ភ្នំពេញៈ ព្រះសពរបស់សម្តេចក្រុមព្រះ នរោត្តម រណឫទ្ធិ ប្រធានឧត្តមក្រុមប្រឹក្សាផ្ទាល់ព្រះមហាក្សត្រ ដែលជាអតីតនាយករដ្ឋមន្ត្រីទី ១ និងជាអតីតប្រធានរដ្ឋសភានៃព្រះរាជាណាចក្រកម្ពុជា ដែលបានសោយទិវង្គតកាលពីថ្ងៃទី ២៨ វិច្ឆិកា នឹងត្រូវបូជានៅថ្ងៃទី ៨ ធ្នូ ជាថ្ងៃដែលរាជរដ្ឋាភិបាលបានសម្រេចកំណត់កាន់ទុក្ខ ដើម្បីគោរពព្រះវិញ្ញាណក្ខន្ធព្រះសពរបស់ព្រះអង្គ។
សម្តេចក្រុមព្រះ នរោត្តម រណឫទ្ធិ ព្រះប្រធានគណបក្សហ៊្វុនស៊ិនប៉ិច បានសោយទិវង្គតដោយព្រះរោគាពាធនាក្រុងប៉ារីស ប្រទេសបារាំងក្នុងព្រះជន្មាយុ ៧៧ ព្រះវស្សា ហើយព្រះសពរបស់ព្រះអង្គត្រូវបានយាងដង្ហែមកកាន់ប្រទេសកម្ពុជានាថ្ងៃទី ៥ ធ្នូ ឆ្នាំ ២០២១ តាមជើងហោះហើរពិសេសពីសាធារណរដ្ឋបារាំង និងមានអ្នកចូលរួមទទួលសពព្រះអង្គជាច្រើនអង្គ/នាក់នៅព្រលានយន្តហោះអន្តរជាតិភ្នំពេញ។
ព្រះសពរបស់ព្រះអង្គនឹងត្រូវតម្កល់ ដើម្បីធ្វើបុណ្យតាមប្រពៃណីសាសនានាអតីតព្រះរាជដំណាក់របស់ព្រះអង្គនៅផ្លូវសម្តេចប៉ាន ក្រោយព្រះបរមរាជវាំង ដោយព្រះសពនឹងត្រូវតម្កល់រយៈពេល ៤ ថ្ងៃ។
លោកនាយករដ្ឋមន្ត្រី ហ៊ុន សែន បានចេញសារាចរណែនាំមួយកាលពីថ្ងៃទី ៣ ខែធ្នូ ដោយលោកបានកំណត់យកថ្ងៃទី ៨ ខែធ្នូ ជាថ្ងៃកាន់ទុក្ខ ដើម្បីគោរពព្រះវិញ្ញាណក្ខន្ធព្រះសពសម្តេចក្រុមព្រះនរោត្តម រណឫទ្ធិ ហើយតម្រូវឱ្យក្រសួង ស្ថាប័ន សាលារៀន មន្ទីរពេទ្យរដ្ឋ និងឯកជន មន្ត្រីរាជការ កងកម្លាំងប្រដាប់អាវុធ ទីវត្តអារាម និងប្រជាជនទូទាំងប្រទេសបង្ហូតទង់ជាតិត្រឹមពាក់កណ្តាលនៃដងទង់ជាតិ។ លោក ហ៊ុន សែន បានលើកឡើងតាមរយៈសារាចរដដែលនេះថា៖ «ព្រះអង្គមានគុណបំណាច់ដ៏ធំធេងចំពោះ ជាតិ សាសនា ព្រះមហាក្សត្រ»។
លោកបន្ថែមថា គ្រប់ស្ថានីយវិទ្យុ និងទូរទស្សន៍ជាតិ និងឯកជនទាំងអស់ត្រូវផ្អាកការសម្តែង និងចាក់ផ្សាយនូវទស្សនីយភាពផ្សេងៗ ដែលមានលក្ខណៈសប្បាយគគ្រឹកគគ្រេងនៅថ្ងៃទី ៨ ខែធ្នូ ឆ្នាំ ២០២១ ផងដែរ។
យោងតាមកម្មវិធីបុណ្យនៃពិធីថ្វាយព្រះកុសលព្រះវិញ្ញាណក្ខន្ធ និងគោរពព្រះវិញ្ញាណក្ខន្ធ ព្រះសពរបស់សម្តេចក្រុមព្រះ នរោត្តម រណឫទ្ធិ របស់គណៈកម្មការរៀបចំព្រះពិធីបុណ្យព្រះសពបានបញ្ជាក់ឱ្យដឹងថា ព្រះសពរបស់ព្រះអង្គនឹងត្រូវយាងដង្ហែ និងធ្វើពិធីបូជាព្រះសពនាព្រឹកថៃ្ងទី ៨ ខែធ្នូ នាព្រះមេរុ នៅខាងមុខវត្តបទុមវតី។
នៅព្រឹកថ្ងៃទី ៨ ខែធ្នូ វេលាម៉ោង ៦ ព្រឹក បន្ទាប់ពីពិធីសាសនារួចនឹងមានធ្វើពិធីខមាទោសព្រះសពជាលើកចុងក្រោយ ដោយព្រះអង្គម្ចាស់ក្សត្រីនរោត្តម ម៉ារី និងបុត្រា-បុត្រី ព្រមទាំងព្រះញាតិវង្ស រួចធ្វើពិធីបង្សុកូល។
នៅម៉ោង ៧ ព្រឹក ពិធីរំកិលព្រះសពឡើងលើទីនាំងរថយន្តបុស្បុក រួចធ្វើពិធីដង្ហែព្រះសពចេញពីព្រះដំណាក់ ឆ្ពោះទៅកាន់ព្រះមេរុនៅខាងមុខវត្តបទុមវតី ហើយធ្វើពិធីដង្ហែព្រះសពឡើងព្រះមេរុ និងពិធីបូជាព្រះសពនឹងចាប់ផ្តើមនៅវេលាម៉ោង ៨ និង ៣០ នាទីព្រឹក។
គួរបញ្ជាក់ថា សម្តេចក្រុមព្រះ នរោត្តម រណឫទ្ធិ ប្រសូតនៅថ្ងៃទី ២ ខែមករា ឆ្នាំ ១៩៤៤។ ព្រះអង្គគឺជាព្រះរាជបុត្រទី ២ របស់ព្រះបាទនរោត្តម សីហនុ និងត្រូវជាព្រះរាមនៃព្រះមហាក្សត្រកម្ពុជាបច្ចុប្បន្នព្រះករុណា ព្រះបាទសម្តេចព្រះបរមនាថ នរោត្តម សីហមុនី។
សម្តេចក្រុមព្រះ នរោត្តម រណឫទ្ធិ គឺជាព្រះប្រធានគណបក្សរាជានិយមហ៊្វុនស៊ិនប៉ិចហើយបានជាប់ឆ្នោតក្លាយជានាយករដ្ឋមន្ត្រីទី ១ នៃកម្ពុជាពីឆ្នាំ ១៩៩៣ រហូតដល់ឆ្នាំ ១៩៩៧ ហើយបន្ទាប់មកក៏បានក្លាយជាព្រះប្រធានរដ្ឋសភានៅចន្លោះឆ្នាំ ១៩៩៨ ដល់ឆ្នាំ ២០០៦៕
វីដេអូ៖