ភ្នំពេញៈ កម្ពុជាបានបញ្ជាទិញឱសថគ្រាប់ព្យាបាលជំងឺកូវីដ ១៩ ឈ្មោះ ម៉ុលនុយពីរ៉ាវា (Molnupiravir) របស់អាមេរិកចំនួន ៤ លានគ្រាប់ សម្រាប់ព្យាបាលអ្នកជំងឺកូវីដ ១៩ ចំនួន ១០ ម៉ឺននាក់ និងប្រើប្រាស់តាមមន្ទីរពេទ្យរដ្ឋ ព្រមទាំងចែកចាយតាមឱសថស្ថាន និងគ្លីនិកឯកជន។
កាលពីថ្ងៃទី ៣ ខែវិច្ឆិកា ក្រសួងសុខាភិបាលបានប្រកាសអនុញ្ញាត ឱ្យប្រើប្រាស់ក្នុងលក្ខខណ្ឌបន្ទាន់នូវឱសថប្រភេទនេះ ដែលមានសុវត្ថិភាព និងប្រសិទ្ធភាពខ្ពស់ សម្រាប់ព្យាបាលជំងឺកូវីដ ១៩។ លក្ខខណ្ឌនៃការប្រើប្រាស់ឱសថនេះ គឺប្រើតែក្នុងអំឡុងពេលគ្រោះអាសន្នសុខភាពសាធារណៈនៃជំងឺកូវីដ ១៩ ដែលកំពុងកើតមាន និងជាជម្រើសនៃការព្យាបាលដែលស្ថិតក្រោមការស្រាវជ្រាវ និងវាយតម្លៃ។
ហ្វេសប៊ុក «TYDA - គ្រូពេទ្យស្ម័គ្រចិត្តយុវជនសម្តេចតេជោ» បានបង្ហោះសារថា នាព្រឹក ថ្ងៃសុក្រទី ៣ ខែធ្នូ ឆ្នាំ ២០២១ ក្រុមការងារសិក្សា និងស្រាវជ្រាវរកឱសថ និងបរិក្ខារសម្រាប់ប្រយុទ្ធនឹងជំងឺកូវីដ ១៩ ដែលដឹកនាំដោយលោកស្រី ពេជ ចន្ទមុន្នី [សមាជិកគណៈកម្មការប្រយុទ្ធប្រឆាំងជំងឺកូវីដ ១៩ និងជាប្រធានក្រុមដឹកនាំរួមក្រុមគ្រូពេទ្យសម្តេចតេជោ ប្រឆាំងកូវីដ ១៩] បានចុះហត្ថលេខាលើកិច្ចសន្យាបញ្ជាទិញឱសថវេជ្ជសាស្ត្រ ម៉ុលនុយពីរ៉ាវា (Molnupiravir)។
ហ្វេសប៊ុកនេះបញ្ជាក់ថា៖ «ម៉ុលនុយពីរ៉ាវា ជាឱសថប្រឆាំង វីរុស (Antiviral) ប្រើប្រាស់ក្នុងការព្យាបាលជំងឺកូវីដ ១៩ ដែលរាជរដ្ឋាភិបាលកម្ពុជាបានធ្វើការបញ្ជាទិញចំនួន ៤ លានគ្រាប់ សម្រាប់ព្យាបាលអ្នកជំងឺកូវីដ-១៩ ចំនួន ១០ ម៉ឺននាក់ សម្រាប់ប្រើប្រាស់តាមមន្ទីរពេទ្យរដ្ឋ និងចែកចាយដល់វិស័យឯកជន រួមមានតាមឱសថស្ថាន និងគ្លីនិកឯកជន»។
លោកស្រី ពេជ ចន្ទមុន្នី បានចែករំលែក (Share) សារនេះនៅលើគណនីហ្វេសប៊ុករបស់លោកស្រី ព្រមទាំងបានសរសេរ ថា «Good News for Cambodia»ដែលមានន័យថា ដំណឹងល្អសម្រាប់កម្ពុជា។
លោកនាយករដ្ឋមន្ត្រី ហ៊ុន សែន កាលពីថ្ងៃទី ១ ខែវិច្ឆិកា បានប្រកាសឱ្យដឹងផងដែរថា កម្ពុជាកំពុងទិញថ្នាំសម្រាប់ការព្យាបាលចំនួន ៥ ម៉ឺននាក់ ដែលជាថ្នាំរបស់អាមេរិក ហើយព្យាបាលល្អ។ ក្នុងម្នាក់តម្លៃ ៥០ ដុល្លារ សរុបជាទឹកប្រាក់អស់ ២,៥ លានដុល្លារ។
