានចំនួន ១២ គ្រួសារ។ បានធ្វើផ្ទះ ១២ខ្នងរួចហើយ ប៉ុន្តែមិនទាន់បានប្រគល់ជូនពួកគាត់ចំនួន ១១ ខ្នង។ អ្នកគ្មានដី គ្មានផ្ទះចំនួន ៤៨ គ្រួសារ រស់នៅលើដីសាធារណៈចំនួន ១៩គ្រួសារ។
លោកថា ចាប់ពីឆ្នាំ ២០១៦ មកដល់ឆ្នាំ២០២១ សមាជិកសមាគមអតីតយុទ្ធជនកម្ពុជា ខេត្តព្រះសីហនុ មានដីតែផ្ទះមិនសមរម្យ គណៈកម្មាធិការសមាគមយុវជនកម្ពុជាខេត្តព្រះសីហនុ បានសាងសង់ផ្ទះជូនចំនួន ២១ ខ្នងរួចមកហើយសម្រាប់ជូនពួកគាត់។
លោកនាយឧត្តមសេនីយ៍ គន់ គីម ទេសរដ្ឋមន្ដ្រី ទទួលបន្ទុកបេសកកម្មពិសេស អនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ និងជាអគ្គលេខាធិការសមាគមអតីតយុទ្ធជនកម្ពុជាថ្លែងថា ការបែងចែកដីសម្បទានសង្គមកិច្ចជូនអតីតយុទ្ធជនមកដល់ពេលនេះ មានរយៈពេល ៨ឆ្នាំមកហើយ សម្រាប់អ្នកដែលមានរស់នៅពិតប្រាកដត្រូវចេញបណ្ណជូនពួកគាត់។
លោកបញ្ជាក់ថា ៖«អ្នករស់នៅអចិន្ត្រៃយ៍ត្រូវចេញប័ណ្ណកម្មសិទ្ធិជូនពួកគាត់។ តាមធម្មតាអ្នករស់នៅ ៥ឆ្នាំ ត្រូវចេញប័ណ្ណកម្មសិទ្ធិជូនគាត់ ហើយប័ណ្ណកម្មសិទ្ធិនោះ គាត់មានសិទ្ធិចាត់ចែង ប្រើប្រាស់ ឬចែកទៅកូនដោយស្របច្បាប់។ ចំពោះអ្នកមិនស្នាក់នៅយើងត្រូវពិនិត្យដោះស្រាយបន្តទៀត។ យើងក៏ត្រូវគិតគូរដល់មន្ត្រីរាជការ ដែលក្រពិតប្រាកដ មិនចាំតែអតីតយុទ្ធជនទេ ប្រជាជនក្រពិតប្រាកដ ដែលមានបណ្ណក្រីក្រលេខ១ លេខ២ ក៏ត្រូវគិតគូរដូចអតីតយុទ្ធជនដែរ»។
នៅថ្ងៃដដែលនោះ លោក ចាន់ លំផាត់ សមាជិកគណៈអចិន្ត្រៃយ៍គណៈកម្មាធិការកណ្តាល សមាគមអតីតយុទ្ធជនកម្ពុជា បានអញ្ជើញទៅ ប្រកាសទទួលស្គាល់ប្រធានកិត្តិយសសមាគមអតីតយុទ្ធជនកម្ពុជាខេត្តស្ទឹងត្រែង គឺលោកស្វាយ សំអ៊ាង ជំនួសលោក ម៉ុម សារឿន ត្រូវបានផ្ទេរទៅអនុរដ្ឋលេខាធិការក្រសួងមហាផ្ទៃ នឹងប្រកាស លោក ស៊ុត វណ្ណា ប្រធានមន្ទីរសង្គមកិច្ច ជាអនុប្រធានសមាគមអតីតយុទ្ធជនកម្ពុជាខេត្តផងដែរ៕
