.jpg)
លោក នាយករដ្ឋមន្ត្រី ហ៊ុន សែន។ រូបថត SPM
ភ្នំពេញៈ លោកនាយករដ្ឋមន្រ្តី ហ៊ុន សែន ប្រកាសធ្វើការសាងសង់មន្ទីរពេទ្យធំមួយ សម្រាប់ដាក់អ្នកជំងឺកូវីដ ១៩ ដែលអាចនឹងបញ្ចប់នៅក្នុងឆ្នាំ ២០២២ ដោយលោកនឹងផ្តល់មណ្ឌលសម្រាប់ព្យាបាលអ្នកជំងឺកូវីដ ១៩ ទៅដល់វិស័យឯកជនសម្រាប់ប្រើប្រាស់វិញ។
លោក ហ៊ុន សែន បានថ្លែងដូចនេះ នាព្រឹកថ្ងៃទី ០៦ ខែ ធ្នូ ឆ្នាំ ២០២១ ក្នុងពិធីសម្ពោធដាក់ឱ្យប្រើប្រាស់ជាផ្លូវការ ផ្លូវជាតិលេខ ១១ (អ្នកលឿង-ថ្នល់ទទឹង)។
លោកបានមានប្រសាសន៍ថា៖ «ខ្ញុំសុំឱ្យក្រសួងសុខាភិបាល ទាក់ទងជាមួយនឹងអភិបាលរាជធានីភ្នំពេញ ស្វែងរកទីតាំងសម្រាប់រៀបចំធ្វើមណ្ឌលព្យាបាលអ្នកជំងឺកូវីដមួយ ដោយសារពេលនេះ យើងនៅប្រើស្តាតអូឡាំពិក សម្រាប់ដាក់អ្នកជំងឺ ដែលប្រហែលចុងឆ្នាំ ២០២២ យើងអាចផ្ទេរអ្នកជំងឺពីស្តាតអូឡាំពិក និងមន្ទីរពេទ្យនានាមកដាក់នៅមណ្ឌលព្យាបាលជំងឺកូវីដថ្មីវិញបាន»។
លោក ហ៊ុន សែន បានបញ្ជាក់ថា៖ «យើងត្រូវមានមជ្ឈមណ្ឌលមួយទំហំធំ ដែលអាចដាក់មនុស្សបានរាប់ម៉ឺននាក់ និងមានកន្លែងសង្គ្រោះបន្ទាន់រាប់រយគ្រែ»។
លោកនាយករដ្ឋមន្រ្តីបានបន្ថែមថា ការផ្ទេរអ្នកជំងឺពីមណ្ឌលព្យាបាលរបស់វិស័យឯកជន ត្រូវធ្វើឱ្យអស់យ៉ាងយូរបំផុតចុងខែធ្នូនេះ៕
