.jpg)
សកម្មភាពរថយន្តពន្លត់អគ្គិភ័យបាញ់ពន្លត់ភ្លើងដែលឆេះនៅសង្កាត់ច្រាំងចំរេះ១ ខណ្ឌឫស្សីកែវ ពីថ្ងៃទី ៥ ធ្នូ។ រូបថត ប៉ូលិស
ភ្នំពេញៈ សំណង់លំនៅឋានរបស់ប្រជាពលរដ្ឋចំនួន ១២ ខ្នង និងផ្ទះសិប្បកម្មតម្បាញសូត្រចំនួន ១ ស្ថិតក្នុងភូមិ ៥ សង្កាត់ច្រាំងចំរេះ ១ ខណ្ឌឫស្សីកែវ រាជធានីភ្នំពេញ បានរងការឆេះខូចខាតនៅថ្ងៃទី ៥ ខែធ្នូ ឆ្នាំ ២០២១ ប៉ុន្តែមិនបង្កឱ្យមានជនរងគ្រោះណាម្នាក់ស្លាប់ និងរងរបួសឡើយ។ នេះបើតាមការអះអាងរបស់អាជ្ញាធរមូលដ្ឋាន។
លោក ហ៊ាង ថារ៉េត អធិការនគរបាលខណ្ឌឫស្សីកែវ ប្រាប់ភ្នំពេញប៉ុស្តិ៍ថា ករណីអគិ្គភ័យនៅទីតាំងខាងលើនេះ បង្កឡើងដោយការធ្វេសប្រហែសរបស់ម្ចាស់ផ្ទះម្នាក់ ដែលបានអុជទៀនចោលនៅលើហ៊ឹងទេវតាក្នុងខ្ទមស្នាក់នៅរបស់ខ្លួនក្បែរគ្រែដេក។ ទៀនបានដួលរលំធ្លាក់មកលើគំនរភួយមុងលើគ្រែនោះបណ្ដាលឱ្យឆាបឆេះរាលដាលដល់ខ្ទមអ្នកជិតខាងក្បែរនោះចំនួន ១២ ខ្នង និងផ្ទះសិប្បកម្មតម្បាញសូត្រចំនួន ១ ដែលមានទំហំ ១៥ គុណ ១៥ ម៉ែត្រ ធ្វើពីឈើលើថ្មក្រោម។
លោកបញ្ជាក់ថា៖ «ផ្ទះដែលរងការឆេះខូចខាតនោះ ភាគច្រើនជាសំណង់មិនរៀបរយដែលសង់រំលោភលើដីចំណីផ្លូវសាធារណៈ»។
ចំណែកលោក ព្រំ យ៉ន ប្រធានការិយាល័យបង្ការទប់ស្កាត់ពន្លត់ អគ្គិភ័យ និងសង្គ្រោះនៃស្នងការដ្ឋាននគរបាលរាជធានី-ភ្នំពេញប្រាប់ភ្នំពេញប៉ុស្តិ៍ថា ក្នុងប្រតិបត្តិការពន្លត់គ្រោះអគ្គិភ័យនេះ ក្រុមសមត្ថកិច្ចបានប្រើប្រាស់រថយន្តពន្លត់អគ្គិភ័យសរុប ១៣ គ្រឿង។ ប្រើប្រាស់ទឹកអស់ ១៤៦ ម៉ែត្រគុប ដោយប្រើរយៈពេល ១ ម៉ោង គឺ ចាប់ពីម៉ោង ៧:៣០ នាទីព្រឹក ដល់ ម៉ោង ៨:៣០ នាទីព្រឹកថ្ងៃទី ៥ ធ្នូ។
ដោយសាររដូវនេះជារដូវធ្លាក់ខ្យល់ខ្លាំង ងាយបង្កនូវគ្រោះអគ្គិភ័យកើតឡើង លោក យ៉ន បានអំពាវនាវដល់ប្រជាពលរដ្ឋ និងអាជ្ញាធរពាក់ព័ន្ធទាំងអស់ បង្កើនការប្រុងប្រយ័ត្ន ចំពោះការប្រើប្រាស់នូវថាមពលអគ្គិសនី និងថាមពលអុស ធ្យូង រួមទាំងឧបករណ៍សម្ភារទាំងឡាយណាដែលងាយបង្កការឆាបឆេះ ដោយត្រូវត្រួតពិនិត្យឱ្យបានច្បាស់លាស់ មុន និងក្រោយការប្រើប្រាស់។
លោក ព្រំ យ៉ន បញ្ជាក់ថា៖ «នៅក្នុងសប្ដាហ៍នេះ គឺពីថ្ងៃអង្គារទី ៣០ ខែវិច្ឆិកា ដល់ថ្ងៃអាទិត្យទី ៥ ខែធ្នូ ឆ្នាំ ២០២១ ករណីគ្រោះអគ្គិភ័យកើតឡើងក្នុងភូមិសាស្ត្ររាជធានីភ្នំពេញចំនួន ៣ លើក បណ្ដាលឱ្យមានជនរងគ្រោះស្លាប់ ៣ នាក់»។
បើតាមមន្ត្រីនគរបាលរូបនេះ ករណីគ្រោះអគ្គិភ័យ ៣ លើកផ្ទួនៗគ្នាក្នុងរយៈពេល ១ សប្ដាហ៍នេះ បង្កឡើងដោយការធ្វេសប្រហែសរបស់ម្ចាស់ផ្ទះ ដែលមិនបានត្រួតពិនិត្យនូវឧបករណ៍ប្រើប្រាស់របស់ខ្លួនឱ្យបានត្រឹមត្រូវ។ ក្នុងនោះករណីអគ្គិភ័យនៅខណ្ឌកំបូលដែលបណ្ដាលឱ្យជនរងគ្រោះ ២ នាក់ គឺ ឪពុកក្មេក និងកូនប្រសាស្រីស្លាប់ គឺ បង្កឡើងដោយការផ្ទុះឆ្លងចរន្តអគ្គិសនីនៅហ៊ឹងកុងម៉ា។
ករណីភ្លើងឆេះផ្ទះលក់ចាប់ហួយ ១ នៅភូមិដំណាក់ សង្កាត់គោកឃ្លាង ខណ្ឌសែនសុខ កាលពីរសៀលថ្ងៃទី ៣ ខែធ្នូ ឆ្នាំ ២០២១ ដែលបានបង្កឱ្យស្លាប់ស្ត្រីម្នាក់អាយុ ៥៤ ឆ្នាំ គឺបណ្ដាលមកពីផ្ទុះកំប៉ុងហ្គាសចាស់ៗ ពេលដាំស្ល ហើយឆេះរាលដាលដល់លំនៅឋាន និងទ្រព្យសម្បត្តិ ព្រមទាំងអាយុជីវិត។ ចំណែកករណីភ្លើងឆេះផ្ទះនៅព្រឹកថ្ងៃទី ៥ ខែធ្នូ ឆ្នាំ ២០២១នេះ គឺបណ្ដាលមកពីការអុជទៀនមិនប្រយ័ត្នដួលធ្នាក់លើគំនរភួយមុង ឆាបឆេះផ្ទះ និង រាលដាលដល់ផ្ទះអ្នកដទៃ។ នេះបើតាមមន្ត្រីនគរបាលដដែល៕
វីដេអូ៖
