ភ្នំពេញៈ តុលាការខេត្តព្រះសីហនុ បង្គាប់ឱ្យសមត្ថកិច្ចតាមចាប់ខ្លួនជនជាប់ចោទជាអតីតមន្ត្រីនគរបាលខេត្តម្នាក់ ពីបទរំលោភសេពសន្ថវៈលើកុមារីអាយុ១១ឆ្នាំ នៅសង្កាត់ ៣ ក្រុង-ខេត្តព្រះសីហនុ កាលពីជាង១០ឆ្នាំមុន ក្រោយពីជនជាប់ចោទក៏ត្រូវបានតុលាការកំពូលផ្តន្ទាទោសដាក់ពន្ធនាគារ ៥ ឆ្នាំ និងបង្គាប់ឱ្យសងសំណងរដ្ឋប្បវេណីទៅឪពុកម្តាយក្មេងស្រីរងគ្រោះចំនួន ៤០ លានរៀល។
សាលដីកាដែលមានចុះហត្ថលេខា ដោយលោក ហួត វិចិត្រ ព្រះរាជអាជ្ញារងខេត្តព្រះសីហនុ ដែលភ្នំពេញប៉ុស្តិ៍ទទួលបាននៅថ្ងៃទី៥ ធ្នូ បានបង្ហាញថា ជនជាប់ចោទឈ្មោះកង សុផាត អាយុ៤៨ឆ្នាំ រស់នៅភូមិ៣ សង្កាត់៣ ក្រុង-ខេត្តព្រះសីហនុជាប់ចោទបទរំលោភសេពសន្ថវៈ ប្រព្រឹត្តនៅ ភូមិ៣ សង្កាត់៣ ក្រុងព្រះសីហនុ ខេត្តព្រះសីហនុ កាលពីឆ្នាំ២០១០។
សាលដីកាបញ្ជាក់ថា៖«ឈ្មោះកង សុផាត អាយុ៤៨ឆ្នាំមុខរបរជាមន្ត្រីនគរបាល ជាប់ចោទពីបទរំលោភសេពសន្ថវៈ បង្គាប់មកមន្ត្រីនគរបាលយុត្តិធម៌ចាប់ខ្លួនឈ្មោះកង សុផាត យកមកឃុំខ្លួនក្នុងពន្ធនាគារ ខេត្តព្រះសីហនុ»។
ពាក់ព័ន្ធនឹងការតាមចាប់ខ្លួននេះ លោកអ៊ុក ផាន់ណារ៉េត នាយនគរបាលប៉ុស្តិ៍សង្កាត់៣ ក្រុងព្រះសីហនុ ឱ្យដឹងនៅរសៀលថ្ងៃទី៥ ធ្នូ ថា ជនជាប់ចោទឈ្មោះ កង សុផាត កំពុងត្រូវបានសមត្ថកិច្ចនគរបាលខេត្តព្រះសីហនុស្រាវជ្រាវតាមចាប់ខ្លួន។ជនជាប់ចោទបានបង្កហេតុរយៈពេលយូរមកហើយ ពោលគឺតាំងពីឆ្នាំ២០១០។
លោកបន្តថា៖«ជនជាប់ចោទបានរត់គេចខ្លួន ហើយសមត្ថកិច្ចកំពុងតាមចាប់។ ប៉ុន្តែរឿងនេះ វាបានកើតឡើងតាំងពីខ្ញុំមិនទាន់បានចូលមកបម្រើការជានាយប៉ុស្តិ៍ផងទេ»។
ទោះយ៉ាងណា បើតាមមន្ត្រីនគរបាលខេត្តព្រះសីហនុ១រូបស្នើសុំមិនបញ្ចេញឈ្មោះបានប្រាប់ភ្នំពេញប៉ុស្តិ៍នៅរសៀលថ្ងៃទី៥ ធ្នូ ថា ជនជាប់ចោទឈ្មោះកង សុផាតបានចាប់ក្មេងស្រីរងគ្រោះអាយុ១១ឆ្នាំរំលោភសេពសន្ថវៈបានសម្រេចនៅក្នុងភូមិ៣ សង្កាត់៣ ក្រុង-ខេត្តព្រះសីហនុ កាលពីខែសីហា ឆ្នាំ២០១០។ បន្ទាប់មកត្រូវបានឪពុកម្តាយក្មេងរងគ្រោះប្តឹងទៅតុលាការខេត្តព្រះសីហនុ។
មន្ត្រីរូបនោះបន្តថា សំណុំរឿងនេះ ត្រូវបានសាលាដំបូងខេត្តព្រះសីហនុ បើកសវនាការ និងប្រកាសសាលក្រមនៅថ្ងៃទី៩ ខែមេសា ឆ្នាំ២០១៥ ផ្តន្ទាទោសជនជាប់ចោទឈ្មោះកង សុផាត ដាក់ពន្ធនាគារកំណត់រយៈពេល៥ឆ្នាំ និងបង្គាប់ឱ្យសងសំណងរដ្ឋប្បវេណីទៅឪពុកម្តាយក្មេងរងគ្រោះ៤០លានរៀល។ចំពោះសាលាឧទ្ធរណ៍វិញ បានបើកសវនាការ និងប្រកាសសាលដីកានៅថ្ងៃទី២៦ ខែមករា ឆ្នាំ២០១៦ សម្រេចតម្កល់ទោស៥ឆ្នាំ និងរក្សាប្រាក់សំណងរដ្ឋប្បវេណីតាមសាលក្រមរបស់សាលាដំបូងខេត្តព្រះសីហនុ។
បន្ទាប់មកនៅតុលាការកំពូលក៏បើកសវនាការ និងប្រកាសសាលដីកា នៅថ្ងៃទី១៧ ខែតុលា ឆ្នាំ២០១៦ តម្កល់ទោសដល់ជនជាប់ចោទដាក់ពន្ធនាគារ៥ឆ្នាំ និងរក្សាទុកសំណងជំងឺចិត្តនៅដដែលដូចតុលាការថ្នាក់ក្រោមដែរ។
មន្ត្រីដដែលបញ្ជាក់ថា៖«រឿងនេះសមត្ថកិច្ចក្នុងខេត្តព្រះសីហនុ នៅតែស្វែងរកចាប់ខ្លួនជនជាប់ចោទទេ។ សមត្ថកិច្ចខិតខំធ្វើការងារនេះមិនបានដាក់ដៃដែរ»៕