ភ្នំពេញៈ ក្រសួងសាធាណការនិងដឹកជញ្ជូន នៅថ្ងៃទី៤ ខែធ្នូនេះ បានឱ្យដឹងថា គម្រោងសាងសង់ផ្លូវជាតិលេខ១០ ប្រវែង ១៩៨,៧១ គីឡូម៉ែត្រ គិតត្រឹមដំណាច់ខែវិច្ឆិកា ឆ្នាំ ២០២១នេះ សម្រេចបាន ៥៤,៨៩% ហើយ។
តាមរយៈហ្វេសប៊ុកនៅថ្ងៃនេះ ក្រសួងសាធារណការ និងដឹកជញ្ជូន បានឱ្យដឹងថា គម្រោងសាងសង់ផ្លូវជាតិលេខ១០ ប្រវែង ១៩៨,៧១ គីឡូម៉ែត្រ គិតត្រឹមដំណាច់ខែវិច្ឆិកា ឆ្នាំ ២០២១ នេះ សម្រេចបាន ៥៤,៨៩% ហើយ។ កាលពីថ្ងៃទី ៣ ខែធ្នូ ក្រុមការងារបច្ចេកទេសដឹកនាំដោយលោកទេសរដ្ឋមន្ត្រី ស៊ុន ចាន់ថុល បានធ្វើដំណើរយ៉ាងស្វិតស្វាញក្នុងការត្រួសត្រាយផ្លូវ ឆ្លងកាត់ជ្រលងដងអូរ កាត់ខ្នងភ្នំក្រវាញ ដើម្បីពិនិត្យស្ថានភាពទឹកដីភូមិសាស្ត្រសមស្របសម្រាប់ការសាងសង់។
បើតាមក្រសួងសាធារណការ គម្រោងសាងសង់ផ្លូវជាតិលេខ១០ មានប្រវែងសរុបចំនួន ១៩៨,៧១ គីឡូម៉ែត្រ តភ្ជាប់ពី សំឡូត- វាលវែង-អូរសោម ដល់ កោះកុង។ គម្រោងនេះ សាងសង់ស្របតាមបទដ្ឋានបច្ចេកទេសកម្រិត ៣ របស់សាធារណរដ្ឋប្រជាមានិតចិន មានទទឹងតួផ្លូវសរុបចំនួន ៩ ម៉ែត្រ ជាប្រភេទផ្លូវកៅស៊ូពីរស្រទាប់ (DBST) ។ ក្នុងនោះ មានការសាងសង់ស្ពានចំនួន ២៣ កន្លែងប្រវែង ១៧២១,៤៦ ម៉ែត្រ ដែលមានស្ពានខ្ពស់ជាងគេមួយកន្លែងមានកម្ពស់ ៧៥ ម៉ែត្រ បណ្តោយ ៥៣០ ម៉ែត្រ និងទទឹង ១០ម៉ែត្រ ព្រមទាំងមានបំពាក់ស្លាកសញ្ញាចរាចរណ៍ គំនូសចរាចរណ៍ បង្គោលគីឡូម៉ែត្រ និងបង្គោលសុវត្ថិភាពផងដែរ។
ហ្វេសប៊ុកក្រសួងសាធារណការសរសេរថា ៖ «គម្រោងផ្លូវនេះត្រូវបានបើកការដ្ឋាន សាងសង់កាលពីថ្ងៃទី៩ ខែមីនា ឆ្នាំ ២០២០ ក្រោមអធិបតីភាពដ៏ខ្ពង់ខ្ពស់សម្តេចនាយករដ្ឋមន្រ្តី ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា»។
ក្រសួងបញ្ជាក់ថា គម្រោងផ្លូវនេះមានការជ្រើសរើសគន្លងផ្លូវថ្មីប្រវែងសរុប ៦៥,៨៩ គីឡូម៉ែត្រ ដើម្បីធ្វើផ្លូវពង្វាងពីភ្នំក្រវាញ ព្រោះតែមិនចង់វះកាត់ភ្នំក្រវាញជាពីរនាំឱ្យប៉ះពាល់ដល់បរិស្ថាននិងជម្រកសត្វព្រៃធ្ងន់ធ្ងរ។
គម្រោងផ្លូវនេះគ្រោងចំណាយថវិកាសរុបប្រមាណ ១៨៨,៣៨លានដុល្លារសហអាមេរិក ជាហិរញ្ញប្បទាន ពីរដ្ឋាភិបាលនៃសាធារណរដ្ឋប្រជាមានិតចិន រួមជាមួយថវិកាបដិភាគរបស់រាជរដ្ឋាភិបាលកម្ពុជាសម្រាប់ការដោះស្រាយផលប៉ះពាល់ ការបោសសម្អាតគ្រាប់មីន យុទ្ធភ័ណ្ឌមិនទាន់ផ្ទុះ។
គម្រោងនេះ សាងសង់ដោយក្រុមហ៊ុន សាជីវកម្មស្ពានថ្នល់ចិន (CRBC) ត្រួតពិនិត្យបច្ចេកទេសសាងសង់ដោយក្រុមហ៊ុនទីប្រឹក្សាបច្ចេកទេសក្វាងចូវ វ៉ានអាន និងគ្រោងចំណាយពេលសាងសង់ចំនួន ៤៨ខែ ចាប់ពីខែធ្នូ ឆ្នាំ២០១៩ ដល់ខែធ្នូ ឆ្នាំ ២០២៣។
ជាការកត់សម្គាល់ក្រសួងបង្ហាញថា ផ្លូវជាតិលេខ១០ គឺជាសរសៃឈាមសេដ្ឋកិច្ចជាតិដ៏មានសក្តានុពលរបស់កម្ពុជា អាចជួយសម្រួលដល់ការតភ្ជាប់ទំនាក់ទំនងគមនាគមន៍ ធ្វើសមាហរណកម្មតភ្ជាប់ផ្ទៃក្នុងប្រទេស និងជាមួយតំបន់ រួមចំណែកក្នុងការលើកកម្ពស់ប្រសិទ្ធភាពនៃការដោះដូរពាណិជ្ជកម្ម វិនិយោគ ដំណាំកសិផល កសិ-ឧស្សាហកម្ម និងទេសចរណ៍បានឆាប់រហ័ស និងចំណាយតិច ជាពិសេសជាមួយប្រទេសជិតខាង៕