កំពតៈ មនុស្ស ៥ នាក់ស្លាប់ ខណៈ ៦នាក់ផ្សេងទៀត រងរបួសធ្ងន់ ដោយសារគ្រោះថ្នាក់ចរាចរវាងរថយន្តស្ទូចដឹកគ្រឿងសំណង់ និងរថយន្តតួរីសដឹកអ្នកដំណើរ នៅលើកំណាត់ផ្លូវជាតិលេខ ៣ ស្ថិតក្នុងភូមិកែបថ្មី សង្កាត់ បឹងទូក ក្រុងបូកគោ ខេត្តកំពត នៅវេលាម៉ោង ១០និង ៣០នាទី ព្រឹកថ្ងៃទី៤ ខែធ្នូនេះ។
សមត្ថកិច្ចបានឱ្យដឹងថា អ្នកធ្វើដំណើរក្នុងរថយន្តតួរីស មានចំនួន ១១នាក់ ស្រីចំនួន ២នាក់ បានរងគ្រោះថ្នាក់ស្លាប់ចំនួន ៥នាក់ ស្រី ១នាក់ ក្នុងនោះស្លាប់នៅនឹងកន្លែងចំនួន ៤នាក់ និងម្នាក់ទៀតស្លាប់នៅពេលបញ្ជូនទៅសង្គ្រោះនៅមន្ទីរពេទ្យបង្អែកខេត្តកំពត។ ចំណែកឯមនុស្ស ៦នាក់ផ្សេងទៀតរងរបួសធ្ងន់ត្រូវបានបញ្ជូនទៅសង្គ្រោះនៅមន្ទីរពេទ្យបង្អែកខេត្តកំពតផងដែរ ។
តាមរបាយការណ៍សមត្ថកិច្ច រថយន្តបង្កម៉ាក ហ៊ីណូ ពណ៌ស ពាក់ស្លាកលេខ ព្រះសីហនុ 3A-8518 បើកបរដោយឈ្មោះ រ៉ន វណ្ណា ភេទប្រុស អាយុ ៥៧ឆ្នាំ រស់នៅភូមិ៣ សង្កាត់២ ក្រុងព្រះសីហនុ ខេត្តព្រះសីហនុ។ ចំណែកឯអ្នកបើករថយន្តតួរីស ពណ៌ស ពាក់ស្លាកលេខភ្នំពេញ 2N-8313 ពុំស្គាល់អត្តសញ្ញាណ។
សមត្ថកិច្ចបញ្ជាក់ថា សពអ្នកស្លាប់ត្រូវបានតម្កល់ទុកនៅវត្តរលួស ស្ថិតនៅភូមិរលួស សង្កាត់បឹងទូក ក្រុងបូកគោ ចំណែកអ្នកបើកបររថយន្តបង្ក ត្រូវបានកម្លាំងសមត្ថកិច្ចបញ្ជូនទៅកាន់ស្នងការដ្ឋាននគរបាលខេត្តកំពត ដើម្បីកសាងសំណុំរឿងតាមនីតិវិធីច្បាប់។ ដោយឡែក រថយន្ដទាំង ២គ្រឿង ខូចកម្រិតធ្ងន់ត្រូវបានរក្សាទុកនៅអធិការដ្ឋានក្រុងបូកគោ៕