.jpg)
រថយន្តដែលជួបគ្រោះថ្នាក់ចរាចរណ៍ នៅតាមកំណាត់ផ្លូវជាតិលេខ៣ ក្នុងក្រុងបូកគោ ខេត្តកំពតពីថ្ងៃទី៤ធ្នូ។ រូបថត នគរបាល
កំពតៈ នគរបាលការិយាល័យចរាចរណ៍ផ្លូវគោក នៃស្នងការនគរបាលខេត្តកំពត នៅថ្ងៃទី ៥ ខែធ្នូ កំពុងបន្តសួរនាំអ្នកបើករបររថយន្តម្នាក់ ពាក់ព័ន្ធករណីគ្រោះថ្នាក់ចរាចរណ៍ ដែលបណ្តាលឱ្យមនុស្សចំនួន៥នាក់ស្លាប់ និង១១នាក់ផ្សេងទៀតរងរបួសធ្ងន់ កាលពីថ្ងៃទី ៤ ធ្នូ នៅលើកំណាត់ផ្លូវជាតិលេខ៣ ស្ថិតក្នុងភូមិកែបថ្មី សង្កាត់បឹងទូក ក្រុងបូកគោ ដើម្បីកសាងសំណុំរឿងបញ្ជូនទៅតុលាការ។
លោក ពុធ ស៊ីង នាយការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តកំពត ថ្លែងនៅថ្ងៃទី ៥ ធ្នូថា សមត្ថកិច្ចកំពុងកសាងសំណុំរឿងគ្រោះថ្នាក់ចរាចរណ៍នេះ ដើម្បីនឹងបញ្ជូនទៅតុលាការ ចាត់ការតាមនីតិវិធីនៅថ្ងៃទី៦ ខែធ្នូ។
ដោយឡែក មនុស្ស៥នាក់ ដែលបានស្លាប់ ត្រូវក្រុមគ្រួសារយកទៅធ្វើបុណ្យតាមប្រពៃណី ចំណែក អ្នករងរបួសធ្ងន់៦នាក់ ត្រូវបានបញ្ចូនទៅសង្គ្រោះនៅមន្ទីរពេទ្យ នៅរាជធានីភ្នំពេញ។
ចំពោះករណីគ្រោះថ្នាក់ចរាចរណ៍នេះ តាមការស្រាវជ្រាវបញ្ជាក់ថា មុនពេលកើតហេតុ គេឃើញរថយន្តស្ទូចដឹកគ្រឿងសំណង់បើកបរក្នុងទិសដៅពីលិចទៅកើត ចំណែករថយន្តតូរីស បើកបរក្នុងទិសដៅពីកើតទៅលិច។ មកដល់កន្លែងកើតហេតុស្រាប់តែរថយន្តស្ទូចបែកកង់មុខខាងឆ្វេង ហើយបានរេចង្កូតទៅបុករថយន្តតូរីសពេញទំហឹង។
លោក ពុធ ស៊ីង ថ្លែងថា ៖«ឡានបង្កមកពីទិសខាងលិច ចំណែកឡានតូរីស មកពីកើត មកដល់ចំណុចកើតហេតុ បានបែកកង់មុខចំកន្លែងនោះផ្លូវកោងផងក៏រេចង្កូតចូលដីខាងឡានតូរីសបុកតែម្តងទៅ» ។
គ្រោះថ្នាក់ចរាចរណ៍នេះ បង្កឡើងដោយភាពខ្វះការប្រុងប្រយ័ត្ន របស់អ្នកបើកបរថយន្តស្ទូចដឹកគ្រឿងសំណង់ ព្រោះមិនបានត្រួតពិនិត្យបច្ចេកទេសត្រឹមត្រូវ បើកបរក្នុងផ្លូវកោងមានល្បឿនលឿន មិនចេះថ្លឹងថ្លែង ចំពោះលទ្ធភាពទ្រទ្រង់ទម្ងន់របស់រថយន្ត ។
លោកថ្លែងថា ៖«យើងជាអ្នកបើកបរត្រូវដឹងថា តើឡានយើងដឹកប៉ុន្មានតោន លើសទម្ងន់ឬយ៉ាងម៉េច? សម្បកកង់ឡានយ៉ាងម៉េច ថ្មីឬចាស់ បើចាស់ត្រូវដូរចេញ អ៊ីចឹងបានជាកំហុស» ។
បើតាមរបាយការណ៍របស់នគរបាល អ្នកធ្វើដំណើរក្នុងរថយន្តតូរីស មានចំនួន ១១នាក់ ស្រី ២នាក់ បានរងគ្រោះថ្នាក់ស្លាប់ចំនួន ៥នាក់ ស្រី ១នាក់ ក្នុងនោះស្លាប់នៅនឹងកន្លែងចំនួន ៤នាក់ និងម្នាក់ទៀតស្លាប់ នៅពេលបញ្ជូន ទៅសង្គ្រោះ នៅមន្ទីរពេទ្យ បង្អែក ខេត្តកំពត ។
ចំណែកឯមនុស្ស ៦នាក់ផ្សេងទៀតរងរបួសធ្ងន់ត្រូវបាន បញ្ជូនទៅសង្គ្រោះ នៅមន្ទីរពេទ្យ។
រថយន្តបង្ករម៉ាក ហ៊ីណូ ពណ៌ស ពាក់ស្លាកលេខ ព្រះសីហនុ 3A-8518 បើកបរដោយឈ្មោះ រ៉ន វណ្ណា ភេទប្រុស អាយុ ៥៧ឆ្នាំ រស់នៅភូមិ៣ សង្កាត់២ ក្រុងព្រះសីហនុ ខេត្តព្រះសីហនុ ។
ចំណែកឯអ្នកបើករថយន្តតូរីស ពណ៌ស ពាក់ផ្លាកលេខភ្នំពេញ 2N-8313 មិនស្គាល់អត្តសញ្ញាណអ្នកបើកបរ។ ចំណែក រថយន្ដទាំង ២គ្រឿង ខូចកម្រិតធ្ងន់ ត្រូវបានយកទៅរក្សាទុកនៅអធិការដ្ឋាននគរបាលក្រុងបូកគោ ៕
