ភ្នំពេញៈ ព្រះសពរបស់សម្តេចក្រុមព្រះ នរោត្តម រណឫទ្ធិ ប្រធានក្រុមឧត្តមប្រឹក្សាផ្ទាល់ព្រះមហាក្សត្រ ត្រូវបានយាងដង្ហែត្រឡប់មកដល់ប្រទេសកម្ពុជាហើយ នាវេលាថ្ងៃត្រង់ថ្ងៃទី ០៥ ខែធ្នូនេះ ដោយព្រះសពរបស់ព្រះអង្គនឹងត្រូវតម្កល់ធ្វើបុណ្យតាមប្រពៃណីសាសនារយៈពេល ៤ថ្ងៃ នាអតីតព្រះរាជដំណាក់ របស់ព្រះអង្គនៅផ្លូវសម្តេចប៉ាន ក្រោយព្រះបរមរាជវាំង។
ពិធីថ្វាយព្រះកុសព្រះវិញ្ញាណក្ខន្ធ និងគោរពព្រះវិញ្ញាណក្ខន្ធ ព្រះសពរបស់សម្តេចក្រុមព្រះ នរោត្តម រណឫទ្ធិនឹងត្រូវប្រារព្ធធ្វើពីថ្ងៃទី៥ដល់ថ្ងៃទី០៨ ខែធ្នូ ឆ្នាំ២០២១។
យោងតាមកម្មវិធីបុណ្យ ព្រះសពរបស់ព្រះអង្គ នឹងត្រូវយាងដង្ហែនិងធ្វើពិធីបូជាព្រះសពនាព្រឹកថ្ងទី០៨ ខែធ្នូ នាព្រះមេរុ នៅខាងមុខវត្តបទុមវតី។
សម្តេចក្រុមព្រះនរោត្តម រណឫទ្ធិ ព្រះប្រធាន ក្រុមឧត្តមប្រឹក្សាផ្ទាល់ព្រះមហាក្សត្រ និងជាព្រះប្រធាន គណបក្សហ៊្វុនស៊ិនប៉ិច ទ្រង់បានសោយទិវង្គត ក្នុងព្រះជន្ម ៧៧ ព្រះវស្សា នៅប្រទេសបារាំងនៅថ្ងៃទី ២៨ វិច្ឆិកា ឆ្នាំ២០២១ដោយព្រះរោគាពាធ៕