កំពង់ចាមៈ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នាំយកអាវរងាជាង ១០០០ សម្រាប់ និងថវិកាមួយចំនួនទៅចែកជូនចាស់ជរាគ្មានទីពឹង នៅឃុំក្រឡា ស្រុកកំពង់សៀម ខេត្តកំពង់ចាម នៅថ្ងៃទី៤ ខែធ្នូនេះ។
តាមរយៈហ្វេសប៊ុក លោក វេង សាខុន នៅថ្ងៃទី ៤ ខែធ្នូនេះ បានឱ្យដឹងថា លោកបាននាំយកអាវរងាចំនួន ១០៥៧ សម្រាប់ និងថវិកាមួយចំនួនទៅចែកជូនចាស់ជរាគ្មានទីពឹងក្នុងស្រុក កំពង់សៀម។ ការរៀបចំពិធីថ្ងៃនេះ បានធ្វើឡើងសម្រាប់ចែកជូន ចាស់ជរាគ្មានទីពឹង ចំនួន ៤០៦ នាក់ (ស្រ្តី ២៩៩) តំណាងឱ្យចាស់ជរាដែលអញ្ជើញមកពី ៥ឃុំ គឺ៖ ឃុំអំពិល ១៣៨នាក់ ឃុំក្រឡា ១៥៥នាក់ ឃុំអូរស្វាយ ៧៤នាក់ ឃុំវិហារធំ ២៩នាក់ និងឃុំរអាង ១០នាក់។
ដោយឡែកចំពោះ ចាស់ជរាដែលគ្មានទីពឹង ស្ថិតនៅឃុំចំនួន ១០ ទៀត លោក វេង សាខុន បានប្រគល់ភារកិច្ចជូន លោក លោកស្រីដែលជាប្រធានក្រុម និងអនុប្រធានក្រុមការងារ ចុះជួយតាមបណ្តាឃុំចុះចែកបន្ត នៅចុងសប្តាហ៍នេះ និងសប្តាហ៍ក្រោយ។
លោករដ្ឋមន្ត្រីក្រសួងកសិកម្ម ថ្លែងថា សកម្មភាពនេះ បានបង្ហាញពីការយកចិត្ដទុកដាក់ គិតគូរពីសុខភាព និងទុក្ខលំបាករបស់ប្រជាពលរដ្ឋក្នុងមូលដ្ឋាន ជាពិសេស ចាស់ជរាគ្មានទីពឹង ស្រ្តីមេមាយ និងក្មេងកំព្រា ដែលជួបបញ្ហាដូចជា គ្រោះថ្នាក់ចរាចរ រន្ទះបាញ់ ខ្យល់កន្រ្តាក់ ភ្លើងឆេះផ្ទះ និងគោលនយោបាយ ក៣ (កើត ការ និងស្លាប់)៕