លោកថ្លែងថា៖ «កាលពីមុន ៧០០ ដុល្លារក្នុងម្នាក់ ក្រោយមកចុះមកនៅ ៥០ ដុល្លារ។ ឥឡូវមកនៅ ៤៦ ដុល្លារ ទាំងថ្លៃដឹកជញ្ជូន។ យើងគិតទាំងថ្លៃដឹកជញ្ជូន ព្រោះលុយយើងចេញដែរ»។
លោក ហ៊ុន សែន បន្ថែមថា៖ «ការពិតមនុស្សយើងកំពុងនៅឈឺតែប៉ុន្មានពាន់នាក់ទេ។ ប៉ុន្តែយើងទិញត្រៀមទុកសម្រាប់ព្យាបាលមនុស្ស ៥ ម៉ឺននាក់។ អ៊ីចឹងយើងអត់មានរឿងត្រូវសូញសាញច្រើនទេ គឺបញ្ជាទិញតែម្តង ប៉ុន្តែសុំប្រជាពលរដ្ឋយើងកុំផ្អែកថាថ្នាំនេះល្អ បាត់ការប្រុងប្រយ័ត្នឱ្យសោះ»។
លោកស្រី Li Ailan តំណាងអង្គការសុខភាពពិភពលោក (WHO) ប្រចាំកម្ពុជាបានសរសេរនៅលើបណ្តាញ Twitter របស់លោកស្រីនាថ្ងៃទី ៥ ធ្នូថា៖ «មេរោគកូវីដ ១៩ បំប្លែងថ្មី Omicron [អូមីក្រុង] គឺជាការផ្តោតការយកចិត្តទុកដាក់សំខាន់របស់យើងនាពេលថ្មីៗនេះ។ ប៉ុន្តែយើងមិនគួរស្មាន...យើងដឹងថា មេរោគនេះទំនងជាអាចឆ្លងបានយ៉ាងលឿន»។
លោកស្រីបន្តថា៖ «យើងមិនទាន់ដឹងពីផលប៉ះពាល់ពិតប្រាកដនៃមេរោគនេះនៅឡើយទេទៅលើភាពធ្ងន់ធ្ងរ និងឧបករណ៍សុខាភិបាលរបស់យើង។ មិនមានហេតុផលណាមួយ ដើម្បីបញ្ឈប់វិធានការល្អបច្ចុប្បន្នរបស់យើង ក្នុងការគ្រប់គ្រងហានិភ័យនោះទេ»។
លោកស្រី Li Ailan បានបញ្ជាក់ថា យុទ្ធសាស្ត្របច្ចុប្បន្ននៃជំងឺកូវីដ ១៩ នៅកម្ពុជា នៅតែមានសារៈសំខាន់ ដើម្បីឆ្លើយតបទៅនឹងមេរោគបំប្លែងថ្មីៗរួមមាន Delta និង Omicron។ ការរួមបញ្ចូលដ៏ល្អរវាងវិធានការសុខភាពសាធារណៈ និងការចាក់វ៉ាក់សាំង ត្រូវបានគេរំពឹងថា នឹងមានប្រសិទ្ធភាព សម្រាប់ទប់ស្កាត់ Omicron។ «ចូរត្រៀមខ្លួន និងអនុវត្តដោយការទទួលខុសត្រូវសម្រាប់ការបើកឡើងវិញនូវសកម្មភាពសង្គម-សេដ្ឋកិច្ចប្រកបដោយសុវត្ថិភាព និងនិរន្តរភាព»។
លោកស្រី Li Ailan បានសរសេរទៀតថា វិធានការសុខភាពសាធារណៈ និងសង្គម ដូចជាការពាក់ម៉ាស់ឱ្យបានត្រឹមត្រូវ ការអនាម័យដៃឱ្យបានល្អ ការរក្សាគម្លាត ការចៀសវាងទៅកន្លែងបិទជិត និងការចាក់វ៉ាក់សាំងជាដើម នៅតែមានប្រសិទ្ធភាពក្នុងការប្រឆាំងនឹងប្រភេទមេរោគបំប្លែងថ្មី Delta និង Omicron។ វិធានការទាំងនេះគួរតែបន្តអនុវត្តឱ្យបានត្រឹមត្រូវ ព្រោះគ្មានដំណោះស្រាយបែបមន្តអាគមទេ!៕