.jpg)
បទល្មើសក្នុងសហគមន៍តំបន់ការពារធម្មជាតិទួលនាងសាវផ្លូវហ្លួង នៅតំបន់រ៉ាមសារស្ទឹងសែន ខេត្តកំពង់ធំ។ ហ្វេសប៊ុកអង្គការជីវិតធម្មជាតិនៅកម្ពុជា
កំពង់ធំៈ ក្នុងខែវិច្ឆិកា សហគមន៍តំបន់ការពារធម្មជាតិទួលនាងសាវផ្លូវហ្លួង នៅតំបន់រ៉ាមសារស្ទឹងសែន ខេត្តកំពង់ធំ ចុះទប់ស្កាត់បទល្មើសបានចំនួន ៣ ករណី ដែលជាបទល្មើសចូលដាំដុះឈូកនៅក្នុងតំបន់ការពារ និងបទល្មើសនេសាទ។
ហ្វេសប៊ុកអង្គការជីវិតធម្មជាតិនៅកម្ពុជាបញ្ជាក់ នៅថ្ងៃទី៤ ធ្នូ ថា៖ «សហគមន៍តំបន់ការពារធម្មជាតិ ទួលនាងសាវផ្លូវហ្លួង នាតំបន់រ៉ាមសារស្ទឹងសែន បានចុះល្បាតយ៉ាងទៀងទាត់តាមការកំណត់ដូចក្នុងពិធីសារល្បាតប្រចាំខែរបស់សហគមន៍។ ជាលទ្ធផល នៅក្នុងខែវិចិ្ឆកា ឆ្នាំ២០២១ នេះ សហគមន៍បានប្រទះនិងទប់ស្កាត់បទល្មើសចំនួន ៣ ករណី ក្នុងនោះ ១ ករណីជាបទល្មើសទន្រ្ទានចូលដាំដុះឈូកនៅក្នុងតំបន់ការពារលើផ្ទៃដី ១ ហិកតា និង ២ ករណីផ្សេងទៀតជាបទល្មើសនេសាទដោយប្រើរបាំងលប មានប្រវែង ៦០០ ម៉ែត្រ»។
ហ្វេសប៊ុកដដែលបញ្ជាក់ថា សហគមន៍បានឱ្យអ្នកដាំឈូក និងអ្នកនេសាទខុសច្បាប់ធ្វើកិច្ចសន្យាបញ្ឈប់សកម្មភាពទាំងនេះ និងបានរៀបចំចំណាត់ការបន្ដដោយសហការជាមួយមន្ត្រីឧទ្យានុរក្ស ដើម្បីរុសរើរបាំងលបទាំង ២ករណី ដែលអ្នកនេសាទខុសច្បាប់ធ្លាប់បានធ្វើកិច្ចសន្យាកន្លងមកតែមិនរុះរើចេញ៕
